1. Johanni 4 - O Debleskro Lab 2024 (Sinte-Manouche)

I rhorhene sikepangre

¹ Lače phrala oun phenya, ma patsenn hakenes, koon penella, te hi les o Debleskro Dourho! Dikenn ap leskro rakepen, te djinenn t'mer, te vell kova čačepah o Deblestar! Boud rhorhene rakepangre nashenn ap i phoub trouyel. Kolla penenna i menshenge, te vell lengro rakepen o Deblestar. Kova hi gar čačo.

² Har nay djinah, te hi o Debleskro Dourho an yekeste? Hakeno, kay penell glan i menshende, kay o Yezous Kristo vas i mensho dran mass oun rat, koles hi o Debleskro Dourho.

³ Koon kova bourhoste della, an koleste hi gar o Debleskro Dourho. Yaake rakrell o rhorheno, kay hadell pes pral o Yezous Kristeste. T'mer shounan, kay kova vella. Yob hi kanna ap kay phoub.

⁴ Mire čave, t'mer han o Deblestar, oun han zorleder har kol rhorhene rakepangre. O Debleskro Dourho, kay an t'mende hi, hi zorleder har o beng, kay an i menshende hi, kay o Debles gar prindjrenna.

⁵ I rhorhene rakepangre hi menshe kay phoubyatar. Doleske rakrenn le har i menshe, kay prindjrenn o Debles gar. Oun i menshe shounenn ap lende.

⁶ Mer ham o Deblestar, oun hakeno, koon o Debles prindjrella, shounell ap mende. Koon hi gar o Deblestar, kova shounell gar ap mende. Doleske djinah mer, kones o Debleskro Dourho hi, kay rakrell o čačepen, oun kones o rhorheno dourho hi.

O Debleskro kamlepen djivell an mende

⁷ Lače phrala oun phenya, o djiyeskro kamlepen vella o Deblestar. Doleske hounte vell men i dji mare phralenge oun phenyenge an o patsepen. Kolen, kay hi i dji i vavarenge, kolla hi o Debleskre čave, oun prindjrenn o Debles.

⁸ O Devel hi pherdo djiyeskro kamlepen. Kones kek dji o vavareske hi, kova prindjrell o Debles gar.

⁹ O Devel sikras men peskro kamlepen, har bičras lo peskro čaves ap kay phoub, te las mer lestar o čačo djipen.

¹⁰ Kava hi o Debleskro kamlepen: Hi gar yaake, kay mer kamam o Debles. Na-a, yob kamas men, oun bičras peskro čaves, te lell yob mari doosh ap peste.

¹¹ Lače phrala oun phenya, o Debles hi savo baro dji menge. Doleske hounte vell men ninna i baro dji mare phralenge oun phenyenge an o patsepen.

¹² Kek mensho dikas o Debles. Te hi men i dji i vavar patslenge, ačell o Devel mentsa. Oun leskro tselo kamlepen hi an mende.

¹³ O Devel das men peskro Dourho. Ap kova hayvah mer, kay o Devel mentsa hi, oun mer leha ham.

¹⁴ Mer dikam, kay o Devel, maro dad, peskro čaves bičras. Doleske penah mer i menshenge, kay yob kova hi, kay lell len vin dran o čilačepen oun o merepen.

¹⁵ Koon glan i menshende penella, kay o Yezous o Debleskro čavo hi, koleha ačell o Devel, oun yob ačell o Debleha.

¹⁶ Mer hayvam ko čačo kamlepen, hoy o Debles menge hi. Oun mer patsah, te kamell men o Devel čačepah! O Devel hi pherdo kamlepen. Koon an o Debleskro kamlepen ačella, kova ačella o Debleha, oun o Devel ačell leha.

¹⁷ Mer te ham pherdo Debleskro kamlepen, palle hi men bouder kek daar glan o Debleste ap ko dives, kay o Devel o čačepen vi-rakrella pral i tsele menshende. Ninna te ham mer kanna ap kay phoub, ham mer o Debleha khetne, yaake har o Yezous Kristo o Debleha khetne hi.

¹⁸ Kones o Debleskro kamlepen an peste hi, koles hi kek traash. O Debleskro kamlepen tradell i traash vin. Koon trashella, te nay lell lo i phagi, koles hi gar o tselo Debleskro kamlepen an peste.

¹⁹ O Devel kamas men o djiyestar. Doleske kamah mer o Debles oun i menshen ninna.

²⁰ Te penell yek: “Me kamau o Debles,” oun krell peskro phraleske čilačepen, kova hi i rhorheno. Yob kamell gar peskro phrales, koles yob nay dikella. Har nay kamell lo o Debles, koles yob nay gar dikella?

²¹ Kava hi, hoy o Yezous menge penas: Koon o Debles kamella, kova hounte kamell ninna peskro phrales o tselo djiyestar.