1. Mose 10 - O Debleskro Lab 2024 (Sinte-Manouche)

I laba kol menshendar, kay van pal o Noah

¹ Kova hi ko liil, kay i laba činlo hi kol menshendar, kay van o Noaheskre čavendar: o Sem, o Ham oun o Yafet. Kolenge van čave boldo pal o baro pani.

O Yafeteskre čave

² O Yafet: Leskre čave hi o Gomer, o Magog, o Madai, o Yavan, o Toubal, o Meshek oun o Tiras.

³ I menshe, kay van pal o Gomer, hi: o Ashkenas, o Rifat oun o Togarma.

⁴ I menshe, kay van pal o Yavan, hi o Elisha, o Tarsis, i Kitarya oun Rodanarya.

⁵ Kolendar venna i menshe, kay djivenna an i themma pash o baro pani. Kolla hi i čave o Yafetestar pengre menshentsa. Lendar van bare familye. Hakeni rakras peskro rakepen oun djivas an peskro them.

O Hameskre čave

⁶ O Ham: Leskre čave hi: o Koush, o Misrayim, o Pout oun o Kanaan.

⁷ I menshe, kay van pal o Koush, hi: o Seba, o Havila, o Sabta, o Ragma, oun o Sabteka. I menshe, kay van pal o Ragma hi: o Seba oun o Dedan.

⁸ O Koush, les his i čavo, leskro lab his Nimrod. Kova his o ersto, kay las bari zoor pral vavar menshende ap i phoub.

⁹ Oun yob his i baro yegari glan o baro Debleste. Doleske vell penlo: Kova hi i baro yegari glan o baro Debleste har o Nimrod.

¹⁰ An ko ersto tsiro vas yob o ray pral i forya Babel, Erek, Akkad oun Kalne an o them Shinar.

¹¹ Kotar djas yob an o them Assour oun kras i forya Ninive, Rehobot-Ir, Kela

¹² oun ninna Resen, kay mashkral Ninive oun ko baro foro Kela hi.

¹³ O Misrayim vas o dad kol menshendar Loud, Anam, Lehab, Naftou,

¹⁴ Patros, Kaslou oun Kaftor, kolendar venna i Filistarya.

O Kanaaneskre čave

¹⁵ O Kanaan: Leskre čave hi o Sidon oun o Het. O Sidon hi o phoureder čavo.

¹⁶ O Kanaan vas ninna o dad kol menshendar Yebous, Amor, Girgash,

¹⁷ Hiv, Ark, Sin,

¹⁸ Arvad, Zemar oun Hamat. Pal i tsiro ačan kolla bare familye, kay van pal o Kanaan, bouder gar khetne oun djan doureder.

¹⁹ Lengro tselo them djas pral pash o foro Sidon oun tele pash o foro Gaza. Oun ap koy rig, kay o kham pre-djala, djas lo pash o foro Gerar oun doureder pash kol forya Sodom, Gomorra, Adma, oun Seboyim pash o foro Lesha.

²⁰ Kolla hi i čave o Hamestar pengre menshentsa. Lendar van bare familye. Hakeni rakras peskro rakepen oun djivas an peskro them.

O Semeskre čave

²¹ O Yafeteskro phoureder phraal, o Sem, las ninna čave. Yob his o dad i tsele menshendar Eber.

²² Kolla hi i čave o Semestar: o Elam, o Assour, o Arpaksad, o Loud, oun o Aram.

²³ O Aram: Leskre čave hi: o Ous, o Houl, o Geter, oun o Mash.

²⁴ O Arpaksad las i čavo, o Shela. Koleskro čavo hi o Eber.

²⁵ O Eber las douy čave: Yek kharas Peleg. An leskro tsiro ačan i menshe bouder gar khetne. Haki bari familya las peskro them. O Peleges his i phraal. Kova kharas Yoktan.

²⁶ Koleskre čave his: o Almodad, o Shelef, o Hazarmavet, o Yera,

²⁷ o Hadoram, o Ouzal, o Dikla,

²⁸ o Obal, o Abimael, o Saba,

²⁹ o Ofir, o Havila, oun o Yobab. Kolla halauter van pal o Yoktan.

³⁰ Oun o them, kay yon khere his, his mashkral Mesha oun Sefar, kay hi čiddo an kol berge kote, kay o kham pre djala.

³¹ Kolla hi i čave o Semestar pengre menshentsa. Lendar van bare familye. Hakeni rakras peskro rakepen oun djivas an peskro them.

³² Kolla hi halauter i menshe, kay venna o Noaheskre čavendar. Lengre laba hi yaake pre činlo, te vell diklo, koon lengro dad hi, oun have menshe lendar venna. Kol menshendar venna i tsele menshe ap i phoub pal o baro pani.