1. Korintarja 4 - O Debleskro Lab 2024 (Sinte-Manouche)

O Yezous Kristo hi maro čačepaskro ray

¹ Hakeno hounte dikell ap mende, te ham mer o Yezous Kristeskre boudepangre. Yob das men koy boudi, te penas i menshenge, hoy o Debles an o dji hi, oun hoy i menshe gomme gar djinenna.

² Oun i boudepaskro hounte krell peskri boudi mishto.

³ Mange hi yek, hoy t'mer mandar penenna. Ninna kova, hoy i čačepangre mandar penenna, hi mange yek. Me dikau vitar gar ap mande te penap mange, har miri boudi krom.

⁴ Me djinau gar, te anom doosh ap mande. Ninna te djinom kova gar, krell man kova gar čačo glan o Debleste. Kova, kay o čačepen pral mande vi-rakrella, hi kokres maro ray Yezous.

⁵ Dran kova penau, ma penenn yekestar: Kova krell peskri boudi gar mishto. Kanna hi gar o čačo tsiro, te rakrenn yaake. Ap ko dives, kay vell maro ray Yezous pale, sikrell lo halauteren, hoy kanna khatedo hi. Oun lauter, hoy an o dji dren hi, vell palle diklo. Oun palle vell hakeno sharedo o Deblestar pal koy boudi, hoy yob kras.

Lauter hoy tout hi, das tout o Devel

⁶ Mire phrala, hoy me kanna penom, rakrau me mandar oun o Apollestar. Ap mende dikenn t'mer, har te ačenn ap kova, hoy an i lila činlo hi. Kek t'mendar hounte phourdell pes pre oun penell: “Me rikrau man ap o feteder sikepaskro.”

⁷ Koon penas touke, te hal tou feteder har ko vavar? Kova, hoy tout hi, hi tout o Deblestar. Te das yob tout lauter, hoske shareh tout?

⁸ T'mer krenn, har te vans čalo oun djinans halauter. T'mer krenn, har te vans bravelo. T'mer krenn, har te vans raya. Mer ham kek raya. Me kamoms, te vans čačepah raya. Palle vams mer t'mentsa khetne raya.

O Yezouseskre bičepangre lenn douka ap pende

⁹ Mer, kay ham o Yezous Kristeskre bičepangre, menge hi yaake, har te anals men o Devel kote, kay ham či moldo an i menshengre yaka. Mer ham har i kourepangre, kay hounte kourenn pen, bis te venn le moulo dino. Oun i menshe oun i bolepangre dikenn kova.

¹⁰ Mer rakrah o Yezous Kristestar. Oun doleske ham dinele glan i menshengre yaka. T'mer patsenn ap o Yezous Kristeste, oun doleske han goseve. Mer ham gar zorele, oun t'mer han zorele. Men sharenn le gar. T'men sharenn le.

¹¹ An kava tselo tsiro hi men bok oun troush. Oun an-ripaske hi men vitar či. Mer rhah dava. Oun men hi kek isema, kay nay ačah.

¹² Mer marah men tele mare vastentsa, te vell men čomone te rhal. Yon praasenn men, oun mer rakrah o Debleskri barht pral lende vin. Yon te lenn men palla, rikrah mer vin.

¹³ Te rakrenn yon djoungeles mentsa, rakrah mer lačes lentsa. Mer ham har čik hako mensheske, har čik ham lenge bis kanna.

O Paulo hi har i dad i patslenge

¹⁴ Me činau t'menge kova gar, te krap t'menge ladj. Na-a! T'mer han mire kamle čave. Doleske penau t'menge kova, te ačenn ap o čačo drom.

¹⁵ Ninna te vals t'men deesh zerya sikepangre, kay sikrenn t'men, har te djan ap o Yezous Kristeskro drom, hi t'men yek dad kokres an o patsepen. Kova hom me. Me penom t'menge o lačo lab o Yezous Kristestar oun t'mer lan ko lab pre.

¹⁶ Me mangau t'men: Djivenn yaake har me djivau!

¹⁷ Me bičrom o Timoteste pash t'mende. Kova hi miro kamlo oun lačo čavo an o patsepen. Yob penell t'menge, har me ko drom djau, hoy o Yezous Kristo sikras mande, oun har rakrau lestar an hake gaba oun forya, kay i patsle khetne venna.

¹⁸ Pash t'mende hi menshe, kay phourdenn pen pre oun krenn, har te voms gar pale pash t'mende.

¹⁹ Djinenn! Te kamell o Devel, vau me yaake sik har djala pash t'mende. Koy kamau me gar te shounell, har bares yon rakrenna. Me kamau lengri zoor an o patsepen te dikell.

²⁰ Kote, kay i menshe o Debleha khetne djivenna, vell gar kokres rakedo, na-a, kote vell o Debleskri zoor diklo.

²¹ Hounte vap me o kashteha pash t'mende? Hi t'menge gar feteder, te vap i djiyeha pherdo kamlepen oun lačepen pash t'mende?