1. Korintarja 2 - O Debleskro Lab 2024 (Sinte-Manouche)

O Menshengro gosvepen oun o Debleskro gosvepen

¹ Mire phrala, har vom pash t'mende, te sikrap t'mende o Debleskro drom, hoy t'mer gar prindjran, krom me kova gar bare oun goseve labentsa.

² Yaake rah, har homs pash t'mende, kamom me pral kek vavar koova te rakrell, har o Yezous Kristestar oun pral leskro merepen ap o troushel.

³ Oun har me pash t'mende homs, his kek zoor an mande, oun man his traash.

⁴ Me rakrom t'mentsa gar zorele oun goseve labentsa, te anap t'men ap o Debleskro drom. Na-a, o Debleskro Dourho rakras zoreles ap t'mende,

⁵ yaake te vas t'maro patsepen dran o Debleskri zoor oun gar dran i menshengro gosvepen.

⁶ Kova, hoy mer penah i patslenge, hi o Debleskro gosvepen. Kava gosvepen hi gar har ko gosvepen, kay vell kol menshendar, kay prindjrenn o Debles gar, vitar gar har o gosvepen kolendar, kay hi raya ap kay phoub. Kolla hounte merenn.

⁷ Mer rakrah pral o Debleskro gosvepen, hoy i menshe gomme gar prindjrenna. O bolepen oun i phoub his gomme gar koy, har his o Debles an o dji, te djivas mer leha khetne an leskro raylepen.

O Debleskro raylepen

⁸ Kova prindjran i raya ap kay phoub gar. Te nay dikans le an o Debleskro dji, dans le o Yezouses, ko rayes pral i tsele rayende, gar ap o troushel.

⁹ An o Debleskro lab hi činlo: Ko lačo koova, hoy kek yak dikas, oun hoy kek kand shounas, oun hoy an kek mensheskro dji dren vas, kova lauter dell o Devel kolen, kay les o djiyestar kamenna.

¹⁰ Men das o Devel peskro Dourho. Oun o Dourho sikrell men kova, hoy hi o Debles an o dji. O Debleskro Dourho dikell an halauter, ninna an o Debleskro dji.

¹¹ Hoy an o mensheste hi, djinell kokres leskro dji. Hoy an o Debleste hi, kova djinell kokres o Debleskro Dourho.

¹² An maro shero hi bouder gar ko koova, hoy hi kol menshen an pengro shero, kay prindjrenn o Debles gar. Mer lam o Debleskro Dourho. Doleske djinah, hoy o Devel menge kras.

¹³ Kava koova penah i menshenge. Kova krah mer gar labentsa, hoy venna dran o menshengro gosvepen. Na-a, mer rakrah kova, hoy o Debleskro Dourho menge penella. Yob krell, te hayvas mer o Debleskro koova, oun sikrah kova kolende, kolen ninna o Debleskro Dourho hi.

¹⁴ I mensho, koles o Debleskro Dourho gar hi, hayvell gar, hoy o Debleskro Dourho penella. O Debleskro koova hi leske dinlepen. Ko mensho nay dikell gar, har o Devel kova dikella.

¹⁵ I mensho, koles o Debleskro Dourho hi, kova dikell ap lauter yaake, har o Devel kova dikella. Kol menshen, kay o Debleskro Dourho gar hi, kolla nay hayvenn kol menshen gar, kolen o Debleskro Dourho hi.

¹⁶ Kova hi yaake, har an o Debleskro lab činlo hi: Kek djinella, hoy an o Debleskro dji hi. Kek nay vell leskro sikepaskro. Mer, kay patsle ham, men hi o Yezouseskro Dourho.