1. Mose 43 - O Debleskro Lab 2024 (Sinte-Manouche)

O Yosefeskre phrala venna i douyto kopo an o them Egiptia

¹ Oun i bok his baro an o them.

² Har yon o tselo djob pre rhan, hoy lan yon dran o them Egiptia, penas o Yakob ap peskre čavende: “Djan pale an o them Egiptia oun ginenn menge boudeder djob!”

³ Koy penas o Youda ap leste: “Ko rom penas zoreles ap mende: Te hi t'maro phraal gar pash t'mende, dikenn t'mer man bouder gar.

⁴ Te bičreh maro phrales mentsa, djah mer kote te ginas touke rhapaske.

⁵ Te bičreh les gar mentsa, djah mer gar. O rom penas ap mende: T'mer dikenn man gar pale, te hi t'maro phraal gar pash t'mende.”

⁶ Koy penas o Yakob, koleskro lab hi ninna Israel: “Hoske anenn t'mer havi douk ap mande oun penan ko romeske, kay hi t'men i vavar phraal?”

⁷ Penan yon: “Ko rom poučas men vin pral mende oun pral mari familya. Yob poučas: Djivell t'maro dad? Hi t'men i vavar phraal? Yaake penam, hoy yob kamas te djinell. Djinam gar, kay yob penell: Anenn t'maro phrales kay!”

⁸ Oun o Youda penas ap peskro dadeste Israel: “Biče ko čaves mantsa! Oun mer nay djah kanna, te djivas oun meras gar i bokatar – tou oun mer oun mare čave!

⁹ Me dau miro vast koy pre, kay anau les pale. Te anau les touke gar pale, vell i doosh ap mande oun ačell ap mande, yaake rah har djivau!

¹⁰ Čačepah, te ačams gar yaake rah kate, vams kanna o douyto kopo pale.”

¹¹ Oun o Israel, lengro dad, penas ap lende: “Te djal gar vavarčandes, krenn kova: Lenn o feteder dran maro them oun anenn les ko romeste: kouč roukengro djet oun gvin, khorya oun mandle.

¹² Lenn douy kope yaake boud love peha har o ersto kopo. T'mer hounte denn kol love pale, kay hatsan an t'mare gone. Nashte vell yekeskri doosh, hoy yob gar djinas.

¹³ Lenn t'maro phrales oun krenn t'men ap o drom! Djan pale pash o romeste!

¹⁴ Oun o zorelo Devel mou krell, te vell o rom t'menge lačo, yaake kay moukell lo t'maro vavar phrales oun o Benyamines t'mentsa pale te djal. Me krau nay či. Nashrau mire čaven, nashrau len!”

¹⁵ Kanna lan i morsha ko kouč koova, hoy anenn le o romeske. Oun lan ninna douy kope love oun o Benyamines pentsa oun kran pen ap o drom, te djan le an o them Egiptia. Oun yon van glan o Yosefeste.

¹⁶ Har o Yosef dikas o Benyamines pash lende, penas lo ap koleste, kay ap leskro kheer garda das: “An kol morshen an o kheer! Marenn firhen oun krenn i rhapen! Kol morsha rhan kava dives mantsa.”

¹⁷ Oun o rom kras yaake, har o Yosef penas oun anas i morshen an o Yosefeskro kheer.

¹⁸ Har yon dikan, kay van le an o Yosefeskro kheer anlo, vas len daar. Oun yek penas ap o vavareste: “Kol love, hoy an mare gone his o vavar kopo, hi, hoske vah kanna kate anlo. I Egiptarya kamenn mare bourike te lell oun men te taprell, te boudras lenge.”

¹⁹ Oun yon djan pash koleste, kay ap o Yosefeskro kheer garda das, oun rakran leha glan o voudar.

²⁰ “Miro ray”, penan le. “Mer vam kate o vavar kopo te ginas djob.

²¹ Har mer pale djam, kram mare gone pre kote, kay ačam pral i rati. Oun hakeno mendar hatsas peskre love an o gono, yaake boud, har playsram. Kanna anam mer kal love pale pale.

²² Vavar love anam ninna mentsa, te ginas djob. Mer djinah gar, koon čivas mare love an mare gone.”

²³ “Hi mishto”, penas ko rom. “Ma darenn! T'maro Devel, kay ninna t'maro dadeskro Devel hi, čivas kol love an t'mare gone. Me lom t'mare love, hoy dan man.” Oun yob anas o Simeones pash lende.

²⁴ Oun ko rom anas len an o Yosefeskro kheer oun das len pani, te thovenn le pengre herya, oun das lengre bouriken te rhal.

²⁵ Oun yon lan ko kouč koova, hoy anan le peha, oun čivan les yaake, te denn le les o Yosefeste. Yon shounan, te vell yob ap o paash dives oun te rhan yon leha.

²⁶ Har o Yosef khere vas, anan le ko kouč koova an o kheer. Oun vitsran pen glan leste ap i phoub.

²⁷ Oun yob poučas lendar: “Har djal t'menge? Djal t'maro phouro dadeske mishto, kolestar rakran? Hi lo djido?”

²⁸ Penan le: “Miro ray, maro dadeske djal mishto. Yob hi djido.” Oun yon vitsran pen ap i phoub glan leste.

²⁹ Oun yob dikas pes trouyel oun dikas peskro phrales Benyamin, ko čaves peskri datar, oun poučas: “Hi kova t'maro terneder phraal, kolestar rakran?” Oun ap leste penas lo: “O Devel mou dell tout lačepen, miro čavo.”

³⁰ Har o Yosef peskro phrales dikas, his leske ropaske. Oun yob djas sik an peskri isema oun rovas koy.

³¹ Pal kova thovas lo peskre yaka, djas vin oun las pes khetne oun penas: “Anenn o rhapen!”

³² Oun yon anan o Yosefeske o rhapen ap i vavar rhapaskri har peskre phralenge. Ninna i Egiptarya, kay leha rhan, rhan ap i vavar rhapaskri. I Egiptarya rhan gar khetne kolentsa, kay kharenn Hebrearya. Kolla hi lenge pale-čiddo.

³³ O Yosefeskre phrala van glan leste vergel beshdo, pal lengro phourepen: o phoureder, o douyto, o triinto bis pash o terneder. Koy dikan le bare yakentsa yek ap o vavareste.

³⁴ O Yosef moukas leskro rhapastar peskre phralenge te anell. Oun ko rhapen, hoy moukas yob o Benyamineske te anell, his panč kope yaake boud, har o rhapen leskre vavar phralenge. Oun yon rhan oun piyan oun van barhtelo leha.