1. Mose 44 - O Debleskro Lab 2024 (Sinte-Manouche)

O Yosefeskro khoro vell čoredo

¹ Oun yob penas ap koleste, kay ap leskro kheer garda das: “Kre i gone kol morshendar pherdo djob, yaake boud har dren djala. Oun čip hakeneskre love pral an lengre gone!

² Oun miro roupeno khoro čip khetne lengre loventsa pral an o gono ko terneder morshestar!” Oun ko rom kras, har o Yosef leske penas.

³ Taysarlakro djan i morsha pengre bourikentsa penge.

⁴ Har yon gar dour glan o foro his, penas o Yosef ap koleste, kay ap leskro kheer garda das: “Le sik kol morshen palla! Te tapreh len, pen ap lende: Hoske kran t'mer čilačo koova ap miro rayeste? Yob his lačo ap t'mende.

⁵ T'mer čoran miro rayeskro roupeno khoro, dran koleste yob piyell oun dourkrell. Hi gar mishto, hoy kran!”

⁶ Oun ko pralstouno pral o Yosefeskro kheer las len palla, tapras len oun penas kal laba ap lende.

⁷ Kolla penan ap leste: “Hoske rakrell miro ray save laba? Savo koova kram mer gar.

⁸ Kol love, hoy hatsam pral an mare gone, anam touke pale dran o them Kanaan. Hoske čorams dran tiro rayeskro kheer roup oun sonakay?

⁹ Miro ray, tou te hatseh ko khoro pash yekeste mendar, nay deh les moulo! Oun mer vavar vah tire boudepangre.”

¹⁰ “Mishto”, penas yob. “Mer krah yaake, har penan. Kova vell miro boudepaskro, kay hatsau o khoro pash leste. T'mer vavar nay djana.”

¹¹ Koy las hakeno sik peskro gono tele ap i phoub oun kras les pre.

¹² Oun yob rodas an o gono hakenestar: pash o phoureder bis pash o terneder. Oun yob hatsas o khoro an o Benyamineskro gono.

¹³ Koy kran le pengre koola an kotya i doukatar. Oun hadan pengre gone pale ap i bourike oun djan pale an o foro.

¹⁴ Oun o Youda djas peskre phralentsa an o Yosefeskro kheer. O Yosef his gomme koy. Oun yon vitsran pen glan leste ap i phoub.

¹⁵ Oun o Yosef penas ap lende: “Havo čilačo koova kran t'mer? Djinenn gar, kay i rom har man, dourkrell nay?”

¹⁶ Penas o Youda ap leste: “Hoy penas mer touke, miro ray? Har nay sikrah, kay hi men kek doosh an kava koova? O Devel dell men i phagi. Miro ray, mer ham kanna tire boudepangre: mer oun kova, kay hatsan o khoro pash leste.”

¹⁷ Penas o Yosef: “Savo koova krau gar. Ko rom, kay hatsan o khoro pash leste, hounte vell miro boudepaskro. T'mer vavar nay djan an o lačepen khere pash t'maro dadeste.”

¹⁸ Koy vas o Youda glan oun penas ap leste: “Mangau tout, miro ray, mouk man touha te rakrell! Ab gar rhoyedo ap mande, miro ray! Tou hal yaake baro har o baro ray pral o them Egiptia.

¹⁹ Tou, miro ray, poučal mendar, har hams o vavar kopo kay: Hi t'men i dad, ninna i vavar phraal?

²⁰ Oun mer penam ap toute, miro ray: Men hi i phouro dad oun i terno phraal, kay boldo vas, har maro dad phouro his. Leskro phraal hi moulo. Oun yob kokres ačas pral peskri datar. Oun leskro dad kamell les i djiyestar.

²¹ Oun tou, miro ray, penal ap mende: Anenn les pash mande, te dikap les!

²² Oun mer penam ap toute, miro ray: Ko čavo moukell nay gar peskro dades. Moukell yob les, merell leskro dad.

²³ Koy penal tou, miro ray, ap mende: Te vell gar t'maro terneder phraal t'mentsa, kamau te dikap t'men gar pale.

²⁴ Har vam khere pash maro dadeste, penam leske tire laba, miro ray.

²⁵ Har maro dad penas Djan, ginenn menge rhapaske, penam mer:

²⁶ Te vell maro terneder phraal gar mentsa, nay djah gar. Te hi yob gar pash mende, nay vah gar glan ko romeskre yaka.

²⁷ Oun miro dad, penas ap mende: Djinenn, kay miri romni anas mange douy čaven ap i phoub.

²⁸ Ko yek djas peske mandar oun me penom mange: I divyo firho maras les. Oun me dikom les bouder gar pale bis kanna.

²⁹ Me hom i phouro rom. Te lenn t'mer ninna o douytes mandar oun te taprels les i bibarht, merau me i doukatar.

³⁰ Oun kanna, miro ray, te vau me pale pash miro dadeste, oun yob dikell, kay o čavo gar pash mande hi, merell yob i doukatar.

³¹ Leskro dji hi pandlo ap ko čaveste. Man vals doosh, te merals maro phouro dad i doukatar.

³² Miro ray, me dom miro vast koy pre, kay anau o čaves pale. Me penom ap miro dadeste: Te anau les touke gar pale, vell i doosh ap mande oun ačell ap mande, yaake rah har djivau!

³³ Doleske, mouk man te vap tiro boudepaskro, miro ray! Mouk kol čaves te djal peskre phralentsa!

³⁴ Me nay djau gar pash miro dadeste, te hi ko čavo gar pash mande. Me nay dikoms gar koy douk, hoy vell ap miro dadeste, te hi ko čavo gar pashel!”