1. Petro 2 - O Debleskro Lab 2024 (Sinte-Manouche)

T'mer han o Debleskro kheer

¹ Doleske moukenn hako čilačo koova! Ma rhorhenn! Ma rakrenn douy čipyentsa! Ma zilverenn! Rakrenn kek djoungelo koova pral kekeste!

² Har i ternepen pal o thoud gole della, yaake hounte vell t'men bok pal o Debleskro lab. Palle venn t'mer zorelo an o patsepen oun djan mishto ap ko drom kay anell t'men pash o Debleste.

³ T'mer hayvan, har lačo maro ray Yezous hi.

⁴ Avenn pash leste! Yob hi ko djido bar, hoy o Devel vin rodas. O Debleske hi lo o kouč bar, ninna te vitsran les i menshe ap i rig.

⁵ Ninna t'mer han save djide barra. T'mentsa kamell o Devel peskro kheer pre te čivell. Yob rodas t'men vin, te venn t'mer leskre rashaya, oun te venn leske koy. An t'mende das o Yezous Kristo peskro Dourho. Doleske nay sharenn o Debles yaake, har yob kova kamella.

⁶ An o Debleskro lab hi činlo: Me rodom yek kouč bar vin, oun čivom les an o foro Sion tele, yaake te vell miro kheer ap leste zoreles tardo. Oun koon ap koleste patsella, ačell djido.

^7-8 Kava bar hi kouč t'menge, kay patsenna. Kava bar hi gar kouč kolenge, kay gar patsenna. Yon perenn pral kava bar, oun rhoyrenn pen koy pral, yaake har činlo hi an o Debleskro lab: Ko bar, hoy kol boudepangre ap i rig vitsran, kova vas ko bar, ap koleste ko tselo kheer tardo hi; pral ko bar perenn i menshe, oun rhoyrenn pen koy pral. Kolla kay patsenn gar ap o Debleskro lab, perenn pral leste. Yaake hounte djal lenge.

⁹ T'mer han kolla, kay o Devel peske vin rodas. T'maro baro ray hi o Yezous Kristo. Koleskre rashaya han t'mer, te venn leske koy. T'mer han o Debleskre menshe, kolen yob khetne gole das, te penenn t'mer i menshenge, havo baro oun lačo koova o Devel kras. Yob las t'men dran i rati vin, oun anas t'men pash peste, kay hi lauter shoukar oun djoudjo.

¹⁰ Glan i rah tsiro hans t'mer gar leskre menshe. Kanna han t'mer o Debleskre menshe. Glan i rah tsiro djinan t'mer gar, kay hi les i baro dji t'menge. Kanna kras lo peskro dji t'menge pre.

Krenn o lačepen!

¹¹ Kamle mala, t'mer djinenn, kay han gar khere ap kay phoub. Me mangau t'men, avenn zorelo! Te vell o djoungelo koova an t'mare djia pre, palle penenn: “Na-a!” ap kova oun krenn les gar!

¹² T'mer djivenn mank i menshende, kay o Debles gar prindjrenna. Doleske djivenn yaake, te hatsenn le kek čilačepen ap t'mende! Oun kolla, kay rakrenna djoungeles pral t'mende, kolla hounte dikenn o lačo koova ap t'mende, yaake te sharenn le o Debles ap ko dives, kay yob vella.

¹³ Shounenn ap kova, hoy kol pralstoune ap kay phoub penenna! Kova kamell o Devel, maro ray, yaake. Shounenn ap o baro rayeste pral o them!

¹⁴ Shounenn ninna ap i moskre! Kolen das o themeskro ray i boudi, te denn le kolen i phagi, kay kran čilačo koova, oun te sharenn le kolen, kay krenn lačo koova.

¹⁵ O Devel kamell, te krenn t'mer o lačepen. Yaake pandenn t'mer kol dinele menshenge o mouy, kay hayvan gar o čačepen oun rakrenn djoungeles pral t'mende.

¹⁶ T'mer han bouder gar pandlo ap o čilačepen. Doleske penenn gar: “Mer nay krah halauter, hoy kamah.” Oun pal savo rakepen khatrenn t'mer t'maro čilačepen. Ma bistrenn, kay han pandlo ap o Debleste!

¹⁷ Avenn lačes ap hako mensheste! Kamenn i patslen o djiyestar! Sharenn o Debles, oun krenn, hoy yob kamella! Shounenn ap o baro rayeste pral o them!

I lab ap i boudepangre

¹⁸ T'mer boudepangre, shounenn ap t'mare rayende, ap kolende, kay lačo oun kamlo hi oun ninna ap kolende, kay čilačo hi.

¹⁹ Te krenn t'mer, hoy o Devel kamella, oun doleske doukrenn le t'men oun čingrenn ap t'mende, ninna te kran t'mer kek čilačepen, palle sharell t'men o Devel.

²⁰ Te krenn t'mer čilačo koova oun venn doleske dino, hi kova gar mishto, ninna te rikrenn t'mer i douka vin. Te krenn t'mer lačo koova, oun yon doukrenn t'men dran kova, palle sharell t'men o Devel.

²¹ Yob das t'men pash peste gole, te krenn o lačepen, oun te rikrenn i douka vin. Ninna o Yezous Kristo las t'menge douka ap peste. Yob kras kova, te sikrell lo t'menge, har te djan leske palla.

²² Yob kras kek čilačo koova. Oun dran leskro mouy vas kek rhorhepen.

²³ Te čingran le ap leste, čingras yob gar pale. Te dan le les, das lo len gar trad. Na-a, yob čivas pes an o Debleskre vasta. Oun o Devel hi o čačepaskro ray, kay djal pal o čačepen.

²⁴ O čilačepen, hoy mer kram, las o Yezous Kristo ap peste, oun hidjras les ap o troushel. Har yob menge meras, hi kova yaake, har te meram mer leha. Kanna hi o čilačepen an mende moulo. Oun mer djivah nay i lačo oun čačo djipen. Kol douka, hoy o Yezous ap peste las, kran maro djipen sasto.

²⁵ T'mer hans har bakre, kay nashran pen. Kanna anas t'men o Yezous Kristo pale ap o čačo drom. Yob hi t'menge har i bakrengro, oun dell garda ap t'mende.