1. Mose 47 - O Debleskro Lab 2024 (Sinte-Manouche)

O Yakob glan o baro rayeste

¹ Oun o Yosef djas pash o baro rayeste oun penas ap leste: “Miro dad oun mire phrala pengre bakrentsa oun pengre groumyentsa oun halauter, hoy len hi, van dran o them Kanaan oun hi kanna an o them Gosen.”

² Oun o Yosef rodas panč peskre phralendar vin oun anas len glan o baro ray.

³ Oun o baro ray poučas lendar: “Hoy krenn t'mer?” Oun yon penan ap leste: “Miro ray, mer ham bakrengre yaake har mare phoure.”

⁴ Oun yon penan ninna: “I bok hi baro an o them Kanaan. Hi kek zenlepen rhapaske mare bakrenge. Doleske vam mer, te ačas i tsiro kay. Kanna mangah tout, miro ray, mouk men te djivell an o them Gosen.”

⁵ Koy penas o baro ray ap o Yosefeste: “Tiro dad oun tire phrala van pash toute.

⁶ O them Egiptia hi ninna touke koy. Rode tiro dadeske oun tire phralenge o feteder kotar them vin, te djivenn le kote! Mouk len te djivell an o them Gosen! Oun te dikeh, kay hi morsha mank lende, kay krenn pengri boudi mishto, kre te venn le pralstoune pral mire firhende.”

⁷ O Yosef anas peskro dades, o Yakobes, glan o baro rayeste. Oun o Yakob penas ap leste: “Lačo dives! Mou dell tout o Devel peskri zoor oun barht!”

⁸ Oun o baro ray poučas lestar: “Har phouro hal tou?”

⁹ Penas o Yakob: “Hom 130 (sheel-te-triyanda) bersh phouro. Kova hi kek phourepen. Man hi kek shoukar djipen. Mire phoure van phoureder har me.”

¹⁰ Oun o Yakob penas ap o baro rayeste: “Ač mo Debleha!” oun djas lestar.

¹¹ Oun o Yosef sikras peskro dadeste oun peskre phralende, kay yon djivenn nay. Oun das len o feteder kotar them, hoy an o them Egiptia his, ko them Ramses, yaake har o baro ray penas.

¹² Ninna maro das yob peskro dadeste oun peskre phralende lengre familyentsa, yaake boud, kay hakenes doha his.

O Yosef ginell i menshen oun lengro them o baro rayeske

¹³ Oun i bok vas baro an o them Egiptia oun Kanaan, yaake kay bouder či rhapaske his an i tsele themma. Oun i menshe oun i firhe merans i bokatar.

¹⁴ Oun o Yosef anas i tsele love khetne, kay i menshe an o them Egiptia oun an o them Kanaan playsran o rhapaske. Oun anas kol love an o baro rayeskro kheer.

¹⁵ Har bouder kek love his an o them Egiptia oun an o them Kanaan, van i tsele Egiptarya pash o Yosefeste oun penan: “De men rhapaske! Hoske meras mer glan tire yaka? Men hi bouder kek love.”

¹⁶ Koy penas o Yosef ap lende: “Te hi t'men bouder kek love, anenn t'mare firhe! Oun me dau t'men te rhal.”

¹⁷ Yaake anan le pengre firhen pash o Yosefeste. Oun yob das len rhapaske lengre grayenge, lengre bakre, groumya oun bourike an ko tselo bersh.

¹⁸ O vavar bersh van le pale pash leste oun penan ap leste: “Miro ray, mer dam tout mare love oun mare firhen. Men hi bouder či, hoy mer tout nay dah. Kanna le men oun maro them!

¹⁹ Mouk men gar nashedo te djal, men oun maro them! Gin men oun maro them oun de men te rhal! Mer kamah o baro rayeske te boudrell. Oun maro them dah leste. De men djob, te djivas oun meras gar! Oun de men djob, te čivras kova an i phoub, te vell dran maro them kek moulo them!”

²⁰ Oun o Yosef ginas o tselo them Egiptia o baro rayeske. I bok his yaake baro, kay bikras hako Egiptari peskro kotar phoub. Yaake vas o tselo them an o baro rayeskre vasta.

²¹ Oun o Yosef ginas i menshen an o tselo them Egiptia – foun yek rig o themestar ap i vavar rig, te venn le boudepangre o baro rayeske.

²² O them i rashayendar ginas yob gar. I rashayen his doha love te ginenn le penge rhapen. Yon van playsedo o baro rayestar. Doleske bikran yon pengro them gar.

²³ Oun o Yosef penas ap i menshende: “Kava dives ginom t'men oun t'maro them o baro rayeske. Ake, kava djob čivrenn nay an i phoub.

²⁴ Oun te hi t'men nevo djob, denn o pančto kotar o baro rayeste! Kol vavar star kotya mou ačenn t'menge, yaake te hi t'men doha, kay nay vitsrenn an i phoub. Ninna hi t'men rhapaske t'menge oun t'mare čavenge, oun kolenge, kay djivenn an t'mare khera.”

²⁵ Penan yon: “Tou kral, kay meram gar. Ab menge lačo oun le men, te vas mer boudepangre o baro rayeske!”

²⁶ Yaake rakras o Yosef i lab, hoy hounte rikrenn le: I tsele menshen an o them Egiptia hounte denn o pančto kotar o baro rayeste. O rashayengro them las o baro ray gar. Yaake hi kova gomme kava dives.

²⁷ Oun i Israelitarya djivan an o them Egiptia, an o them Gosen, lan boud čave oun van boud boud menshe.

²⁸ Oun o Yakob djivas an o them Egiptia 17 (deesh-te-efta) bersha. Oun yob vas 147 (sheel-te-star-deesh-te-efta) bersha phouro.

²⁹ Har ko tsiro vas, kay merell lo, kharas yob peskro čaves, o Yosef, oun penas ap leste: “Ab mange lačo, de tiro vast koy pre, kay rikreh tiro lab: Paske man gar an o them Egiptia!

³⁰ Te hom moulo, an man dran o them Egiptia oun paske man an o moulengro kheer mire menshendar!” “Me krau, har tou peneh”, penas o Yosef.

³¹ “De tout sovel!” penas o Yakob. Oun yob das pes sovel. Oun o Israel parkras pes glan leste ap peskro čiben.