1. Mose 15 - O Debleskro Lab 2024 (Sinte-Manouche)

O Devel penell, te dell lo o Abrames čaven oun i them

¹ Koy pal moukas o baro Devel o Abrames leskri gole te shounell oun penas ap leste: “Ma traash, Abram! Me rikrau mire vasta pral toute. Oun me hom touke i baro bravlepen.”

² Koy penas o Abram: “Miro ray, baro Devel, hoy kameh man te dell? Man hi kek čave. Me te merau, lell halauter, hoy man hi, o Eliyeser, ko vell dran o foro Damaskus.

³ Man dal tou kek čaven. Oun miro pralstouno boudepaskro lell pal mande halauter, hoy miro hi.”

⁴ Koy penas o baro Devel ap o Abrameste: “Na-a, kova lell gar, hoy tiro hi. Tou veh dad i čavestar. Oun tiro čavo lell halauter, hoy tiro hi.”

⁵ Oun o Devel anas les vin oun penas: “Dik an o bolepen! Oun dik i bolepangre momlia! Nay peneh tou, har boud kolla hi? Yaake boud menshe venna toutar.”

⁶ Oun o Abram patsas o baro Debles. Oun doleske kras o Devel les čačo glan peskre yaka.

⁷ Oun o baro Devel penas ap leste: “Me hom o baro Devel, kay anom tout dran o foro Our, hoy an o them Kaldea hi. Kava them, kay tou kanna hal, dau tout, te vell kova tiro them.”

⁸ Koy penas o Abram: “Miro ray, baro Devel, har djinau me, te vell kava them miro?”

⁹ Koy penas o Devel ap leste: “An mange i terni groumni – triin bersh phouro, i bouzni – triin bersh phouro oun i bakro – triin bersh phouro, i divyi tauba oun i vavar tauba!”

¹⁰ Oun yob anas leske kol tsele firhen oun činas len mashkral khetne. Oun čivas yek kotar ap kay rig, ko vavar kotar ap koy rig. Kokres i čirkle činas yob gar an kotya.

¹¹ Koy van divye čirkle oun moukan pen ap kol moule firhende te perell. Oun o Abram tradas len krik.

¹² Har o kham tele djas, sovas o Abram zoreles dren. Oun ap leste vas bari daar. Oun rati vas troul leste.

¹³ Oun o Devel penas ap o Abrameste: “Čačepah, tou djiness: Tire menshe, kay toutar venna, venn vi-themarya an i them, kay gar lengro hi. Oun i menshe an ko them djan zoreles ap lende oun krenn boudepangre lendar. Oun yon hounte boudrenn lenge 400 (star-sheel) bersha.

¹⁴ Kolla, kay krenn lendar boudepangre, lenn i phagi mandar. Koy pal djan tire menshe vin baro bravlepah.

¹⁵ Oun touke penau me: Te mereh, soveh barhtelo dren. An i mishto phourepen veh tou paskedo.

¹⁶ Oun pal star menshengro phourepen venna tire menshe kate pale. Koy doosh kolendar, kay kanna kate djivenn – kolla hi i Amorarya – hi kanna gar bares doha, te tradap len vin.”

¹⁷ Oun har o kham tele djas oun rati vas, dikas o Abram i bob, dran koleste i yagakro dourho pre djas. Oun yag djas mank kol kotya mass.

¹⁸ Yaake das o baro Devel o Abrameste ap ko dives peskro lab, oun penas: “Tire čaven, kay toutar venna, dau me kava them mank o lengsto pani o themestar Egiptia oun o baro lengsto pani Eufrat.

¹⁹ Oun kolla, kay an kava them khere hi, dau me an tiro vast: i Kenarya, i Kenasarya, i Kadmonarya,

²⁰ i Hetarya, i Perisarya, i Refayarya,

²¹ i Amorarya oun i Kanaanitarya, i Girgasharya oun i Yebousarya.”