1. Korintarja 3 - O Debleskro Lab 2024 (Sinte-Manouche)

I patsle an o foro Korint hi har tikne čave

¹ Mire phrala, me nay rakrom t'mentsa gar har patslentsa, kay djivenn yaake, har o Debleskro Dourho kamella. Me hounte rakrom t'mentsa har kolentsa, kay djivenn pengro phouro djipen. T'mer hans har tikne čave an o patsepen.

² Me dom t'men thoud te piyell, oun kek mass te rhal. Kova nay dandran t'mer gar. Ninna kanna nay rhan kova gar.

³ T'mer djivenn yaake har te prindjrenn o Yezous Kristes gar. Te hi čingepen mank t'mende, oun te zilverenna, palle djivenna yaake har i menshe, kay prindjrenn o Yezous Kristes gar.

⁴ Yek t'mendar penella: “Me krau, hoy o Paulo penella.” Oun ko vavar penella: “Me rikrau man ap o Apolleste.” Me penau t'menge: Yaake rakrenn kol menshe, kay prindjrenn o Debles gar.

O Debleskre boudepangre

⁵ Dikenn, koon hi o Apollo, oun koon hom me, o Paulo! O Debleskre boudepangre ham mer oun kram, kay van t'mer patslo. Hakeno mendar kras koy boudi, har o Devel leste das.

⁶ Me hom har i harho, kay vitsras o djob an i phoub. O Apollo hi har yek, kay čoras o pani pre. Oun o Devel moukas o djob bares te vell.

⁷ Kova, kay o djob an i phoub vitsrella, hi gar bareder har kova, kay o pani pre čorella. O Devel hi bareder, kay moukell o djob bares te vell.

⁸ Kova, kay o djob an i phoub vitsrella hi yaake baro har kova, kay pani pre čorella. Oun o Devel dell hakenes, hoy leskri boudi moldo hi.

⁹ Mer ham o Debleskre boudepangre. T'mer han o Debleskri harhetikri phoub. Oun t'mer han har i kheer, hoy o Devel peske krella.

I patsle hi o Debleskro kheer

¹⁰ O Devel his lačes ap mande oun das man i boudi, te boudrap ap ko kheer. Yaake čivom me i telstoune barra. Me krom kova, har i gosevo boudepaskro, koon hayvella khera te krell. Ap kol telstoune barra čivell i vavar boudepaskro vavar koova pre. Hakeno hounte dell garda, hoy yob pre čivella.

¹¹ Kek nay čivella i vavar telstouno bar, har ko bar, hoy čiddo hi. Kova hi o Yezous Kristo.

¹² Hi boudepangre, kay čivenn sonakay, roup, kouč barra, pre. Vavar čivenn kasht, phouss, khass pre.

¹³ Vell ko dives, kay dikenn le, hoy hakeno pre čivas. Ap ko dives vell lauter an i yag. Oun koy yag sikrella, hoy haki boudi moldo hi.

¹⁴ Te rhačrell kova gar krik, hoy yek pre čivas, lell yob čomone o Deblestar.

¹⁵ Te rhačrell kova an i yag krik, hoy yob pre čivas, nashrell yob lauter. Yob kokres djal gar nashedo. Yob hi har yek, kay nashell dran i kheer vin, hoy rhačella.

¹⁶ Djinenn t'mer gar, kay han t'mer o Debleskro kheer, oun kay o Debleskro Dourho an t'mende djivella?

¹⁷ Koon o Debleskro kheer paash krella, koles phagella o Devel. O Debleskro kheer hi o Debleske. Oun kava kheer han t'mer.

O menshengro sharepen hi či moldo

¹⁸ Ma rhorhenn t'men kokres! Koon patsella, te hi lo gosevo ap kay phoub, kova hounte dikell dren, te molella leskro gosvepen či.

¹⁹ Kova, hoy pash i menshende gosvepen hi, hi an o Debleskre yaka dinlepen. An o Debleskro lab hi činlo: O Devel taprell kolen an lengro rhorhepen, kay penenn pendar, kay yon gosevo hi.

²⁰ Hi ninna činlo: O Devel djinella, hoy an i menshengro dji glan djala, kay lengro gosvepen či molella.

²¹ Doleske hounte sharell pes kek mensho, koon peskro sikepaskro hi. Lauter hi t'maro:

²² o Paulo, o Apollo, o Kefas. Oun t'maro hi ninna: kay phoub, o djipen, o merepen, kova, hoy kanna hi, oun kova, hoy vella. Lauter hi t'maro.

²³ T'mer han o Yezous Kristeskre. O Yezous Kristo hi o Debleskro.