1. Rajengro liil 17 - O Debleskro Lab 2024 (Sinte-Manouche)

O Eliya penell, te vell i bok pral o them

¹ O Eliya dran o gab Tishbe an o them Gilead penas ap o Ahab: “Me penau touke an o lab o baro Deblestar, kay o Israeleskro djido Devel hi, glan koleste hom me tardo: An kol bersha, hoy kanna venna, dell kek brishin, vitar gar djal i sapeno dourho pre dran i phoub, bis te penau me kova.”

² Pal kova penas o baro Devel ap o Eliya:

³ “Dja touke kate krik! Dja kote, kay o kham pre djal, oun khate tout pash o tikno pani Krit, kova, kay nashell an o pani Yordan dren!

⁴ Oun yaake nay piyeh dran o pani. Oun ap i korake penom, te anenn le touke rhapen.”

⁵ Oun yob kras, har o baro Devel leske penas, oun djas ap i vavar rig o panyestar Yordan oun ačas pash o tikno pani Krit.

⁶ Taysarlakro oun rati anan leske i korake maro oun mass, oun dran o pani piyas lo.

⁷ Oun har kek brishin das an o them, vas o tsiro, kote his bouder kek pani an ko tikno pani Krit.

O Eliya djal pash i djouvel, kay lakro rom meras

⁸ Koy penas o baro Devel ap leste:

⁹ “Kre tout ap o drom oun dja an o foro Zarpat, ko hi pash Sidon čiddo, oun ač kote! Me penom kote i djouvyake, kolakro rom meras, te dell li tout rhapen oun pipen.”

¹⁰ Oun yob stas pre oun djas an o foro Zarpat. Oun har vas lo ap o foreskro voudar, dikas lo kote i djouvel, kolakro rom meras. Koya hadas kasht pre. Yob rakras lah oun penas: “Le mange i čaro pani, te piyap!”

¹¹ Har djas li peske, te anell li kova, das lo pal late gole oun penas: “An mange i kotar maro touha!”

¹² Kote penas li: “Pash o baro Debleste, tiro djido Debleste, man hi kek peklo rhapen. Či har i vast pherdo yarro an i piri oun i roy pherdo djet an o khoro hi man. Ake, yek, douy kotya kasht, hoy hadom pre. Kanna djau khere oun krau mange oun miro čaveske i rhapen, te rhas. Oun palle hounte meras.”

¹³ Kote penas o Eliya lake: “Ma traash! Dja koy oun kre, har tou penal! De yak, te kress mange i tikno maro, oun an les mange vin. Oun palle kre o maro touke oun tiro čaveske!

¹⁴ O baro Devel, kay o Israeleskro Devel hi, kova penas: O yarro an i piri vell gar pre rhalo, oun an o khoro ačell doha djet, bis te vell ko dives, kay dell o baro Devel o brishin ap i phoub.”

¹⁵ Kote djas li oun kras yaake har o Eliya lake penas. Oun yob rhas, oun yoy ninna oun lakro čavo boud divessa.

¹⁶ Ko yarro an i piri djas gar vin, oun an o khoro his doha djet, yaake har o baro Devel ap o Eliya penas, oun yob i djouvyake penas.

¹⁷ Oun koy djouvel las les an peskro kheer pre. Pal i tsiro vas ko čavo koy djouvyatar nasselo. Oun leskro nasslepen his yaake zoreles, te ačas bouder kek dourho an leste.

¹⁸ Kote penas yoy ap o Eliya: “Hoske kral tou kova mantsa, Debleskro morsh? Tou val pash mande, te vas miri doosh an o Debleskro shero. Doleske hounte meras miro čavo.”

¹⁹ Yob penas ap late: “De man tiro čaves!” Oun yob las les tele dran lakre moussya, anas les an i pralstouni isema, kay yob djivell, oun čivas les ap o čiben.

²⁰ Palle das lo gole ap o baro Debleste oun penas: “Miro baro Devel, kreh tou čačepah savo čilačepen ap kay djouvyate, kay las man pre an peskro kheer, oun mareh lakro čaves?”

²¹ Oun yob čivas pes triin kope pral o čaveste, oun das pashel gole: “Miro baro Devel, mouk te vell o djipen kava čavestar pale an leste!”

²² Oun o baro Devel shounas ap o Eliya, oun ko djipen vas pale an o čaveste, oun yob vas pale djido.

²³ Kote las o Eliya o čaves oun anas les tele dran i pralstouni isema an o kheer, oun das les leskri dake. Oun o Eliya penas: “Dik, tiro čavo djivella!”

²⁴ Kote penas koy djouvel ap o Eliya: “Kanna djinau, kay tou hal i Debleskro morsh. Oun ko rakepen, hoy tou vin rakreh an o baro Debleskro lab, hi o čačepen.”