1. Mose 38 - O Debleskro Lab 2024 (Sinte-Manouche)

O Youda oun i Tamar

¹ Ap ko tsiro moukas o Youda peskre phralen oun djas tele pash i romeste dran Adullam. Leskro lab his Hira.

² Kote dikas o Youda yek čat i morshestar, kay kharas Shoua. Kova his i Kanaanitari. Oun o Youda romedineras lat oun vas lah khetne.

³ Oun yoy vas an vavar koova oun anas i čaves ap i phoub. Oun yob das les ko lab Er.

⁴ Oun yoy vas pale an vavar koova oun anas i čaves ap i phoub. Oun yoy das les o lab Onan.

⁵ Oun pale anas yoy i čaves ap i phoub. Oun yoy das les o lab Shela. Ap ko tsiro, har ko čavo boldo vas, his o Youda an o foro Kesib.

⁶ Oun o Youda das peskro phoureder čaveste, o Er, i romyat. Lakro lab his Tamar.

⁷ Oun o Er his čilačo an o baro Debleskre yaka. Oun o baro Devel moukas les te merell.

⁸ Koy penas o Youda ap o Onan: “Ab khetne koy romyah tiro phralestar, te vell tiro phrales i čavo, har pash mende kova yaake hi.”

⁹ O Onan djinas, kay kol čave gar leskre hi. Doleske kras yob yaake, kay peskro phraleskri romni gar an vavar koova vella, hako kopo har vas lo lah khetne. Yob kamas gar, te vell i čavo leskro phraleske boldo.

¹⁰ Oun kova, hoy yob kras, his čilačo an o baro Debleskre yaka. Oun yob moukas les ninna te merell.

¹¹ Koy penas o Youda ap i Tamar, peskro čaveskri romyate: “Ač kokres an tiro dadeskro kheer, yaake rah bis te miro čavo, o Shela, baro vas.” O Youda penas peske: Te merell yob gar har leskre phrala! Oun i Tamar djas peske oun ačas pash peskro dadeste.

¹² Pal i rah tsiro meras i romni o Youdaestar, kolakro dad o Shoua hi. Oun har o tsiro o ropaske trouyel his, djas o Youda an o foro Timna pash peskre boudepangre, kay činenn i bal i bakrendar. Leskro maal, o Hira dran Adullam, djas leha.

¹³ Oun vas penlo ap i Tamar: “Ake, tiro romeskro dad djal an o foro Timna, te činell yob i bal peskre bakrendar.”

¹⁴ Yoy djinas, kay o Shela baro vas, oun kay yoy leste gar dino vas, te vell li leskri romni. Doleske rivas yoy kanna kol ripya vin, hoy i romni hidjrella, kolakro rom moulo hi. Oun čivas i diklo pral peskro mouy, yaake kay dikan le nay gar lakro mouy. Oun beshas pes pash o baro voudar glan o foro Enayim. Kova hi čiddo ap o drom an o foro Timna.

¹⁵ Oun o Youda dikas lat oun patsas, kay yoy i loubni hi. Yoy his pash o drom beshdo oun lat his i diklo glan o mouy.

¹⁶ Oun yob djas ap i rig pash late oun penas: “Mouk man pash toute te vell!” Yob djinas gar, kay yoy leskro čaveskri romni hi. Oun yoy penas: “Hoy deh man, te veh mantsa khetne?”

¹⁷ Penas yob: “Bičrau touke i terni bouzni – i morsh.” “De man čomone”, penas yoy, “hoy me nay rikrau, bis te man koy bouzni deh.”

¹⁸ “Hoy dap tout?” poučas yob. Koy penas yoy: “Tiri goustri tiro labeha, oun koy dori, kay i goustri pandlo hi, ninna tiro kasht, hoy an tiro vast hi.” Oun yob das kova late oun djas lah khetne. Oun yoy vas lestar an vavar koova.

¹⁹ Oun yoy djas khere oun las peskro diklo tele. Oun rivas kol ripya ap peste, kay i romni hidjrella, kolakro rom moulo hi.

²⁰ Oun o Youda bičras peskro males, ko Adullamari pash late, oun das les i terni bouzni peha lake, te lell yob kova latar pale, hoy o Youda lat das. Oun yob hatsas lat gar.

²¹ Koy poučas yob i menshendar ko forestar: “Kay hi koy loubni, kay pash o foro Enayim ap o drom his?” Oun yon penan: “Kek loubni his kay.”

²² Oun yob djas pale pale pash o Youda oun penas: “Hatsau lat gar. Ninna i menshe kote penan: Kek loubni his kay.”

²³ Koy penas o Youda: “Yoy nay rikrell kova, hoy me lat dom. Te rodah mer lat doureder, rakrenn i menshe pral mande. Mer kram, hoy nashte kram. Me bičrom lake koy bouzni, oun tou hatsal lat gar.”

²⁴ Pal triin čon vas o Youdaeske penlo: “I Tamar, tiro čaveskri romni loubras pes trouyel, oun yoy hi an vavar koova.” Koy penas o Youda: “Anenn lat vin, te vell li pre rhačedo.”

²⁵ Har yoy vin anlo vas, moukas yoy lakro romeskro dadeske te penell: “Ko morshestar hom me an o vavar koova, koneske kava hi. Prindjreh tou, koneskri goustri oun dori oun kasht kova hi?”

²⁶ Oun o Youda prindjras kova oun penas: “Yoy hi feteder an o čačepen tardo har me. Me dom lat gar miro čaveste Shela. Doleske kras yoy kova.” O Youda vas bouder gar khetne lah.

²⁷ Oun yoy las douy čave.

²⁸ Oun har yon boldo van, čivas yek peskro vast vin. Oun i rhačedi gadji pandas i loli dori trouyel oun penas: “Kova vas glan peskro phraleste vin.”

²⁹ Oun har yob peskro vast pale tserdas, vas leskro phraal vin. Oun yoy penas: “Tou val zoryah vin.” Oun leske vas o lab Perez dino.

³⁰ Oun pal leste vas leskro phraal vin, kova kay koy loli dori troul leskro vast his. Oun yon dan les o lab Zera.