1. Rajengro liil 12 - O Debleskro Lab 2024 (Sinte-Manouche)

Dran yek them Israel venn douy themma: Israel oun Youda

^1-2 O Yerobeam, koleskro dad o Nebat his, his an o them Egiptia, kote nashas yob glan o rayeste Salomo. An ko tsiro djas o Roboam an o foro Sichem. Oun i tsele Israelitarya van kote ninna khetne, te čivenn le les pral pende, te vell lo lengro ray. Har kova o Yerobeam shounas, vas lo palpale dran o them Egiptia.

³ Oun i Israelitarya bičran morshen pash o Yerobeam oun kharan les pash pende. Oun yob oun i tsele Israelitarya, hoy khetne van, rakran o Roboameha oun penan:

⁴ “Kova, hoy tiro dad mendar kamas, djas boud kope pral mari zoor. Mouk tou čomone tele mendar, oun de men gar savi phari boudi har tiro dad men das, palle ham mer tire lače boudepangre.”

⁵ Kote pre penas lo ap lende: “Djan oun denn man triin divessa, oun pal kova venn pale glan mande!” Oun i menshe djan penge.

⁶ Kote djas o ray Roboam pash i phoureden; kolla his ninna glan leskro dadeste, o Salomeste, tarde, har yob gomme djivas. Oun o Roboam penas: “Penenn mange t'maro gosvepen, hoy te vell kal menshenge penlo?”

⁷ Kote rakran yon leha oun penan: “Te shouneh tou kava dives ap kal menshende, oun kreh, hoy yon kamenna, oun rakreh lentsa kamle laba, palle hi yon tire boudepangre an hako tsiro.”

⁸ Oun yob das či pre, hoy i phoureder leske penan, oun djas pash i terne morshende, kolla, kay van leha khetne bares, oun kanna leske boudran.

⁹ Oun yob penas ap lende: “Penenn mange t'maro gosvepen, hoy te penas kal menshenge, kay penan mange: Mouk čomone tele mendar! Ma čip sau boudepen ap mende, hoy tiro dad ap mende čivas!”

¹⁰ Oun kol terne morsha, kolla, kay van leha bares, penan leske: “Yaake pen ap kol menshende, kay penan ap toute: Tiro dad čivas i pharo boudepen ap mende. Mouk tou čomone tele mendar! Pen kova ap lende: Miro tikno goushto hi pesseder har miro dadeskri heri.

¹¹ Oun kanna, te čivas miro dad i pharo djipen ap t'mende, me krau t'maro djipen gomme phareder! Miro dad das t'men i čoupniyah. Me dau t'men i čoupniyah, hoy saster pre hi.”

¹² Oun o Yerobeam oun i tsele menshe van pal triin divessa pash o Roboam, har yob les lenge penas: “Avenn pal triin divessa pale pash mande!”

¹³ Oun o baro ray das i menshenge čilače laba pale, oun rakras gar yaake, har i phoureder leske penan.

¹⁴ Na-a, yob rakras lentsa yaake, har i terne morsha kova leske penan. Oun penas: “Te čivas miro dad i pharo djipen ap t'mende, me krau t'maro djipen gomme phareder! Miro dad das t'men i čoupniyah, me dau t'men i čoupniyah, hoy saster pre hi!”

¹⁵ Oun yaake shounas o baro ray gar ap i menshende. Kova kamas o baro Devel yaake, te nay vell leskro lab čačo, hoy lo o Ahia dran Shilo an o mouy čivas, te penell kova les ap o Yerobeam, koleskro dad o Nebat hi.

¹⁶ Har i tsele Israelitarya dikan, kay kamas o baro ray gar ap lende te shounell, dan le gole: “Hoy djal men o David an oun leskri familya! Hoy kran le menge? Mou dikenn le kokres pal lengro kheer! Nashas khere, mer dran Israel!” Kova penan le, oun hakeno djas pash peskro kheer.

¹⁷ Kokres pral i menshende, kay an i forya an o them Youda djivenn, ačas o Roboam o baro ray.

