1. Rajengro liil 18 - O Debleskro Lab 2024 (Sinte-Manouche)

O Devel bičrell i yag oun sikrell te hi lo zorleder har o Baal

¹ Pal i rah tsiro, an o triinto bersh, kay bokenn le, penas o baro Devel ap o Eliya: “Dja, mouk tout te dikell glan o Ahab. Me moukau o brishin te vell ap i phoub!”

² Oun o Eliya kras pes ap o drom, te moukell lo pes glan o Ahab te dikell. An o them Samaria his i bok zoreles.

³ Oun o Ahab moukas o Obadya te kharell, – kova his o pralstouno pral leskro kheer. O Obadya shounas peskro tselo djiyeha ap o baro Debleste.

⁴ Oun an ko tsiro, kay i Isebel o baro Debleskre rakepangren kamas te marell, las o Obadya sheel lendar oun khatras len, i paash-sheel an kay grotta oun i paash sheel an koy grotta, oun anas lenge maro oun pani, te rhan le oun piyenn le.

⁵ Oun o Ahab penas ap o Obadya: “Mer djas an o tselo them trouyel, pash hake panya, tikne oun lengste, oun rodas zenlepen, te nay ačenn i graya oun i maultikre bourike djido, oun kek firhe merenn hounte.”

⁶ Oun hakeno kol douyendar djas an yek paash o themestar, te nashenn le yek rigyatar ap i vavar. O Ahab djas ap yek drom kokres, oun o Obadya djas ap i vavar drom kokres.

⁷ Har o Obadya yaake ap o drom his, kote vas leske o Eliya pash leste. O Obadya prindjras les, peras glan leste tele ap i phoub oun poučas: “Hal tou čačepah o Eliya, miro ray?”

⁸ Yob penas: “Me hom. Dja oun pen tiro rayeske: Ake, o Eliya!”

⁹ O Obadya penas: “Hoy krom touke čilačes, kay tou deh man an o Ahabeskro vast, te nay marell lo man?

¹⁰ Me dau man sovel pash o baro Debleste, kay tiro Devel hi: O Ahab rodas tout an hako them, pash i tsele bare rayende. Oun te penan yon: Yob hi gar pash mende, kamas lo, te denn le pen sovel, kay nay hatsan le tout gar.

¹¹ Oun kanna peneh tou: Dja, pen tiro rayeske: Ake, o Eliya!

¹² Hoy hi, te djau kanna toutar, oun o baro Debleskro dourho lell tout krik oun anell tout ap i vavar kotar phoub, hoy me gar djinau? Oun me vau palle pash o Ahab oun penau leske, tou hal kay, oun yob hatsell tout gar? Palle moukell lo man te marell. Tou djineh, me, tiro boudepaskro, shounau ap o baro Debleste foun tiknes pre.

¹³ Miro ray, vas touke gar penlo, hoy me krom, har moukas i Isebel o baro Debleskre rakepangren te marell, har me lendar sheel morshen khatrom, i paash-sheel an yek grotta oun kol vavar paash-sheel an i vavar grotta, oun anom lenge maro oun pani, te nay rhan oun piyenn le?

¹⁴ Oun kanna peneh tou ap mande: Dja oun pen tiro rayeske: Ake, o Eliya! Palle marell lo man!”

¹⁵ O Eliya penas: “Me dau man sovel pash o baro Debleste, ko rayeste pral o bolepen oun i phoub, glan koleste me tardo hom: Kava dives sikrau man me glan o Ahabeste.”

¹⁶ Kote djas o Obadya pash o Ahab oun penas kova leske. Palle djas o Ahab pash o Eliya.

¹⁷ Oun har o Ahab o Eliyas dikas, penas lo ap leste: “Hal tou kova, kay anom o Israel an i bibarht dren?”

¹⁸ Yob penas: “Gar me anom o Israel an i bibarht dren. Kova hal tou oun tiro dadeskro kheer. T'mer moukan i laba o baro Deblestar oun nashan ko debleske palla, kay kharella Baal.

¹⁹ Kanna mouk i tsele Israelitaryen te penell, te venn le khetne pash mande ap i berga Karmel, ninna kol 450 (star-sheel-te-paash-sheel) rashaya o deblestar Baal oun kol star-sheel rashaya, kay i debletsa Ashera sharenn, kolen i Isebel rhapen oun pipen dell.”

²⁰ Kote moukas o Ahab i tsele Israelitaryen oun kol rashayen khetne gole te dell ap i berga Karmel.

²¹ Har yon lauter khetne his, djas o Eliya glan i tsele Israelitaryen oun penas: “Har dour kamenn t'mer gomme ap douy rigya te djan? Hi o baro Devel o čačo Devel, palle nashenn leske pal, te hi o Baal, palle nashenn leske pal!” I menshe penan leske kek lab pale pale.

²² Kote penas o Eliya ap i menshende: “Me kokres hom o baro Debleskro rakepaskro, kay ačas djido. O Baales hi 450 (star-sheel-te-paash) rashayen kay.

²³ Denn men douy gourma! O Baaleskre rashaya mou rodenn penge yek vin, marenn les, činenn les khetne oun čivenn les ap o kasht, te vell lo rhačedo lengro debleske. Yon hounte čivenn kek yag koy pre. Me lau mange ko vavar gouroum, oun krau leha ninna yaake, oun čivau ko mass ap o kasht, oun čivau kek yag koy pre.

