1. Johanni 5 - O Debleskro Lab 2024 (Sinte-Manouche)

Maro patsepen hi mari zoor

¹ Kolla, kay patsenna, kay o Yezous o baro ray hi, kolestar o Devel penas, te vell yob, kolla hi o Debleskre čave. Oun hakeno, kay kamell o dades, kova kamell ninna leskre čaven.

² Kava hayvam: Mer te kamah o Debles čačepah, oun krah, hoy yob penella, palle kamah leskre čaven ninna.

³ Maro kamlepen o Debleske sikrell pes, te krah mer kova, hoy yob menge penella. Oun kova, hoy yob menge penella te kras, kova hi gar pharo.

⁴ Hoske? Kolla, kay o Debleskre čave hi, hounte krenn bouder gar ko čilačo koova, hoy i menshe ap kay phoub krenna. Maro patsepen hi mari zoor pral o čilačo koova, hoy i menshe ap kay phoub krenna.

⁵ Ava, kova, kay patsella, kay o Yezous o Debleskro čavo hi, koles hi i zoor pral o čilačo koova, hoy i menshe krenna.

⁶ O Yezous Kristo vas pash mende. Yob vas taufedo an o pani oun meras ap o troushel. Har meras lo, ratas lo peskro rat. Hi gar kokres leskro thopen an o pani, na-a, ninna leskro rat sikrell mende, kay yob o Debleskro čavo hi. Oun o Debleskro Dourho penell menge kova ninna. Oun o Debleskro Dourho penell o čačepen.

⁷ Kolla hi triin, kay sikrenn mende, kay o Yezous o Debleskro čavo hi:

⁸ O Debleskro Dourho, ko pani oun ko rat. Hake triin penenn ko yek koova.

⁹ Te shounah mer ap i menshende oun patsah, hoy yon penenna, hoske patsah gar, hoy o Devel penella? Kova, hoy o Devel penella, hi bareder har kova, hoy i menshe penenna. Oun o Devel penas, kay o Yezous Kristo peskro čavo hi.

¹⁰ Koon ap o Debleskro čaveste patsella, kova djinella an peskro dji, kay hi kova čačo, hoy o Devel pral o Yezous Kristeste penas. Koon o Debles gar patsella oun leskre laba gar patsella, hoy o Devel pral peskro čaveste penas, kova penella, te rhorhras o Devel.

¹¹ O Devel penas čačepah, te dell lo men ko djipen, hoy gar pre-herella. Oun ko djipen hi an peskro čaveste.

¹² Kones o čavo an peskro dji hi, koles hi ko djipen, hoy gar pre-herella. Kones o Debleskro čavo gar an peskro dji hi, koles hi ko djipen gar.

¹³ Me činom t'menge, te djinenn t'mer, kay t'men ko djipen hi, hoy gar pre-herella. Ko djipen hi kolenge, kay ap o Debleskro čaveste patsenna.

O Devel shounell maro mangepen

¹⁴ Ko yek djinah: Te mangah o Deblestar čomone, yaake har yob kova kamella, yaake shounell lo men.

¹⁵ Oun te djinah mer, kay yob men shounella, djinah mer ninna, kay yob men kova das, hoy mer lestar mangam.

¹⁶ Te dikeh tou, te kras i vavar patslo i čilačo koova, palle hounte mangess tou o Debles leske! Oun o Devel dell les o djipen. Della ninna i doosh, hoy anell an o merepen. Oun me penau gar, te mangess tou o Debles kolenge, kay koy doosh ap pende lan.

¹⁷ Hako kopo, kay mer i čilačo koova krah, anah mer doosh ap mende. Gar haki doosh anell i menshen an o merepen.

¹⁸ Mer djinah, o Debleskre čave ačenn gar ap i čilačo drom. O Debleskro čavo dell garda ap lende. Oun o beng nay krell len či.

¹⁹ Mer djinah, kay ham o Deblestar. I tsele vavar menshe ap i phoub hi an o bengeskro vast.

²⁰ Mer djinah, kay o Debleskro čavo ap kay phoub vas, te krell lo mare yaka pre, te prindjras o čačo Debles. Oun yaake har mer ham khetne o Debleskro Čaveha, o Yezous Kristeha, yaake ham khetne o čačo Debleha. O Yezous Kristo hi o čačo Devel. Oun yob dell ko djipen, hoy gar pre-herella.

²¹ Doleske, mire čave, denn yak, te mangenn o čačo Debles kokres an oun kek vavares!