1. Mose 11 - O Debleskro Lab 2024 (Sinte-Manouche)

O baro kheer an o foro Babel

¹ An ko tsiro his i tsele menshen yek rakepen.

² Oun yon moukan pengro them oun djan kote, kay o kham pre djala. An o them Shinar hatsan le i bourhlo them oun ačan koy.

³ Oun yon penan yek ap o vavareste: “Avenn, las čik, te kras barra dran lende, oun rhačras len, te venn le zoreles.” Oun yon lan čik oun kran barra dran. Oun lan teera te čivenn le lat mank i barra, te ačenn kol barra khetne.

⁴ Oun yon penan: “Avenn, mer krah menge i foro oun i baro kheer, hoy djal an o bolepen. Yaake sikrah hakeneske, har baro mer ham. Oun mer ačah khetne an ko them.”

⁵ Koy vas o baro Devel tele, te dikell lo ko foro oun ko baro kheer, hoy kol menshe krenn.

⁶ Oun o baro Devel penas: “Dik, yon hi halauter khetne an yek them oun rakrenn yek rakepen. Kanna krenn le kava foro. Hoy krenn le pal kova? Dell či, hoy yon gar hayvenna. Yon krenn lauter, hoy lenge an o shero vella.

⁷ Avenn, djas tele pash lende oun das hakenes i vavar rakepen, yaake, kay yek i vavares bouder gar hayvella.”

⁸ O baro Devel kras yaake, te ačan le koy bouder gar khetne oun hounte djan dran yek them an i vavar pral i tseli phoub. Oun yon moukan tele, te krenn le ko foro.

⁹ Doleske kharell ko foro Babel. Kote kras o baro Devel, kay yek i vavareskro rakepen bouder gar hayvella. Yaake kras yob, te ačan le koy bouder gar khetne oun hounte djan dran yek them an i vavar pral i tseli phoub.

I laba kol menshendar, kay van pal o Sem

¹⁰ Kova hi ko liil, kay činlo hi i laba kol menshendar, kay van pal o Sem. Har o Sem 100 (sheel) bersha phouro his, vas lestar o Arpaksad boldo. Kova his douy bersha pal o baro pani.

¹¹ Koy pal, har o Arpaksad boldo vas, djivas o Sem panč-sheel (500) bersha. Oun lestar van vavar čave oun ča bolde.

¹² Har o Arpaksad 35 (triyanda-te-panč) bersha phouro his, vas lestar o Shela boldo.

¹³ Koy pal, har o Shela boldo vas, djivas o Arpaksad 403 (star-sheel-te-triin) bersha. Oun lestar van čave oun ča bolde.

¹⁴ Har o Shela 30 (triyanda) bersha phouro his, vas lestar o Eber boldo.

¹⁵ Koy pal, har o Eber boldo vas, djivas o Shela 403 (star-sheel-te-triin) bersha. Oun lestar van čave oun ča bolde.

¹⁶ Har o Eber 34 (triyanda-te-star) bersha phouro his, vas lestar o Peleg boldo.

¹⁷ Koy pal, har o Peleg boldo vas, djivas o Eber 430 (star-sheel-te-triyanda) bersha. Oun lestar van čave oun ča bolde.

¹⁸ Har o Peleg 30 (triyanda) bersha phouro his, vas lestar o Regou boldo.

¹⁹ Koy pal, har o Regou boldo vas, djivas o Peleg 209 (douy-sheel-te-enya) bersha. Oun lestar van čave oun ča bolde.

²⁰ Har o Regou 32 (triyanda-te-douy) bersha phouro his, vas lestar o Seroug boldo.

²¹ Koy pal, har o Seroug boldo vas, djivas o Regou 207 (douy-sheel-te-efta) bersha. Oun lestar van čave oun ča bolde.

²² Har o Seroug 30 (triyanda) bersha phouro his, vas lestar o Nahor boldo.

²³ Koy pal, har o Nahor boldo vas, djivas o Seroug 200 (douy-sheel) bersha. Oun lestar van čave oun ča bolde.

²⁴ Har o Nahor 29 (biish-te-enya) bersha phouro his, vas lestar o Tera boldo.

²⁵ Koy pal, har o Tera boldo vas, djivas o Nahor 119 (sheel-te-deesh-te-enya) bersha. Oun lestar van čave oun ča bolde.

²⁶ Har o Tera 70 (efta-deesh) bersha phouro his, vas yob dad. Leskre čave his o Abram, o Nahor, oun o Haran.

I menshe, kay van pal o Tera

²⁷ Kova hi ko liil, kay činlo hi i laba kol menshendar, kay van pal o Tera. O Tera: Leskre čave his o Abram, o Nahor oun o Haran. O Haran las i čavo, o Lot.

²⁸ O Haran meras glan peskro dadeste an peskro dadeskro them Kaldea, an o foro Our.

²⁹ O Abram romedineras i Saray. Oun o Nahor romedineras i Milka, kolakro dad o Haran his. Koles his kol douy ča, i Milka oun i Yiska.

³⁰ I Saray nashte las kek čave.

³¹ Oun o Tera las peskro čaves Abram peha oun o Lot, ko čavo peskro čavestar Haran, oun i Saray, koy romni peskro čavestar Abram. Oun khetne moukan le ko foro Our, hoy an o them Kaldea čiddo hi, te djan le an o them Kanaan. Oun yon van pash o foro Haran oun ačan kote.

³² O Tera vas 205 (douy-sheel-te-panč) bersh phouro oun meras an o foro Haran.