1. Rajengro liil 10 - O Debleskro Lab 2024 (Sinte-Manouche)

I rayetsa dran o them Saba vell pash o Salomo

¹ Oun koy rayetsa pral o them Saba shounas, har an-diklo o Salomo vas, oun havo kheer yob o baro Debleske kras. Kote vas li pash leste, te poučell li lestar savo koova, hoy kek vavar djinell.

² Oun yoy vas an o foro Yerusalem. Oun boud lakre boudepangre van lah. Lakre khamele hidjran lačo soungepaskro djet oun boud sonakay oun kouč barra. Oun har yoy pash o Salomo vas, poučas li lestar halauter, hoy lat ap o dji his.

³ Oun o Salomo penas lake i tsele laba pale, hoy poučas li. Oun glan leste his či khatedo, hoy yob nay penals lake gar.

⁴ Oun i rayetsa dran Saba dikas ko baro gosvepen o Salomestar, oun ko kheer hoy yob peske kras,

⁵ oun ko rhapen ap leskri rhapaskri, oun har kol pralstoune ap leskri rhapaskri beshdo his, oun har leskre boudepangre o rhapen oun o pipen anan, oun har yon an-ride his, oun kol firhe, hoy yob moukas te marell oun rhačrell an o kheer o baro Deblestar. Oun lake ačas o rakepen krik,

⁶ oun yoy penas ap o baro rayeste: “Halauter hi čačepen, hoy me an miro them pral toute shounom, kova, hoy tou kral oun har gosevo tou hal.

⁷ Me dom gar boud ap ko rakepen, bis te vom oun mire yaka halauter dikan. Hoy penap kanna? Kova hoy mange penlo vas, hi gar o paash kolestar hoy kate dikau. Tout hi boudeder gosvepen oun bravlepen har shounom.

⁸ Barhtele hi kol menshe troul toute, barhtele tire boudepangre, kay o tselo dives glan toute tardo hi, oun nay shounenn tiro gosvepen.

⁹ Sharedo vell o baro Devel, kay tiro Devel hi, yob, kay dikell lačes ap toute, oun kras te val o ray pral o Israel! O baro Devel kamell peskre menshen Israel an hako tsiro. Doleske čivas lo tout pral lende, te vess lengro ray, te aness o čačepen pash lende, oun hakeno peskro čačepen lell.”

¹⁰ Oun yoy das o baro rayes Salomo 120 (sheel-te-biish) centnarya sonakay, oun boud lačo soungepaskro djet oun boud kouč barra. An kek tsiro bouder vas yaake boud lačo soungepaskro djet an o them, har kova, hoy i rayetsa dran Saba o rayeske Salomo anas.

¹¹ Ninna van shiffe o rayestar Hiram. Kolla anan sonakay dran o foro Ofir oun boud kouč kasht oun kouč barra.

¹² Oun o ray Salomo kras dran ko kasht shoukar činle kashta o baro Debleskro khereske oun peskro khereske, ninna doryengre bashepangre, ap kolende i gipangre bashran. An kek tsiro vas yaake boud kouč kasht an o them; bis ap kava dives vas kek kasht, hoy yaake lačo his, kote pale diklo.

¹³ Oun o ray Salomo das i rayetsa dran Saba halauter, hoy li kamas oun lestar mangas, oun koy pashel, hoy yob pestar lat das. Oun palle djas li pale an lakro them, yoy oun lakre boudepangre.

O Salomeskro bravlepen

¹⁴ Oun ko sonakay, hoy vas o Salomeske anlo an yek bersh, his 666 (shob-sheel-shob-deesh-te-shob) centnarya sonakay.

¹⁵ Koy pashel vas kol love, hoy hounte playsran leske i bikepangre oun i parepangre, kay djan dren oun vin an o them, oun kol love, hoy dan leste i tsele bare raya dran o them Arabia oun vavar themeskre raya.

^16-17 Oun o ray Salomo moukas 200 (douy-sheel) bare shilte te krell oun 300 (triin-sheel) tikneder shilte. Oun moukas lačo sonakay pral lende te čivell. Shob kilogramme sonakay moukas lo ap hako baro shilto pre te čivell, oun yek-te-paash kilogramme ap hako tikno shilto. Oun o baro ray moukas len an peskro kheer te anell, hoy kharell Libanoneskro veesh.

¹⁸ Oun o baro ray Salomo moukas i bari beshepaskri te krell dran kouč parno dand, oun lačo sonakay his pral tserdedo.

¹⁹ Shob stufe his glan i beshepaskri. Pal ap i beshepaskri his i rundo shereskro kotar. Oun čačes oun serves his moussyengre. Pash haki moussyakri his i levo tardo.

²⁰ Oun deesh-te-douy leve his tardo ap kol shob stufe, ap haki stufa čačes oun serves yek levo. An kek vavar them oun kek tsiro vas o baro rayeske savi shoukar beshepaskri kerdo.

²¹ Oun i tsele pipaskre čare o rayestar Salomo his dran sonakay, oun ko tselo koova an o kheer, hoy kharell Libanoneskro veesh, his dran djoudjo sonakay, či his dran roup kerdo. Rup his an i divessa, kay o Salomo o baro ray his, či moldo.

²² Oun o baro rayes his bare shiffe. Kolla djan khetne kol shiffe o rayestar Hiram ap o baro pani. Kalla van yek kopo an triin bersha, oun anan sonakay oun roup, kouč parno dand, oun affe oun raile čirkle.

²³ Oun o ray Salomo his bravleder oun gosveder har i tsele vavar bare raya ap kay phoub.

²⁴ Oun menshe dran i tsele themma ap kay phoub kaman o Salomes te dikenn, te nay shounenn le leskro gosvepen, hoy o Devel leske an o dji čivas.

²⁵ Oun hakeno, kay vas, anas kouč koova pash leste, roupeno oun sonakaskro koova, ripya oun karmangre, soungepaskro djet, graya oun maultikre bourike. Kova his hako bersh yaake.

²⁶ Oun o Salomo moukas peskre tsele vourdya oun klissepangre khetne te vell. Oun kote his les 1.400 (yek sero-te-star-sheel) vourdya oun 12.000 (deesh-te-douy zerya) klissepangre. Kolen moukas lo an kol vourdyengre forya oun pash peste an o foro Yerusalem te anell.

²⁷ Oun o baro ray kras, te his an o foro Yerusalem yaake boud roup har barra. Oun i cedertikre rouka his yaake boud har i divye faygetikre rouka an o telstouno them.

²⁸ Oun o Salomo ginas graya an Egiptia oun an Cilicia, leskre parepangre ginan len oun playsran len kote.

²⁹ Oun yon anan vourdya dran o them Egiptia, yekeske playsran le 600 (shob-sheel) roupene beme. Oun yek grayeske playsran le 150 (sheel-te-paash) roupene beme. Oun palle bikran le lendar doureder ap i rayende pral i Hetarya oun ap i rayende pral o them Syria.