1. Korintarja 6 - O Debleskro Lab 2024 (Sinte-Manouche)

Čingepen mank i patslende

¹ Te hi yekes t'mendar i čingepen i vavar patsleha oun kamell peskro čačepen, har nay anell lo kova glan i čačepangre, kay gar patslo hi? Hoske djal lo gar pash i patslende?

² Vell yek tsiro, koy rakrenn i patsle o čačepen vin pral i tsele menshende ap kay phoub. Djinenn t'mer kova gar? T'mer te krenn o čačepen vin pral kol tsele menshende ap kay phoub, hoske nay rakrenn t'mer kanna gar o čačepen vin pral kol phralende, kay i tikno djoungelo koova kran?

³ Djinenn t'mer gar, te vell ko tsiro, kay rakrah mer o čačepen vin pral i bolepangre? Te hi kova yaake, palle nay rakrah ninna o čačepen vin pral i phralende, kay čingrenn pen pral i tikno phoubyakro koova.

⁴ Hoske anenn t'mer ko tikno koova glan kol čačepangre, kay hi či penepaske pral i patslende, oun kamenn kolendar t'maro čačepen?

⁵ Kova, hoy t'mer kran, hi i bari ladj. Hi kek gosevo morsh mank t'mende, koon nay penella, kones čačo hi?

⁶ T'mer han phrala. Oun t'mer čingrenn t'men glan kol čačepangre, kay gar patslo hi!

⁷ T'maro čingepen hi i čilačo koova an peste. Hoske rikrenn t'mer gar vin, hoy kol vavar t'mentsa krenna? Hi feteder te nashrenn t'maro koova, har te djan glan i čačepangre.

⁸ Oun kova hi gar lauter! T'mer krenn i vavarenge ninna čilačepen oun lenn t'menge lendar kova krik, hoy len hi. Oun kova krenn t'mer ninna i patslentsa.

⁹ T'mer hounte djinenn, kolla, kay čilačo koova krenna, venn gar pash o Debleste an o bolepen, oun lenn gar ko lačo koova, hoy o Debles peskre čavenge hi. Ma rhorhenn t'men kokres! Kolla, kay vi-ladjedo koova krenna, venn gar pash o Debleste an o bolepen, vitar gar kolla, kay mangenn vavar koova an har o Debles, vitar gar kol morsha, kay rhorhenn pengri romyat i vavar djouvyah, vitar gar kol djouvya, kay rhorhenn pengro romes i vavar morsheha, vitar gar kol morsha, kay krenn vi-ladjedo koova vavar morshentsa oun čaventsa,

¹⁰ vitar gar i čorepangre, vitar gar kolla, kay ap i love pandlo hi, i dre-phagepangre, i pipangre oun kolla, kay praasenn i vavaren, – kolla lauter venna gar pash o Debleste an o bolepen.

¹¹ Hi menshe mank t'mende, kay kran savo koova. Kanna vas t'mari doosh tele thodo. Oun t'mer van erligo kerdo glan o Debleste, oun han čačo glan leskre yaka. Kova lauter kras maro ray, o Yezous Kristo, oun o Debleskro Dourho t'menge.

I patslo hi tseles o Debleske koy

¹² T'mer penenn: “Mer nay krah halauter.” Me penau: Gar lauter, hoy t'mer krenna, hi t'menge mishto. Ninna te nay krau lauter, hounte vap me gar pandlo ap kova, hoy krau.

¹³ O rhapen hi koy, te djal lo an o per. Oun o per hi o rhapaske koy. Vell yek dives, kay krell o Devel, te hi o rhapen oun o per bouder gar koy. O Devel kras men gar, te loubras mer trouyel. Mer ham koy o Yezouseske, maro rayeske. Oun yob hi ninna o ray pral maro mass.

¹⁴ Yaake har o Yezous meras, oun o Devel les djido kras, yaake krell leskri bari zoor men ninna djido.

¹⁵ Djinenn t'mer gar, kay han yek o Yezous Kristeha? I mensho, kay hi yek o Yezous Kristeha, nay vell gar khetne i loubyah. Kova djal gar!

¹⁶ Djinenn, te djal yek pash i loubni, venn kol douy yek. O Debleskro lab penella: Kol douy venna yek.

¹⁷ Ko mensho, kay djal o Yezouseha, maro rayeha, koles hi yek dourho leha.

¹⁸ Doleske penau t'menge: Ma loubrenn trouyel! Te kreh tou savo koova, čineh tou touke kokres an o mass. Hako vavar čilačepen kreh tou ap i vavarende. Te loubreh trouyel, kreh tou o čilačepen ap toute.

¹⁹ Djinenn t'mer gar, kay han t'mer o kheer, kay o Debleskro Dourho djivella? Kova hi an t'mende oun vell o Deblestar. Oun t'mer han leskre, oun nay krenna bouder gar, hoy kamenna.

²⁰ O Devel playsras t'menge peskro čaveskro rateha. Doleske sharenn les t'maro tselo djipah!