1. Mose 6 - O Debleskro Lab 2024 (Sinte-Manouche)

O mensheskro čilačepen

¹ I menshe van boud oun boudeder ap i phoub. Oun ča van boldo lendar.

² Koy dikan i Debleskre čave, har shoukar i menshengre ča hi. Oun yon lan penge kolen, kay yon kaman, te romedinerenn yon len.

³ Koy penas o baro Devel: “Miro djipaskro dourho ačell gar hako tsiro an o mensheste. Yob hi mass. Yob vell gar phoureder har 120 (sheel-te-biish) bersha.”

⁴ An ko tsiro, har i Debleskre čave khetne van i menshengre čentsa oun lendar čave bolde van, djivan bare menshe ap i phoub. Ninna pal ko tsiro. Kolla his čače morsha an ko phouro tsiro: baro oun an-diklo.

⁵ O baro Devel dikas, kay o menshengro čilačepen baro hi ap i phoub. Halauter, hoy len an lengre djia hi, his čilačo o tselo dives.

⁶ Kova doukas les an leskro dji. Oun o baro Debles khaytas, kay kras yob i menshen ap i phoub.

⁷ Doleske penas o baro Devel: “Me lau i tsele menshen, kay me krom, pale krik i phoubyatar, ninna i firhen, i baren oun i tiknen, oun i čirkle. Khaytell man, kay krom len.”

⁸ O Noah kokres his lačo glan o baro Debleskre yaka.

O Noah krell i panyeskro kheer

⁹ Kova hi ko liil, kay činlo hi pral o Noah peskre čaventsa. O Noah his i morsh, kay lačo oun čačo his. I tsele menshendar an ko tsiro kras yob kokres kek čilačepen. O Noah djivas o Debleha.

¹⁰ Les his triin čave: o Sem, o Ham oun o Yafet.

^11-12 Oun i phoub his bouder gar lačo glan o Debleskre yaka. I menshe kran, kay his i phoub pherdo čilačepen oun midjak koova. Har o Devel ap i phoub dikas, dikas lo, te djan i tsele menshe ap i čilačo drom.

¹³ Doleske penas o Devel ap o Noah: “Kolla, kay djivenn ap i phoub, kran, te vas i phoub pherdo čilačepen oun midjak koova. Kamau gar, te djivenn le doureder. Ava, me krau, te merenn i tsele menshe oun halauter, hoy ap i phoub hi.

¹⁴ Kre touke i panyeskro kheer dran zorelo kasht. Kre boud isema dren. Oun mak vin oun dren teera pre!

¹⁵ Kre ko panyeskro kheer yaake: 150 (sheel-te-panč-desha) metarya lengsto, 25 (biish-te-panč) metarya bourhlo oun 15 (deesh-te-panč) metarya pral.

¹⁶ Kre i dacha! Oun tel i dacha mouk i paash metari pre troul o tselo kheer! Oun kre i voudar ap i rig! Kre ko panyeskro kheer yaake, te venn triin isema yek pral o vavar. Yaake hi les boud isema tella, mashkral oun pral.

¹⁷ Dik! Me moukau i baro pani te vell pral i tseli phoub, te tassenn lauter, kay djipen an lende hi. Halauter merella, hoy ap i phoub djivella.

¹⁸ Tout dau miro lab, kay ačeh djido. Koy dau miro vast pre. Oun tou djas tire čaventsa oun tiri romyah oun tire čavengre romyentsa an o panyeskro kheer dren.

¹⁹ I tsele firhendar, an douy kotar an o panyeskro kheer dren: i morsh oun i djouvel, te ačenn le ninna djido.

²⁰ Douy kotar hake čirklendar oun hake firhendar, ninna hake tikne firhendar ap i phoub, hounte djan pash toute an o panyeskro kheer, te ačenn le djido.

²¹ Le hako firheske peskro rhapen peha oun ninna doha touke oun tire menshenge!”

²² Oun o Noah kras lauter yaake, har o Devel leske penas.