²⁴ Palle mou kharenn yon o lab lengro deblestar, oun me kharau o lab o baro Deblestar. Oun yaake hi: Ko devel, kay moukell i yag te vell, kova hi o Devel.” Kote penan i tsele menshe: “Kova hi mishto.”

²⁵ Oun o Eliya penas ap o Baaleskre rashayende: “T'mer han boudeder har me. Rodenn t'menge i gouroum vin oun marenn les oun čivenn les ap o kasht. Oun denn o lab t'maro deblestar an-gole. Ma denn yag tel o mass!”

²⁶ Kote lan yon ko gouroum, hoy dan le len, maran les, činan les khetne oun čivan les ap o kasht, oun kharan o Baales taysarlakro bis mashkral-dives oun penan: “Baal, shoun ap mende!” Kek rakepen vas, kek rakras ap lende. Oun yon khelan troul pengri rhačepaskri, kay yon penge kran.

²⁷ Har mashkral-dives vas, sanas o Eliya pral lende oun penas: “Denn boudeder gole! Yob hi i devel. Nay vell, te dell lo souni, djas ap i rig, djas pral o them. Nay vell, te sovell lo, oun stell pre, te denn t'mer boudeder gole.”

²⁸ Oun yon kharan boudeder. Oun yaake har pash lende kerdo vell, činan le pen pengre rharentsa oun čouryentsa an pengro mass, kay o rat nashas tele.

²⁹ Har o mashkral-dives trouyel djas, his yon bouder gar pash pende, oun khelan bis ap ko tsiro, kay rati o Debleskro rhapen anlo vell. Kek rakepen vas, kek lab, vitar kek sikepen.

³⁰ Kote penas o Eliya ap i tsele menshende: “Avenn kate pash mande!” Oun i menshe van pash leste. Oun yob kras o baro Debleskri rhačepaskri, hoy paash dino his, pale neves,

³¹ las deesh-te-douy barra, yek bar hako čaveske o Yakobestar. Ap koleste penas o baro Devel glan i rah tsiro: “Tiro lab vell kanna Israel.”

³² Oun yob čivas kol barra pre, te krell lo i rhačepaskri o baro Debleske, oun hadas troul koy tseli rhačepaskri i phoub vin, yaake bourhlo, te vitsrans nay douy gone djob dren.

³³ Palle čivas lo ko kasht ap i rhačepaskri, činas ko gouroum an kotya oun čivas len ap ko kasht.

³⁴ Oun penas: “Krenn mange star khore pherdo pani, oun čorenn o pani pral o mass oun o kasht!” Pale penas lo: “Krenn kova i douyto kopo”! Oun yon kran kova i douyto kopo. Oun yob penas: “Krenn kova i triinto kopo!” Pale kran le les o triinto kopo.

³⁵ Yaake djas ko pani troul koy tseli rhačepaskri oun ninna kote, kay lo i phoub vin hadas. Oun lauter vas pherdo pani.

³⁶ Oun har ko tsiro vas, kay rati o Debleskro rhapen anlo vas, djas o Eliya pash koy rhačepaskri oun kharas: “Baro Devel, tou o Devel o Abrahamestar, o Isaakestar oun o Israelestar, kava dives mou vell diklo, kay tou hal o Devel an Israel, oun me hom tiro boudepaskro, oun krom kava tselo koova yaake, har tou mange penal.

³⁷ Shoun man, baro Devel, shoun ap miro rakepen, te hayvenn kalla menshe, kay tou, baro Devel, maro Devel hal, yaake te aness tou lengre djia pale pale pash toute.”

³⁸ Kote peras yag o baro Deblestar tele, oun rhas ko mass oun ko kasht oun kol barra oun koy phoub, oun ninna o tselo pani, hoy troul i rhačepaskri his.

³⁹ Har i tsele menshe kova dikan, peran le ap pengre mouya oun dan gole: “O baro Devel, yob hi o Devel! O baro Devel, yob hi o Devel!”

⁴⁰ Oun o Eliya penas ap lende: “Taprenn kol rashayen o deblestar Baal! Kek te nashell peske!” Oun yon tapran len, oun o Eliya anas len tele pash o pani Kishon oun maras len kote.

⁴¹ Palle penas o Eliya ap o Ahab: “Dja pre, rha oun pi, kote vell i baro brishin!”

⁴² Har djas o Ahab pre, te rhal lo oun te piyell lo, djas o Eliya pral pre ap i berga Karmel, kras pes tiknes ap i phoub oun čivas peskro shero mashkral peskre herya,

⁴³ oun penas ap peskro boudepaskro: “Dja pre oun dik koy, kay hi o baro pani!” Yob djas, dikas oun penas: “Kote hi či!” Oun o Eliya penas: “Dja pale!” Oun o boudepaskro djas oun vas pale, efta kope.

⁴⁴ Pash o eftato kopo penas lo: “Dikau i folka, kote kay o baro pani hi, tikno har i morsheskro vast.” Kote penas o Eliya: “Dja pash o Ahab oun pen leske: Ste ap tiro vourdin oun oule tele an o them, te nay rikrell tout o brishin gar pre!”

⁴⁵ Oun yaake vas: Sik vas o bolepen kalo, i zorelo dourho tradas kale volke pash lende, oun palle vas i baro brishin. Oun o Ahab beshas ap peskro vourdin oun ouleras tele an o foro Yesreel.

⁴⁶ Oun o baro Debleskri zoor vas ap o Eliya, oun yob pandas i pereskri dori troul peskro ripen oun nashas glan o Ahab, bis te van le an o foro Yesreel.