¹⁸ Oun o ray Roboam bičras o pralstounes pral i boudepangren, te djal lo pash i Israelitaryen. Leskro lab his Adoniram. Oun o tselo Israel vitsras barra ap leste, oun yaake meras lo. Koy stas o ray Roboam ap peskro vourdin oun ouleras sik an o foro Yerusalem.

¹⁹ Yaake peras o Israel tele o Davideskre čavendar, oun kova hi yaake bis ap kava dives.

²⁰ Oun har i menshe an Israel shounan, kay o Yerobeam pale pale vas, bičran le morshen pash leste, oun moukan leske te penell, te vell lo ap i tsillo. Oun kote čivan le les pral pende, te vell lo lengro ray, o ray pral Israel. Kokres i menshe dran o kheer Youda rikran ap o Davideskre čavende.

²¹ Oun o Roboam vas an o foro Yerusalem pale oun moukas kol morshen i menshendar Youda oun Benyamin khetne te vell, kay nay kourenn pen. Kolla his 180.000 (sheel-te-orhta-deesh zerya) morsha. Kolentsa kamas lo an o kourepen i Israelentsa te djal, te anenn yon lengro them pale pale pash o Roboam, o Salomeskro čavo.

²² Kote penas o Devel ap o Shemaya, ko Debleskro morsheste:

²³ Pen ap o Roboam, o Salomeskro čavo, o rayeste pral Youda, oun ap i tsele morshende dran Youda oun Benyamin oun ap i vavar menshende:

²⁴ Yaake penell o baro Devel: “Ma djan pre, te kourenn t'men t'mare phralentsa, kol morshentsa an Israel! Djan pale khere, hakeno an peskro kheer. Kava tselo koova vas mandar.” Kote shounan yon ap o lab o baro Deblestar oun djan pale pale, hakeno an peskro kheer, har o baro Devel lenge penas.

²⁵ Oun o Yerobeam čivas o foro Sichem pale pre ap i berge Efrayim oun djivas kote. Palle djas lo kotar vin oun kras o foro Penouel zorleder.

²⁶ Oun o Yerobeam rakras an peskro dji: Te krau či, perell o them pale ap o Davideskre čavende.

²⁷ Te djan i menshe an miro them kote pre, te denn le firhen o baro Debleske an leskro kheer an Yerusalem, nay nashals lengro dji o baro rayeske pral Youda pale. Oun man marans le, oun čivans pale o Roboam pral peste, ko rayeste pral Youda.

²⁸ Oun o ray Yerobeam djinas pash peste, hoy nay krell lo, oun moukas douy sonakangre terne groumyen te krell, oun penas ap i menshende: “T'mer Israelitarya, hi doha, kay djan t'mer yaake rah an Yerusalem, te mangenn o Debles an. Kate hi t'mare debla, kolla anan t'men dran o them Egiptia!”

²⁹ Oun koy yek figura anas lo an o foro Betel oun koy vavar an o foro Dan.

³⁰ Yaake peran i menshe o Debleskro dromestar tele, har djan le an i forya Betel oun Dan, te mangenn le kal sonakangre terne groumyen an.

³¹ O Yerobeam kras ninna moulne platse ap o pralstouno them, kay i moule debla an-mangedo venn, oun rodas rashayen vin, kay gar Levitarya his.

³² Oun yob čivas i baro dives dren an o orhtato čon, ap o deesh-te-pančto dives, te vals ko dives har kol bare divessa an o them Youda. Oun ap i rhačepaskri rhačras lo firhen. Kova kras lo an Betel, kote rhačras lo firhen kol terne groumyenge dran sonakay, hoy lo kras. Oun kote an Betel čivas lo rashayen an pengri boudi dren, te his le rashaya ap kol moulne platse, hoy lo kras, kay mangenn le i moule deblen an.

³³ Ap o 15. (deesh-te-pančto) dives an o orhtato čon – ko čon, hoy yob peske kokres vin rodas, – djas o Yerobeam pash koy rhačepaskri, hoy yob kras an Betel, oun rhačras soungepaskro koova koy pre, te krell lo kote i festo i Israelenge.