1. Mose 23 - O Debleskro Lab 2024 (Sinte-Manouche)

I Sara merell oun vell paskedo

¹ Oun i Sara vas 127 (sheel-biish-te-efta) bersh phouro.

² Oun yoy meras an o foro Kiryat-Arba. Kova hi kanna Hebron an o them Kanaan. Oun o Abraham vas pash late, rovas oun das i djiyestar gole pral lakro merepen.

³ Pal kova stas o Abraham peskri mouli romyatar pre, oun djas pash i Hetarya, te rakrell lo lentsa.

⁴ Oun yob penas ap lende: “Me hom mank t'mende i vi-themari. Man hi kek kotar them pash t'mende. Kanna mangau t'men: Denn man i kotar them pash t'mende, te paskrap miri mouli romyat.”

⁵ I Hetarya penan ap o Abrahameste:

⁶ “Shoun ap mende, maro ray: Tou hal i Debleskro morsh mashkral mende. Paske tiri mouli romyat an o feteder moulengro kheer, hoy men hi. Hakeno mendar dals tout i kotar them, te paskress tiri romyat koy.”

⁷ Koy stas o Abraham pre oun parkras pes pash lende.

⁸ Oun yob penas ap lende: “Te kamenn t'mer, te paskrap miri mouli romyat kay, palle mangau t'men: Rakrenn o morsheha Efron, – leskro dad hi o Sohar –

⁹ oun mangenn les, te dell lo man leskri grotta, hoy kharella Makpela. Koy grotta hi ap i palstouni rig ap leskro kotar them čiddo. Me kamau te playsrell, hoy koy grotta moldo hi, te lap i moulengro kheer pash t'mende.”

¹⁰ O Hetari Efron his mank peskre menshende beshdo. Oun yob penas ap o Abrahameste glan kolende, kay pashel his, glan hakeneste, kay an o baro voudar o forestar his:

¹¹ “Na-a, miro ray, shoun, hoy me penau: Tou hounte playsress mange či. Me dau tout ko kotar them oun koy grotta. Glan mire menshende dau tout kova, te paskress tiri mouli romyat.”

¹² Koy parkras pes o Abraham pash kol menshende,

¹³ oun penas ap o Efron glan lauterende: “Mangau tout, te shouness ap mande: Me playsrau, hoy ko kotar them moldo hi. Le mandar kal love! Yaake nashte paskrau miri mouli romyat.”

¹⁴ Penas o Efron ap o Abrahameste:

¹⁵ “Miro ray, shoun ap mande! Hoy hi i kotar them mange oun touke, hoy molella star-sheel roupene beme? Kova hi či! Paske tiri romyat kote!”

¹⁶ Oun o Abraham das o Efrones kol love, hoy yon glan i Hetarya vin kran: star-sheel roupene beme. Yek bema his yaake pharo har yek bema pash i parepangre pharo his.

¹⁷ Yaake las o Abraham o Efroneskro kotar them, kay pash Makpela glan Mamre čiddo hi: ko kotar them oun koy grotta oun kol rouka, kay kote tardo his.

¹⁸ Oun kol Hetarya, kay an o voudar o forestar his, his pashel, har o Abraham lauter ginas.

¹⁹ Pal kova paskras o Abraham peskri romyat, i Sara, an koy grotta pash Makpela vergel Mamre. Kova hi kanna o foro Hebron an o them Kanaan.

²⁰ Yaake bikran i Hetarya ko kotar them oun koy grotta o Abrahameske, te vell kote i moulengro kheer peskri familyake.