1. Mose 48 - O Debleskro Lab 2024 (Sinte-Manouche)

O Yakob čivell peskre vasta ap o Yosefeskre čavende

¹ Pal i tsiro vas o Yosefeske penlo: “Tiro dad hi nasselo.” Koy las o Yosef peskre douy čaven, o Efrayim oun o Manasse, oun yon djan pash leste.

² Oun o Yakobeske vas penlo: “Tiro čavo o Yosef vell pash toute.” Koy las o Israel peskri tseli zoor khetne oun beshas pes an o čiben pre.

³ Oun o Yakob penas ap o Yosefeste: “O zorelo Devel moukas pes mandar te dikell an o foro Louz an o them Kanaan. Oun yob rakras lače laba ap mande oun penas:

⁴ Čačepah, me dau tout boud čaven, te venn toutar yaake boud menshe, te venn le boud natsyone. Oun kava them dau me tout oun tire menshende, te vell kova t'maro hako tsireske.”

⁵ Oun o Yakob penas doureder ap o Yosefeste: “Kanna shoun, tire douy čave, kay bolde van glan ko tsiro, kay vom pash toute an o them Egiptia, – o Efrayim oun o Manasse – kamau te venn yon mire, yaake har o Ruben oun o Simeon.

⁶ Te leh tou vavar čave, hi kolla tire. Yon lenn pengro kotar them an o them pengre phralendar, pash o Efrayim oun o Manasse.

⁷ Me krau kova miri romyake Rachel, kay hi tiri day. Yoy meras an o them Kanaan, har vom dran Paddan. Homs ap o drom, i tikno kotar glan o foro Efrata. Oun me paskrom lat kote pash o drom, hoy djal an Efrata. Kova hi kanna Betlehem.”

⁸ Har o Israel o Yosefeskre čaven dikas, poučas yob: “Koon hi kalla?”

⁹ Oun o Yosef penas peskro dadeske: “Kolla hi mire čave, kay o Devel das man kay.” “An len pash mande”, penas o Yakob, “te rakrap o Debleskri barht pral lende vin.”

¹⁰ O Israeleskre yaka hi bouder gar mishto. Yob his phouro oun dikas nay bouder gar. Doleske anas o Yosef kol čaven pash leste. Oun yob tapras len trouyel oun das hakenes i čoum.

¹¹ Oun o Israel penas ap o Yosefeste: “Patsom gar, te dikap tout pale. Oun ake, o Devel kamas te dikap ninna tire čaven.”

¹² Oun o Yosef las len lestar krik oun vitsras pes glan leste tele, peskro mouy ap i phoub.

¹³ Oun o Yosef las kol douyen: Peskro čaves Efrayim las yob ap peskro čačo vast oun anas les glan o Israeleskro servo vast. Oun peskro čaves Manasse las yob ap peskro servo vast oun anas les glan o Israeleskro čačo vast.

¹⁴ Oun o Israel čivas peskri yek moussi pral o vavar oun čivas peskro čačo vast ap o Efrayimeskro shero. Kova his ko terneder. Oun peskro servo vast čivas lo ap o Manasseskro shero. Kova his o phoureder.

¹⁵ Oun yob rakras o Debleskri barht vin pral o Yosefeste oun penas: Ko Devel, kay djas miro papo Abraham oun miro dad Isaak ap leskro drom, ko Devel, kay das garda ap mande bis kava dives, har dell garda i bakrengro ap peskre bakre,

¹⁶ ko bolepaskro, kay las man vin dran hako čilačepen, kova mou čivell peskri barht oun zoor ap kol čavende, te djivell miro lab doureder an lende, ninna o lab miro papestar Abraham oun miro dadestar Isaak. Oun lendar venna boud menshe ap i phoub.

¹⁷ Har o Yosef dikas, kay leskro dad čivas peskro čačo vast ap o Efrayimeskro shero, his leske kova gar mishto. Oun yob tapras peskro dadeskro vast, te čivell lo les ap o Manasseskro shero.

¹⁸ Oun o Yosef penas ap peskro dadeste: “Kre gar yaake, tata! Kava hi o phoureder. Čip tiro čačo vast ap leskro shero!”

¹⁹ Leskro dad kamas gar oun penas: “Me djinau, čava, me djinau. Ninna kolestar venna yaake boud menshe, te vell lendar yek natsyona. Leskro terneder phraal vell bareder har yob. Lestar venna yaake boud menshe, te venn lendar boud natsyone.”

²⁰ Yaake rakras o Israel ap ko dives o Debleskri barht vin pral kol čavende oun penas: “T'mare labentsa sharenn pen i menshe an Israel. Yon penenna: O Devel mou krell tout har o Efrayim oun o Manasse!” Yaake čivas o Israel o Efrayimes glan o Manasse.

²¹ Oun o Israel penas ap o Yosefeste: “Me merau. O Devel hi pash t'mende oun anell t'men pale an t'maro dadengro them.

²² Me dau toute oun gar tire phralende ko kotar them Sichem, hoy lom miro rhareha oun miro bogo dran o vast foun i Amorarya.”