1. Mose 35 - O Debleskro Lab 2024 (Sinte-Manouche)

O Yakob vella pale an o foro Betel

¹ Oun o Devel penas ap o Yakobeste: “Kre tout ap o drom, dja an o foro Betel! Ač kote oun kre kote i rhačepaskri, te rhačress mange firhen. Me hom ko Devel, kay moukas pes toutar te dikell, har tou tiro phralestar Esau krik nashal.”

² Koy penas o Yakob ap peskri familya oun ap lauterende, kay pash leste his: “Čivenn t'mendar krik kol deblen dran barra oun kashta, hoy t'mer an-mangenna! Thovenn t'men oun rivenn t'men djoudje ripya an!

³ Avenn, djas an o foro Betel. Kote krau i rhačepaskri o Debleske, kay shounas man ap ko dives, kay an i bibarht homs. Ko Devel his pash mande ap miro drom bis kanna.”

⁴ Oun yon dan o Yakobeste pengre tsele deblen dran barra oun kashta, hoy yon an-mangan, oun i tsele kanengre, hoy an lengre kanda his. Oun o Yakob paskras len tel o baro rouk pash o foro Sichem.

⁵ Oun yon kran pen ap o drom. Oun o Devel čivas i daar ap kol menshende, kay djivan an i forya troul lende. Oun kolla lan len gar palla.

⁶ Yaake vas o Yakob lauterentsa, kay pash leste his, an o them Kanaan an o foro Louz. Ko foro kharell kanna Betel.

⁷ Har o Yakob peskro phralestar krik nashas, moukas pes o Devel kote lestar te dikell. Doleske kras yob kote i rhačepaskri o Debleske, kay venn firhe leske rhačedo. Oun das koy platsa ko lab El-Betel.

⁸ Kote meras i Debora, koy djouvel, kay das garda ap i Rebekka, har his yoy tikno. Oun i Debora vas paskedo tel ko baro rouk, kay pash o foro Betel tardo his. Oun o Yakob das kol roukes o lab ropaskro rouk.

⁹ Har o Yakob dran o them Paddan-Aram an o foro Betel vas, moukas pes o Devel pale lestar te dikell oun rakras lače laba pral leste vin.

¹⁰ Oun penas: “Tou khareh Yakob. Kanna khareh tou bouder gar Yakob. Kanna vell tiro lab Israel.” Yaake las o Yakob ko lab Israel.

¹¹ Oun o Devel penas ap leste: “Me hom o zorelo Devel. Me dau tout boud čave. Yaake boud menshe venna toutar, kay lendar yek bari natsyona oun boud vavar natsyone venna. Ninna bare raya hi mank tire menshende.

¹² Oun ko them, hoy dom o Abrahameste oun o Isaakeste, dau toute ninna oun tire menshende.”

¹³ Oun o Devel djas peske kotar, kay yob o Yakobeha rakras.

¹⁴ Oun ap koy platsa, kay o Devel rakras leha, čivas o Yakob i bar pre. Oun čoras mool oun djet koy pre o Debleske.

¹⁵ Oun yob das koy platsa ko lab Betel.

I Rachel merella

¹⁶ Pal kova moukan le ko foro Betel oun djan an o foro Efrata. Oun ap o drom anas i Rachel i čaves ap i phoub. Oun lat his bare douka.

¹⁷ Har lakre douka baro his, penas koy rhačepaskri gadji ap late: “Ma traash! Ninna kova hi i morsh čavo.”

¹⁸ I Rachel his ap o merepen čiddo. Har yoy meras, das yoy kol čaves ko lab Ben-Oni. Leskro dad das les ko lab Ben-Yamin.

¹⁹ Oun i Rachel meras oun vas paskedo ap o drom pash o foro Efrata. Kova hi kanna Betlehem.

²⁰ Oun o Yakob, kay kharella ninna Israel, čivas i bar pre kote, kay li paskedo hi. Kova nashte vell diklo bis kay dives.

O Yakobeskre deesh-te-douy čave

²¹ Oun o Israel djas doureder oun čivas peskro plarhteno kheer pre vergel koy platsa Migdal-Eder.

²² An ko tsiro har o Israel an ko them djivas, djas o Ruben pash o Yakobeskri vavar romyate, i Bilha, oun čivas pes pash late. Oun o Yakob shounas kova. O Yakobes his deesh-te-douy čave.

²³ I čave, kolen i Lea ap i phoub anas his o Ruben, ko phoureder čavo o Yakobestar. Pal leste vas o Simeon, o Levi, o Youda, o Issakar oun o Zabulon.

²⁴ I čave, kolen i Rachel ap i phoub anas his o Yosef oun o Benyamin.

²⁵ I čave, kolen i Bilha ap i phoub anas, his o Dan oun o Naftali. I Bilha his koy boudepaskretsa, kay his i Rachelake koy.

²⁶ I čave, kolen i Silpa ap i phoub anas, his o Gad oun o Asser. I Silpa his koy boudepaskretsa, kay his i Leake koy. Kolla his o Yakobeskre čave, kay bolde van an o them Paddan-Aram.

²⁷ Oun o Yakob vas pash peskro dadeste Isaak an Mamre pash o foro Kiryat-Arba. Kova hi kanna Hebron, kay ninna o Abraham oun o Isaak djivan.

²⁸ Oun o Isaak his 180 (sheel-te-orhta-deesh) bersh phouro.

²⁹ Oun yob meras oun vas paskedo. Les his i lengsto djipen oun meras an o mishto phourepen. Oun leskre čave, o Esau oun o Yakob, paskran les.