1. Petro 4 - O Debleskro Lab 2024 (Sinte-Manouche)

O phouro djipen oun o nevo djipen

¹ O Yezous Kristo las bare douka ap peste, har yob ap i phoub his. Doleske, ma darenn, te venn ninna douka ap t'mende. Koon an peskro djipen douka hayvas, kova moukell o čilačepen.

² Yaake rah, har kava mensho ap kay phoub hi, krell lo kova, hoy o Devel kamella, oun djivell bouder gar pal peskro shero.

³ I rah tsiro djivan t'mer har kol menshe, kay o Debles gar prindjrenna. T'mer kran vi-ladjedo koova. Oun t'maro dji nashas pal čilačo koova. T'mer piyan t'men mato, rhan t'men nasselo, oun mangan vavar koova an har o Debles. Kova hi čilačo glan o Debleskre yaka.

⁴ Kanna djivenn t'mer bouder gar ko djoungelo djipen har kol čilače. Kova djal kolenge gar an o shero. Doleske čingrenn le ap t'mende.

⁵ Vell i dives, kay venn yon anlo glan o Debleste. Kova rakrell o čačepen vin pral i djidende, ninna pral i moulende. Oun yon hounte penenn o Debleske, hoske yon ko čilačo koova kran.

⁶ Doleske vas ninna i moulenge o lačo lab o Yezous Kristestar penlo, te nay lenn le o Debleskro djipen, ninna te meran le, har i tsele menshe hounte merenn.

Avenn lače boudepangre an o Debleskro kheer!

⁷ Ko tsiro vella sik, kay či ačella, hoy kanna koy hi. Doleske denn garda, har t'mer djivenna, te rikrell t'men či pale, te rakrenn o Debleha!

⁸ Rikrenn khetne an o kamlepen! Kova hi feteder har lauter vavar. O kamlepen čakrell boud čilačepen.

⁹ Lenn yek o vavares kamles an peskro kheer! Oun rhoyrenn t'men gar pral koy boudi, hoy t'men hi!

¹⁰ Hakeno t'mendar las i boudi o Deblestar, te nay krell lo i vavarengro patsepen zoreles. Krenn koy boudi! Avenn yek o vavareske koy! Yaake han t'mer lače boudepangre o Debleske.

¹¹ Das tout o Devel gole, te rakress o Debleskro lab, palle rake o Debleskro lab! Das tout o Devel i zoor, te boudress i patslenge, palle kre kova an o Debleskri zoor! Yaake sharah mer o Debles an halauter, hoy o Yezous Kristo men das. Les hi o raylepen oun i zoor kanna oun hako tsiro. Amen!

Ma darenn!

¹² Kamle mala, t'maro dji vell gar dareno, te venn t'mer zoreles palla lino. Savo koova djal kolenge, kay patsle hi. Kote vell diklo, har t'maro patsepen hi.

¹³ Te venn douka ap t'mende, djinenn: save douka van ninna ap o Yezous Kristeste. Doleske avenn barhtelo! Ap ko dives, kay leskro raylepen diklo vella, givenna oun bashrenna t'mare djia i barhtyatar.

¹⁴ Te praasenn le t'men doleske, kay patsenn t'mer ap o Yezous Kristeste, nay venn t'mer barhtelo. Palle nay djinenn: O Debleskro raylo Dourho hi ap t'mende čiddo.

¹⁵ Kek t'mendar hounte vell i marepaskro, i čorepaskro, i čingepaskro, i phoukepaskro! Kalla menshe lenn i phagi i menshendar oun hounte ladjenn.

¹⁶ Yek, kay patsell ap o Yezous Kristeste oun lell doleske i phagi, kova hounte ladjell gar. Na-a, yob te parkrell pes pash o Debleste, te hi o Yezous Kristo leskro ray.

¹⁷ Kanna vas ko tsiro, kay venna i čilače divessa pral o Debleskre čavende. Pal kova vella bari bibarht pral kolende, kay patsan gar ap o Debleskro lačo lab!

¹⁸ Kolla, kay hi čilačo, oun kamenn o Deblestar či te djinell, kolenge djal boud djoungleder har kolenge, kay kran, hoy o Devel kamas, ninna te vell kolengro djipen ninna phares an ko čilačo tsiro.

¹⁹ Doleske penau t'menge: Te moukell o Devel ap t'mende i pharo tsiro te vell, palle denn t'men tseles an o Debleskro vast, kay das t'men o djipen! Oun moukenn gar tele, te krenn o lačepen!