1. Korintarja 13 - O Debleskro Lab 2024 (Sinte-Manouche)

I gili pral o Debleskro kamlepen

¹ Ninna te rakroms me nay an hako rakepen, hoy i menshe oun i bolepangre rakrenna, oun te vals man gar o Debleskro kamlepen an miro dji, palle voms me har i bashepaskro, kay bashrell gar mishto. Leskro bashepen molella či.

² Te vals man gar o Debleskro kamlepen an o dji, palle molals ninna kova či, te penoms me i menshenge, hoy o Devel mande sikras. Te vals man gar o Debleskro kamlepen an o dji, palle molals ninna kova či, te djinoms halauter, hoy i vavar gar djinenna oun te hayvoms ko tselo Debleskro drom. Te vals man gar o Debleskro kamlepen an o dji, palle molals ninna kova či, te vals man yek zorelo patsepen, te penoms ap i berge: Hadenn t'men, oun yon hadenna pen.

³ Te vals man gar o Debleskro kamlepen an o dji, palle molals ninna kova či, te doms miro tselo bravlepen kol čorvelende, oun te moukoms man me djides pre te rhačrell.

⁴ Kones hi o Debleskro kamlepen an o dji, kova rikrella lauter vin. Yob hi lačo oun zilverella gar. Yob krell pes gar bares oun sharell pes gar.

⁵ Kones hi o Debleskro kamlepen an o dji, kova krell kek vi-ladjedo koova; oun dikell gar ap peste kokres. Yob dikell ninna ap i vavarende, te djal lenge mishto. Kones hi o Debleskro kamlepen an o dji, kova moukell pes gar rhoyedo te krell. Yob bistrell o čilačepen, hoy i vavar leske kran.

⁶ Kones hi o Debleskro kamlepen an o dji, kova hi gar barhtelo pral o čilačepen. Yob hi barhtelo pral o čačepen.

⁷ Te hi les o Debleskro kamlepen an o dji oun i menshe doukrenn les, hi yob gar rhoyedo pral kova. Kones hi o Debleskro kamlepen an o dji, kova patsell halauter. Yob dell o vavares gar pre, oun rikrell lauter vin.

⁸ Vell i tsiro, kay čivell o Debleskro Dourho i patslenge bouder kek lab an o dji. Vell i tsiro, kay dell lo len bouder kek vavar rakepen. Vell i tsiro, kay hounte vell men bouder kek gosvepen. Yek ačella: o Debleskro kamlepen.

⁹ Kanna djinah gar lauter o Deblestar, i tikno kotar kokres. Oun kova, hoy sikrell lo mende pestar, hi i tikno kotar kokres.

¹⁰ Yek tsiro vella, kay dikah lauter lestar oun bouder gar tikne kotya kokres.

¹¹ Har homs i tikno čavo, rakrom me har i čavo, oun dikom lauter har i čavo. Oun man his čavengro koova an o shero. Har vom i morsh, čivom o čavengro koova krik.

¹² Kanna dikah o Debleskro koova gar mishto. Mer dikah kova yaake har an o phouro blendari. Yek dives vella, kay dikah mer o Debles, har yob hi. Lauter, hoy me kanna lestar djinau, hi tikne kotya. Vell ko dives, kay prindjrau les yaake, har yob man prindjrella.

¹³ Kanna ačenna menge kalla triin: – O patsepen ap o Debleste; – i barht, te djinah mer, te vell lauter mishto; – o Debleskro kamlepen. O bareder kol trinendar hi o Debleskro kamlepen.