1. Mose 13 - O Debleskro Lab 2024 (Sinte-Manouche)

O Abram oun o Lot

¹ O Abram djas dran o them Egiptia: yob oun leskri romni oun halauter hoy les his, oun leskro phraleskro čavo Lot. Oun yon djan an o them Negev.

² O Abram his bravelo: Les his boud firhe, roup oun sonakay.

³ Oun ko themestar Negev djas yob doureder foun yek platsa ap i vavar. Oun vas pash o foro Betel ap koy platsa mank Betel oun Ai, kay leskro plarhteno kheer o ersto kopo tardo his.

⁴ Kote his koy platsa, kay yob i Debleskri rhačepaskri kras. Oun kote kharas yob pale o baro Debles an.

⁵ O Lot, kay djal o Abrameha, koles his ninna bakre, groumya oun plarhtene khera.

⁶ O Abrameskro bravlepen oun o Loteskro bravlepen his yaake baro, kay nashte djivan yon bouder gar khetne. Lengre firhe hatsan gar doha te rhal.

⁷ Yaake čingran pen o Abrameskre boudepangre oun o Loteskre boudepangre, kay dan garda ap lengre firhende. An ko tsiro djivan ninna i Kanaanitarya oun i Perisarya an ko them.

⁸ Koy penas o Abram ap o Lot: “Me kamau kek čingepen mank mende, vitar gar mank tire boudepangre oun mire boudepangre. Mer ham phrala.

⁹ Rode touke vin, havo them tou kameh. Oun dja touke mandar! Kameh tou serves te djal, djau me čačes. Oun te kameh tou čačes te djal, djau me serves.”

¹⁰ O Lot dikas ap o tselo them pash o pani Yordan. Kova his halauter sapeno. Bis pash o foro Soar his ko them har o baro Debleskri baar oun har o them Egiptia. Kova his glan ko tsiro, kay kol forya Sodom oun Gomorra rhačedo van.

¹¹ Oun o Lot rodas peske o tselo them pash o pani Yordan vin. Oun djas kote, kay o kham pre djala. Oun hakeno djas i vavar drom:

¹² O Abram djivas an o them Kanaan. Oun o Lot djivas an kol forya pash o pani Yordan, oun čivas peskre plarhtene khera pre bis pash o foro Sodom.

¹³ Kol menshe an Sodom his čilačo oun djivan an baro čilačepen glan o baro Debleste.

O baro Devel penell o Abrameske, te dell lo les boud čaven oun i them

¹⁴ Har o Lot peske djas, penas o baro Devel ap o Abrameste: “Dik tout trouyel oun dik kote, kay tardo hal, ap haki rig: serves, čačes, glan toute oun pal toute!

¹⁵ Ko tselo them, hoy dikeh, kova dau tout oun tire čaven, kay pal toute venna. Ko them hi t'maro hako tsiro.

¹⁶ Oun me dau tout boud čaven, kay pal toute venna, – yaake boud har i čik ap i phoub. Kek mensho nay djinell, har boud čik ap i phoub hi. Yaake djinell nay kek, kitse menshe toutar venna.

¹⁷ Dja trouyel an o tselo them! Tout dau ko tselo them.”

¹⁸ Oun o Abram djas peskre plarhtene kherentsa trouyel, oun vas pash o foro Hebron oun ačas tel i bare rouka ko morshestar Mamre. Oun kote kras yob i rhačepaskri o baro Debleske, kay venn firhe leske rhačedo.