1. Rajengro liil 19 - O Debleskro Lab 2024 (Sinte-Manouche)

O Eliya kamell te merell, oun o Devel krell les pale zoreles

¹ Oun o Ahab penas i Isebel halauter, hoy o Eliya kras oun har maras yob i tsele rashayen o deblestar Baal o rhareha.

² Kote bičras i Isebel i bičepaskres pash o Eliya oun moukas leske te penell: “I debla mou denn man i bari phagi, te krom gar touha taysar an kava tsiro, hoy tou kral lentsa.”

³ Oun har o Eliya kova shounas, tapras les i daar, oun yob nashas peske, te ačell lo djido. Yaake vas lo an o foro Beersheba. Ko his i foro an o them Youda. Oun kote moukas lo peskro boudepaskres.

⁴ Oun yob djas i dives dour an o moulo them. Oun kote beshas lo pes tel i bourra, oun kamas te merell oun penas: “Kanna hi doha, baro Devel. Mouk man te merell! Me hom gar feteder har mire phoure.”

⁵ Oun kote čivas lo pes tele oun sovas dren tel kol bourra. Oun ap yek kopo vas i bolepaskro. Ko tapras les an oun penas ap leste: “Ste pre oun rha!”

⁶ Yob dikas troul peste oun dikas pal peskro shero i kotar peklo maro oun i khoro pani. Oun yob rhas oun piyas oun čivas pes pale tele.

⁷ Kote vas o bolepaskro o baro Deblestar o douyto kopo, tapras les an oun penas: “Ste pre oun rha, i dour drom hi glan toute.”

⁸ Kote stas lo pre oun rhas oun piyas, oun djas an kay rhapaskri zoor star-deesh divessa oun star-deesh ratsya, bis te vas lo ap o Debleskri berga, o Horeb.

⁹ Kote djas lo an i grotta, oun kamas pral i rati kate te sovell. Ap yek kopo shounas lo i rakepen. Oun o baro Devel poučas lestar: “Hoy kameh tou kate, Eliya?”

¹⁰ Oun yob penas: “Tou, baro Devel oun ray pral o bolepen oun i phoub, me boudrom touke miro tselo djiyeha. Tire menshe Israel krenn bouder gar, hoy tou lentsa vin kral. I pre-čidde barra, kay touke firhe rhačedo van, dan le khetne, oun tire rakepangren maran le o rhareha. Oun me kokres ačom djido. Oun yon kamenn man ninna te marell.”

¹¹ Oun o baro Devel penas: “Dja vin oun ab glan mande ap i berga! Oun me djau glan toute vergel.” Koy phourdas i zorelo dourho pral i berge, te peran i barra tele, oun i bare barra phagan. – O baro Devel his gar an ko phourdepen. Oun pal o zorelo phourdepen trissas i phoub. – O baro Devel his gar an ko trisslepen i phoubyatar.

¹² Oun pal kay phoubyakro trisslepen vas i yag. – Oun an i yag his o baro Devel vitar gar. Oun pal koya vas i tikno dourho.

¹³ Har o Eliya kova shounas, čivas lo peskri plaashka glan peskro mouy, djas i kotar glan oun ačas tardo an i voudar an koy grotta. Oun i rakepen vas pash leste, hoy penas: “Hoy kameh tou kate, Eliya?”

¹⁴ Oun yob penas: “Tou, baro Devel oun ray pral o bolepen oun i phoub, me boudrom touke miro tselo djiyeha. Tire menshe Israel krenn bouder gar, hoy tou lentsa vin kral. I pre-čidde barra, kay touke firhe rhačedo van, dan le khetne, oun tire rakepangren maran le o rhareha. Oun me kokres ačom djido. Oun yon kamenn man ninna te marell.”

¹⁵ Kote penas o baro Devel ap leste: “Dja ko drom pale, hoy tou val, mank o moulo tato them. Oun dja dren an o foro Damaskus! Mak lačo djet ap o shero o morshestar Hasael, te vell yob o ray pral o them Aram!

¹⁶ Oun o Yehou, koleskro dad o Nimshi hi, koleske makess ninna lačo djet ap o shero, te vell yob o ray pral o Israel. Oun o Elisa, koleskro dad o Shafat hi dran Abel-Mehola, koleske mak ninna lačo djet ap leskro shero, te vell yob i Debleskro rakepaskro pal toute!

¹⁷ Palle vell yaake: Koon nay nashell peske glan o rharo, koleha o Hasael dell, koles marell o Yehou. Oun koon nay nashell peske glan o rharo, koleha o Yehou dell, koles marell o Elisa.

¹⁸ Oun me moukau efta zerya (7.000) morshen djido an Israel, kolla kay peran gar ap pengre čanga glan o debleste Baal oun čoumras les gar.”

¹⁹ Oun o Eliya djas doureder oun hatsas o Elisa, koleskro dad o Shafat hi. Oun o Elisa boudras ap i kotar phoub. Glan leste djan deesh-te-yek boudepangre, hakeno douy groumyentsa, kay hadan i phoub trouyel. Yob kokres his o deesh-te-douyto, kay djas glan douy groumya. Kote djas o Eliya pash leste oun vitsras leske leskri plaashka trouyel.

²⁰ Oun o Elisa moukas i groumyen, nashas pal o Eliya oun penas: “Mouk man te čoumrap miro dades oun miri day! Pale vau oun djau touke pal.” Kote penas lo ap leste: “Mishto, dja koy! Ma biste, hoy me touke krom.”

²¹ Oun o Elisa djas pale pale pash i groumyende, las douy groumyen oun maras len. Ko kasht, hoy kol douyen khetne rikras, las lo oun kras i yag. Koy pre keras lo o mass, das les peskre menshende, oun yon rhan. Palle stas lo pre, oun nashas pal o Eliya, oun vas leskro boudepaskro.