1. Mose 40 - O Debleskro Lab 2024 (Sinte-Manouche)

Douy pralstoune boudepangre denn souni

¹ Pal ko tsiro anan douy pralstoune boudepangre an o baro rayeskro kheer doosh ap pende. Kol douy his i pralstoune pral o pipen oun o pral o maro.

² Oun o baro ray vas an i bari rholi pral kol douyende,

³ oun čivas len stildo an ko kheer o pralstunestar i lourdendar. An ko stilepen his ninna o Yosef.

⁴ Oun ko pralstouno lourdo bičras lenge o Yosefes, te vell yob lenge koy. Oun yon his i tsiro an o stilepen.

⁵ Yek rati dan kol douy souni, o pralstouno pral o pipen oun o pralstouno pral o maro. Hakeno das souni. Oun koy souni kamas lenge čomone te penell.

⁶ Taysarlakro vas o Yosef pash lende oun dikas, kay djal lenge gar mishto.

⁷ Koy poučas yob kol douyendar: “Hoske djal t'menge gar mishto?”

⁸ Penan yon ap leste: “Mer dam souni. Oun kek hi koy, kay penell nashte, hoy mare sounya menge penenna.” Penas o Yosef ap lende: “O Devel penell nay, hoy kol sounya penenna. Penenn t'mare sounya mange!”

⁹ Koy penas o pralstouno pral o pipen peskri souni o Yosefeske oun penas: “An miri souni dikom i drakengro rouk glan mande tardo.

¹⁰ Ap ko drakengro rouk his triin kashta. Kolla van zenelo oun lan bloume. Oun yaake sik har bloume koy his, djan le pre oun drake van baro ap lende.

¹¹ Man his o baro rayeskro khoro an miro vast, čivom i mool dran kol drake an o baro rayeskro khoro, oun dom les o baro rayeste te piyell.”

¹² Oun o Yosef penas ap leste: Kay souni penella: “Kol triin drakengre kashta hi triin divessa.

¹³ An triin divessa moukell tout o baro ray dran o stilepen vin oun dell tout pale tiri boudi. Oun tou deh o baro rayeste pale te piyell, yaake har tou kral, har tou o pralstouno pral leskro pipen hals.”

¹⁴ O Yosef penas doureder: “Te djal touke mishto, biste man gar! Rake mange lačo pash o baro rayeste! Oun an man dran kava kheer vin!

¹⁵ Hom čoredo dran o them, kay djivenn i Hebrearya. Oun kate krom me vitar či, kay hounte djap an o stilepen.”

¹⁶ Har o pralstouno pral o maro dikas, kay kova lačo his, hoy ko vavar souni das, penas yob ap o Yosefeste: “Me dom ninna souni: Ap miro shero his triin čare pherdo mare.

¹⁷ An o pralstouno kashteno čaro his lauter lačo peklo koova o baro rayeske. Oun čirkle van oun rhan lauter dran o čaro ap miro shero krik.”

¹⁸ Penas o Yosef: “Kay souni penell menge: Kol triin čare hi triin divessa.

¹⁹ An triin divessa moukell tout o baro ray dran o stilepen vin oun bladell tout ap i kasht. Oun i čirkle rhan tiro mass toutar krik.”

²⁰ Ap o triinto dives his o dives, kay vas o baro ray i bersh phoureder. Oun yob kras i baro rhapen kol tsele pralstunenge, kay leske boudran, oun moukas kol douyen, ko pralstounes pral o pipen oun o pralstounes pral o maro, dran o stilepen vin.

²¹ Oun yob das o pralstounes pral o pipen pale leskri boudi, te dell yob o baro rayes pale te piyell.

²² Oun o pralstounes pral o maro moukas yob te bladell ap i kasht, yaake har o Yosef lenge glan-vi penas.

²³ Oun o pralstouno pral o pipen bistras o Yosefes. Oun yob vas leske bouder gar an o shero.