1. Mose 8 - O Debleskro Lab 2024 (Sinte-Manouche)

O pani djal tele

¹ O Devel bistras o Noah gar, vitar gar i firhen, kay pash leste an o panyeskro kheer his: kol divye firhe oun kolla, kay gar divye hi. Oun o Devel moukas i baro dourho pral i phoub te phourdell. Koy djas o pani tele.

² Kek zorelo pani vas bouder dran i phoub. Oun o bolepen rikras o baro brishin pale.

³ Pal 150 (sheel-te-paash-sheel) divessa djas o pani pale.

⁴ Ap o deesh-te-eftato dives, an o eftato čon ačas o panyeskro kheer ap kol berge Ararat tardo.

⁵ Oun o pani djas doureder pale bis an o deshto čon. Ap o ersto dives an o deshto čon van i berge dran o pani vin – lengre pralstoune kotya.

⁶ Pal 40 (star-deesh) divessa kras o Noah koy vorhni an leskro panyeskro kheer pre,

⁷ oun moukas i korako vin. Kova djas peske, oun vas pale pale, yaake rah bis te his i phoub bouder gar sapeno.

⁸ Oun yob moukas i tauba vin, te dikell lo, te his o pani tele naashedo.

⁹ I tauba hatsas kek platsa, kay nashte beshas pes li tele. His yaake boud pani ap i phoub. Doleske vas yoy an o panyeskro kheer pale. Oun o Noah las koy tauba o vasteha an o panyeskro kheer dren.

¹⁰ Pal efta divessa moukas yob pale i tauba dran o panyeskro kheer vin.

¹¹ Oun i tauba vas pale ap i rati. Oun an lakro mouy his i nevi patri i djeteskro roukestar. Kanna djinas o Noah, te his bouder gar boud pani ap i phoub.

¹² Pal vavar efta divessa bičras yob i tauba pale vin. Oun i tauba vas bouder gar pale.

¹³ Oun ap o ersto dives an o ersto čon ko bershestar, kay o Noah 601 (shob-sheel-te-yek) bersh phouro vas, his bouder kek pani ap i phoub tardo. Oun o Noah las i kotar dran i dacha tele oun dikas, kay i phoub bouder gar sapeno his.

¹⁴ Ap o biish-te-eftato dives an o douyto čon his i tseli phoub trouk.

¹⁵ Oun o Devel penas ap o Noah:

¹⁶ “Kanna dja vin dran o panyeskro kheer, tou oun tiri romni oun tire čave oun lengre romya.

¹⁷ Kol tsele firhe, kay pash toute hi, mouk len vin te djal: i čirkle, i bare firhe, oun i tikne firhe, kay djan pral i phoub. Kamau, te lenn le čave, yaake te vell lendar i phoub pherdo.”

¹⁸ Koy djas o Noah peskre čaventsa oun peskri romyah oun peskre čavengre romyentsa dran o panyeskro kheer vin.

¹⁹ I tsele firhe, i bare oun i tikne, oun i tsele čirkle, halauter, hoy djivell ap i phoub, djas ninna dran o panyeskro kheer. Hako kopo djan kolla khetne, kay his i emlige firhendar.

O Noah parkrell pes pash o baro Debleste

²⁰ Oun o Noah kras i rhačepaskri platsa oun las hake firhendar, kay gar pale-čiddo hi oun hake čirklendar, kay gar pale-čiddo hi. Oun das len moulo oun rhačras len ap koy platsa, te parkrell lo pes pash o baro Debleste.

²¹ Oun o baro Devel soungas ko lačo soungepen oun penas ap peste: “Me dau man sovel, te anau bouder gar havi bari bibarht pral i phoub doleske, hoy i menshe krenna. Djinau, o mensheskro dji hi čilačo foun tiknes pre. Me kamau bouder gar o tselo djipen ap i phoub te marell, yaake har krom.

²² Yaake rah, har i phoub koy hi, vitsrenn le djob ap i phoub oun anenn le pale nevo djob dren. Yaake rah, har i phoub koy hi, ačenna shilapen oun tatepen, niyal oun vend, dives oun rati.”