1. Mose 7 - O Debleskro Lab 2024 (Sinte-Manouche)

O baro pani vella

¹ Oun o baro Devel penas ap o Noah: “Dja an ko panyeskro kheer: tou oun tiri tseli familya. I tsele menshendar ap i phoub hal tou kokres lačo oun čačo glan mande.

² Le firhen touha an o panyeskro kheer: Hake firhendar, kay hi gar pale-čiddo, le efta morshen pengre djouvyentsa! Oun hake pale-čidde firhendar le yek morshes oun peskri djouvel.

³ I čirklendar le ninna efta morshen oun efta djouvyen! Kre kova, te lenn le čave oun merenn gar vin ap i phoub.

⁴ An efta divessa moukau me brishin tele te vell ap i phoub: star-desha divessa oun star-desha rati, yaake te merell ap i phoub o tselo djipen, hoy krom.”

⁵ Oun o Noah kras halauter yaake, har o baro Devel leske penas.

⁶ Oun o Noah his 600 (shob-sheel) bersha phouro, har vas o baro pani pral i phoub.

⁷ Oun o Noah djas an o panyeskro kheer. Khetne leha djan leskre čave, leskri romni oun leskre čavengre romya, te tassenn le gar.

^8-9 Ninna i firhe van pash o Noah an o panyeskro kheer, hakenestar douy: o morsh oun peskri djouvel: i firhendar, kay gar pale-čiddo hi oun kolendar, kay pale-čiddo hi, ninna i čirklendar oun i tsele tikne firhendar ap i phoub, yaake har o Devel leske penas.

¹⁰ Oun pal efta divessa vas o baro pani pral i phoub.

¹¹ Har o Noah 600 (shob-sheel) bersha phouro his, an o douyto čon an ko bersh, ap o deesh-te-eftato dives vas o pani, hoy an i phoub hi, i zoryah vin.

¹² Oun dran o bolepen vas baro zorelo brishin ap i phoub: star-desha divessa oun star-desha rati.

¹³ Ap ko dives djas o Noah peskri romyah oun peskre čaventsa, o Sem, o Ham oun o Yafet, oun kolengre romya an o panyeskro kheer.

¹⁴ Khetne lentsa djan ninna hake firhendar – kolendar, kay divyo hi oun kolendar, kay gar divyo hi, ninna hake tikne firhendar, hoy djan pral i phoub, oun hake čirklendar.

¹⁵ Yon djan pash o Noah an o panyeskro kheer douy hakenestar, hoy djivella: yek morsh oun peskri djouvel,

¹⁶ yaake har o Devel leske penas, te krell lo kova. Oun o baro Devel kras o voudar pandlo pal lende.

¹⁷ Oun o baro pani vas pral i phoub 40 (star-desha) divessa, oun djas pre oun hadas o panyeskro kheer pre oun hidjras les.

¹⁸ Oun o pani vas boud oun boudeder pral i phoub. Oun o panyeskro kheer rikras pes pral o pani.

¹⁹ Oun o pani vas yaake baro ap i phoub, kay his i tsele bare berge tel o pani.

²⁰ O pani ačas tardo efta metarya pral i berge, yaake kay i tsele berge tel o pani his.

²¹ Oun koy meras halauter ap i phoub, hoy djido his: i čirkle oun i firhe, – kolla, kay divyo hi oun kolla, kay gar divyo hi, ninna i tikne firhe, hoy djan pral i phoub, oun i tsele menshe.

²² Halauter meras, hoy ap i phoub djivas.

²³ Yaake vas o tselo djipen ap i phoub tassedo: i menshe, i firhe, i bare oun i tikne, ninna i čirkle. Halauter vas tassedo. O Noah kokres ačas djido oun kolla, kay djan khetne leha an o panyeskro kheer.

²⁴ O pani his tardo ap i phoub 150 (sheel-te-paash-sheel) divessa.