1. Mose 9 - O Debleskro Lab 2024 (Sinte-Manouche)

O baro Devel dell peskro lab, kay bičrell yob bouder gar savo baro pani pral i phoub

¹ Oun o Devel rakras lače laba pral o Noah oun pral leskre čavende vin oun penas: “Anenn boud čaven ap i phoub, te vell i phoub t'mendar pherdo!

² I tsele firhe ap i phoub oun i tsele čirkle an o bolepen hounte darenn oun trashenn t'mendar. Halauter, hoy djivella ap i phoub, oun i tsele mače an o baro pani, dau an t'mare vasta.

³ Halauter, hoy djivella, dau me t'mende, te rhan kova nashte. Me dau les t'men te rhal, yaake har dom t'men o zenlepen.

⁴ Kokres o mass, kay hi gomme rat dren, kova hounte rhan gar; an o rat hi o djipen.

⁵ Kek hounte lell t'maro djipen. Hakeno koon lell t'maro djipen, kolestar lau me ninna leskro djipen: hako firhestar oun hako menshestar.

⁶ O Devel kras o menshes, yaake har yob hi. Doleske hounte vell kova moulo dino i menshestar, kay i menshes moulo das.

⁷ Anenn čaven ap i phoub, – boud čaven, te vell i phoub t'mendar pherdo!”

⁸ Oun o Devel penas ap o Noah oun ap leskre čavende:

⁹ “Shounenn, me dau t'men miro lab oun dau miro vast koy pre. Ko lab hi t'menge oun t'mare čavenge, kay pal t'mende venna,

¹⁰ oun lauterenge pash t'mende, hoy djido hi, – lauterenge, kay djan vin dran o panyeskro kheer: hake čirkle oun hake firhe ap i phoub, kolla, kay divye hi oun kolla, kay gar divye hi.

¹¹ Kova hi ko lab, kay dau miro vast koy pre: Me anau bouder gar savo baro pani pral i phoub, te tassell hako djipen ap i phoub. Savo baro pani vell bouder gar pral i phoub.”

¹² Oun o Devel penas: “Me dau t'men i sikepen, te djinenn t'mer, ko lab, hoy dom me t'mende oun hake firhende pash t'mende, ninna lauterende, kay venna pal t'mende, ko lab ačella hako tsireske:

¹³ Me čivom miro brishineskro bogo an o bolepen. Te dikenn les, djinenn t'mer, kay vell bouder gar savo baro pani pral i phoub.

¹⁴ Hako kopo, kay dau brishin pral i phoub oun ko brishineskro bogo tardo hi an o bolepen,

¹⁵ vell ko lab an miro shero, hoy me dom t'men oun lauteren, kay djivenna: Me moukau kek pani bouder te vell, hoy yaake baro vell, te tassell o tselo djipen.

¹⁶ Te hi miro brishineskro bogo an o bolepen tardo, dikau les, oun ko lab, hoy dom, vell an miro shero. Ko lab ačell tardo hako tsiro mange oun hakeneske, kay djivella ap i phoub.”

¹⁷ Oun o Devel penas ap o Noah: “Ko brishineskro bogo hi ko sikepen, te rikrau miro lab, hoy me dom hakeneske, hoy ap i phoub djivella.”

O Noah vell mato

¹⁸ Oun o Noaheskre čave, kay djan dran o panyeskro kheer, his o Sem, o Ham oun o Yafet. (O Ham hi kova, kolestar o Kanaan vell.)

¹⁹ Kolla triin hi i čave o Noahestar. Lendar venna i tsele menshe ap i phoub.

²⁰ Oun o Noah his i harho oun čivas drakengre rouka an i phoub.

²¹ Dran i drake kras yob mool, vas lo mato, rivas peskre koola vin oun his nanges an peskri plarhteno kheer čiddo.

²² Oun o Ham, koleskro čavo o Kanaan hi, dikas peskro dades nanges, oun djas vin oun penas kova peskre douy phralenge.

²³ Koy lan o Sem oun o Yafet i ripen oun čivan les pral pengre phika oun djan pengro doumo glan-vi pash pengro dadeste, yaake kay dikan les yon nashte gar. Oun yon čakran les.

²⁴ Har o Noah djangelo vas dran peskro matepen oun shounas, hoy leskro terneder čavo kras, penas yob:

²⁵ “Bibarht ap o Kanaan! Yob vella o telstouno boudepaskro peskre phralenge!”

²⁶ Palle penas yob: “Me sharau o baro Debles, ko Debles kones o Sem an-mangella. Oun o Kanaan vell peskro phraleskro boudepaskro!

²⁷ Mou krell o Devel o Yafeteskro them yaake bourhlo, te djivenn leskre menshe mashkral i menshende, kay venna pal o Sem. Oun o Kanaan vell leskro boudepaskro!”

²⁸ O Noah djivas 350 (triin-sheel-te-paash-sheel) bersha pal o baro pani, hoy vas pral i phoub.

²⁹ Leskro tselo djipen his 950 (enya-sheel-te-paash-sheel) bersha. Oun yob meras.