1. Mose 21 - O Debleskro Lab 2024 (Sinte-Manouche)

O Isaak vell boldo

¹ Oun o baro Devel bistras i Sara gar. Oun yob rikras peskro lab.

² Oun i Sara vas an vavar koova. Oun yoy anas o Abrahameske an leskro phourepen i čaves ap i phoub, an ko tsiro, har o Devel lenge penas.

³ Oun o Abraham das peskro čaves, kay i Saratar boldo vas, ko lab Isaak.

⁴ Ap o orhtato dives činas yob peskro čaves Isaak, yaake har o Devel leske penas.

⁵ O Abraham his sheel bersh phouro, har peskro čavo Isaak boldo vas.

⁶ Oun i Sara penas: “O Devel das man i sapen. Hakeno, kay shounella, hoy mange djas, sal mantsa.

⁷ Koon penals ap o Abrahameste, te dell i Sara i ternepen i beč te piyell? Oun me anom leske an leskro phourepen i čaves ap i phoub.”

⁸ Oun ko čavo vas bareder oun piyas bouder gar ap i beč. Ap ko dives, har yob bouder gar ap i beč piyas, kras o Abraham i baro rhapen.

⁹ Oun o Abrahameskro čavo Ismael, koleskri day i Hagar dran o them Egiptia his, kova sanas pral o Isaak. Oun i Sara dikas kova.

¹⁰ Koy penas yoy ap o Abrahameste: “Trade kol boudepaskretsa peskro čaveha krik, te lell lakro čavo pal maro merepen či kolestar, hoy maro hi. Te lell o Isaak kokres halauter.”

¹¹ Ko rakepen his gar mishto an o Abrahameskre yaka. O Ismael his ninna leskro čavo.

¹² Koy penas o Devel ap o Abraham: “Ab gar rhoyedo pral kova, hoy i Sara pral tiro čaveste Ismael oun leskri day penas. Shoun ap late oun kre halauter, hoy yoy touke penell. O Isaak vell o dad kol čavendar, kolendar me touke penom, te dap len tout.

¹³ Ko čavo, koleskri day i boudepaskretsa hi, kova vell ninna o dad yaake boud menshendar, te venn lendar i natsyona. Kova krau doleske, kay yob tiro čavo hi.”

¹⁴ Sik taysarlakro stas o Abraham pre, las maro oun i gono pherdo pani oun čivas kova i Hagar ap o phiko, das late ninna o čaves, oun bičras len pestar krik. Koy djas yoy peske oun nashas trouyel an o moulo tato them pash o foro Beersheba.

¹⁵ Har len kek pani bouder his, čivras yoy kol čaves tel i bourra.

¹⁶ Oun beshas pes i tselo kotar lestar. Yoy penas peske: “Me nashte dikau kova gar, har miro čavo merella.” Har yoy kote beshdo his, rovas yoy zoreles.

¹⁷ Oun o Devel shounas ko čaveskri gole. Oun o Debleskro bolepaskro das i Hagar gole dran o bolepen oun penas ap late: “Hoy hi tout, Hagar? Ma traash! O Devel shounas ko čaveskri gole, kote kay yob čiddo hi.

¹⁸ Dja pash tiro čaveste oun hade les pre! Oun le les ap o vast. Me kamau te vell yob o dad boud menshendar, te venn lendar i natsyona.”

¹⁹ Oun o Devel kras lake i yaka pre. Oun yoy dikas i tikno pani, djas kote, kras ko gono pherdo pani, oun das kol čaves te piyell.

²⁰ Oun o Devel his kol čaveha. Oun yob vas baro oun djivas an o moulo tato them, oun vas i morsh, kay hayvas mishto karye te dell i bogeha.

²¹ Oun yob djivas an ko moulo tato them, hoy kharella Paran. Oun leskri day las leske i romni dran o them Egiptia.

O Abimelek vell pash o Abrahameste

²² An ko tsiro vas o Abimelek peskro pralstouno lourdeha Pikol pash o Abrahameste oun penas ap leste: “O Devel hi touha an halauter, hoy tou kreh.

²³ Kanna de tout sovel ap o Debleste, te rhorhess man gar, vitar gar mire čaven oun kolengre čaven. Me homs touke lačo. Ab tou ninna lačo ap mande oun ap ko them, kay tou djiveh.”

²⁴ Penas o Abraham: “Me dau man sovel koy pre.

²⁵ T'mendar kamau te djinell, hoske tire boudepangre mari brounna krik lan.”

²⁶ Koy penas o Abimelek: “Me djinau gar, koon kova kras. Mange vas či penlo, gar toutar, vitar gar i vavarendar. Kava dives shounau kova o ersto kopo.”

²⁷ Koy las o Abraham bakre oun groumya, oun das len o Abimelekes. Oun yon dan pengro vast koy pre, kay kek o vavares rhorhella.

²⁸ Oun o Abraham rodas efta terne bakre vin, oun čivas len ap i rig.

²⁹ Koy poučas o Abimelek: “Hoy kreh tou kol efta terne bakrentsa, kay čival ap i rig?”

³⁰ O Abraham penas: “Kol efta terne bakre less tou mandar. Yaake sikreh, kay me koy brounna krom, oun koya miro hi.”

³¹ Dran kova kharella koy platsa, kay dan pen kol douy sovel, Beersheba.

³² Yaake dan le pengro vast koy pre an Beersheba, kay kek o vavares rhorhella. Pal kova djas o Abimelek oun peskro pralstouno lourdo Pikol pale an ko them, kay i Filistarya djivenna.

³³ O Abraham čivas i rouk an i phoub an Beersheba. Oun kote mangas yob o baro Debles an, ko Debles, kay hako tsiro koy hi.

³⁴ Oun o Abraham ačas i rah tsiro an o them Filistia.