1. Korintarja 8 - O Debleskro Lab 2024 (Sinte-Manouche)

Ma krenn či, hoy anell t'mare phralen o Debleskro dromestar tele!

¹ T'mer poučan mandar: “Nay rhah mer, kay patslo ham, ko mass, hoy vas glan i figura anlo, hoy mangenn le an, har te vals li i devel?” Hi čačo, mer halauter ham gosevo oun djinah čomone pral kava koova. Koon patsell, te hi les boud gosvepen, kova patsell sik, te hi lo bareder har ko vavar. Koon o djiyestar o vavares kamella, koles krell yob zorelo oun gar tikno.

² Koon patsella, te hi lo gosevo, kova djinell gar, hoy čačo gosvepen hi.

³ Koon čačepah gosevo hi, kova kamell o Debles o djiyestar. Oun o Devel prindjrell les.

⁴ Nay rhah mer kanna ko mass, hoy anan le glan i figura, hoy mangenn le an, har te vals li i devel? Mer djinah halauter, kay hi i figura kek čačo devel. Dell yek Devel oun kek vavar.

⁵ Ninna te hi savo koova an o bolepen oun ap i phoub, hoy i menshe an-mangenna, oun ninna te dell boud, ap kolende i menshe penenna “mo devel” oun “mo ray”,

⁶ hi men yek Devel. Kova hi maro dad an o bolepen, oun dran leste vell halauter. Oun mer ham leske koy. Oun men hi yek ray, kova hi o Yezous Kristo. Lestar vas halauter. Oun lestar lam mer o nevo djipen.

⁷ Hakeno hayvas kava gar. Hi patsle, te rhan yon ko mass, hoy glan i figura anlo vas, hi kova lenge, har te mangans le koy figura an, yaake har an ko tsiro, kay his le gar patslo. Oun lengre djia, kay gar zoreles an o Debleste hi, penenn lenge, te anan le doosh ap pende.

⁸ Kolenge penau me: O rhapen krell men gar pale-čiddo glan o Debleste. Te ham dareno, te rhas yek rhapen, ham gar tikneder glan o Debleste. Te ham gar dareno, te rhas kova, ham gar feteder glan leste.

⁹ Kova hi t'maro koova, hoy t'mer krenna. Ninna te hi kova yaake, denn yak ap kolende, kay gomme gar zoreles an o patsepen hi, te perenn yon gar o Debleskro dromestar tele!

¹⁰ Tou patseh, tou hal gosevo an o patsepen oun hayval, te nay rhah ko mass, hoy glan koy figura anlo vas, oun tou djah an ko kheer, kay mangenn le kolat an, oun rhah ko mass. Djineh tou, hoy nay vella, te dikell tout yek, kay gar zoreles an o patsepen hi? Kova nay vell yaake, te rhal yob ninna ko mass, ninna te penell leskro dji leske: “Ma kre kova!”

¹¹ Oun ko phraal, koleske o Yezous Kristo meras, oun kay hi gar zorelo an o patsepen, nashrell peskro patsepen doleske, kay tou patseh, te hal gosevo.

¹² Me penau t'menge: T'mer te krenn savo čilačo koova ap t'mare phralende oun krenn, te vell len i djoungelo dji, palle krenn t'mer i čilačo koova ap o Yezous Kristeste.

¹³ Doleske, te dikell miro phraal, kay rhau ko mass, oun doleske vell lo o Debleskro dromestar tele, palle kamoms me miro tselo djipen bouder kek mass te rhal.