1. Korintarja 12 - O Debleskro Lab 2024 (Sinte-Manouche)

Hako patsles dell o Devel i boudi te krell

¹ Mire phrala, kanna kamau me pral kova te rakrell, hoy o Debleskro Dourho an t'mende čivas.

² Har t'mer gomme gar patslo hans, tserdas t'men bari zoryah pash kol figure, kay nashte rakrenn gar, kolen i menshe an-mangenna, har te vans le o Devel.

³ Doleske kamau te djinenn t'mer, hoy vella o Deblestar, oun hoy vell gar lestar. Oun me penau t'menge: Te rakrell yek, hoy o Debleskro Dourho leske an o mouy čivell, nay praasell lo gar o Yezouses. Oun kek nay penella: “O Yezous hi miro ray!” te hi o Debleskro Dourho gar an leste.

⁴ O Debleskro Dourho dell i patslende koy zoor, te nay boudrenn le o Debleske. Ninna te hi koy zoor pash hakeneste vavarčandes, hi yek Debleskro Dourho, kay dell yekes kava oun ko vavares kova.

⁵ Della boudeder boudi, hoy krenn i patsle o Debleske. Yon lauter boudrenna ko yek rayeske.

⁶ Oun della boud dromma, har o Debleskro Dourho an i patslende boudrella. Hi yek Devel, kolestar kova lauter vella.

⁷ An hakeneste boudrell o Debleskro Dourho yaake, kay hi kova i tsele patslenge mishto.

⁸ Ko yekes dell o Debleskro Dourho i gosevo lab, oun i vavares, te hayvell lo, hoy o Devel kamella. Oun yob penell kova i vavarenge doureder. Hi yek Debleskro Dourho, kay kova lauter krella.

⁹ I vavares dell yob i baro patsepen. Oun pale i vavares dell yob i zoor, te nay krell lo i nasselen sasto. Hi yek Debleskro Dourho, kay kova lauter della.

¹⁰ I vavares dell yob i zoor, te krell yob baro koova, hoy kek kokres pestar nay krella. Oun pale i vavar penell i menshenge, hoy o Devel leste sikras. Oun pale i vavar hayvella, hoy o Deblestar vella, oun hoy gar o Deblestar vella. Vavar rakrenn an vavar rakepen, hoy o Debleskro Dourho len das. Oun pale vavar penenn, hoy koy rakedo vas.

¹¹ Kova krell lauter ko yek Debleskro Dourho, oun yob dell hakenes kova yaake, har yob kamella.

I tsele patslen hi yek djipen o Yezouseha

¹² O mensho hi dran boudeder kotya, har moussya, herya, oun vavar. Ninna te hi lo dran boud kotya, hi lo yek mensho. Yaake hi ninna o Yezous Kristeha oun kolentsa, kay ap leste patsenna.

¹³ Kolla, kay ap o Yezous Kristeste patsenna hi bibolde oun kolla, kay kek bibolde hi, hi raya oun boudepangre. Kolla lauter lan o Debleskro Dourho. Ko Dourho anas len lauteren khetne.

¹⁴ O mensho hi gar dran yek kotar. Yob hi dran boudeder kotya.

¹⁵ Te penals i heri: “Me hom kek vast,” hi li palle kek kotar o menshestar? Na-a, i heri hi i kotar o menshestar.

¹⁶ Te penals o kand: “Me hom kek yak,” hi lo palle kek kotar o menshestar? Na-a, o kand hi i kotar o menshestar.

¹⁷ Te vals o tselo mensho i yak, kay vals palle o kand, hoy shounella? Te vals o tselo mensho i kand, kay vals palle o nak, hoy soungella?

¹⁸ O Devel čivas hako kotar yaake an o mensheste, har yob kamas.

¹⁹ Te vals o tselo mensho i heri, havo mensho vals kova?

²⁰ Boud kotya krenna yek mensho.

²¹ I yak nay penell gar ap o vast: “Me hayvau kova kokres. Dja touke!” Oun ninna o shero nay penell gar ap i herya: “Me krau kova kokres. Djan t'menge!”

²² O menshes hi ninna kotya, kay gar zorelo hi. Te vans kolla gar, nay djivals lo gar.

²³ Kol kotya, kay menge gar shoukar hi, kolla rivah shoukar an. Oun kol kotya, kay khatrah, ap lende dah mishto garda.

²⁴ Kol kotya, kolen mer gar khatrah, ap kolende das mer gar yaake mishto garda. O Devel kras o menshes yaake, te das mer boudeder garda ap kol kotya, hoy gar yaake shoukar hi har kol vavar.

²⁵ Yob kamas gar, te čingrenn pen i kotya. Yob kamas, te vell ko yek o vavareske koy.

²⁶ Te doukell yek kotar, palle doukenn kol tsele vavar ninna. Oun te vell yek kotar sharedo, hi kol tsele kotya barhtele.

²⁷ T'men hi lauter yek djipen o Yezous Kristeha, oun hakeno t'mendar hi i kotar lestar.

²⁸ Kote, kay i patsle khetne venna, das o Devel hakenes i boudi. Peskre bičepangren das lo koy boudi, te penenn le i menshenge peskro lab. Oun vavar hi o Debleskre rakepangre, kay penenna, hoy o Devel len sikras. Koy hi ninna sikepangre, kay sikrenn i menshende o Debleskro drom, oun kolla, kay krenn baro koova an o Debleskri zoor, kay kek kokres pestar nay krella. Vavaren das yob i zoor, te krenn le i nasselen sasto. Hi patsle, kay hi o vavarenge koy, oun ninna vavar, kay rikrenn i patslen khetne, oun pale vavar, kay rakrenn nay an i vavar rakepen, hoy o Debleskro Dourho len das.

²⁹ Gar halauter hi o Deblestar bičedo, te penenn le i menshenge leskro lab. Gar halauter hi o Debleskre rakepangre. Gar halauter hi sikepangre. Gar hakeno nay krell i baro koova an o Debleskri zoor.

³⁰ Gar halauter lendar lan koy zoor o Deblestar, te krenn le i nasselen sasto. Gar halauter lendar nay rakrenn an i vavar rakepen, oun gar hakeno nay penell, hoy koy rakedo vas.

³¹ Mangenn o Deblestar, te čivell leskro Dourho kol zorya an t'mende, kay i patslenge i feteder hi. Oun kanna sikrau me t'men i drom, hoy pral hako vavar drom hi.