1. Johanni 1 - O Debleskro Lab 2024 (Sinte-Manouche)

O lab, hoy dell men o djipen

¹ Mer činah t'menge pral koleste, kay his hako tsiro koy. Mer shounam les, oun dikam les. Ava, mer dikam les mare yakentsa, oun tapram les mare vastentsa. Yob hi ko lab, hoy o djipen della.

² Ava, ko djipen vas pash mende, oun sikras pes mende. Mer dikam les. Doleske rakrah mer kolestar, kay dikam oun shounam. Oun mer penah t'menge, koon ko djipen della, hoy gar pre-herella. Kova his pash peskro dadeste an o bolepen, oun vas pash mende.

³ Kova, hoy mer dikam oun shounam, penah mer t'menge, te nay vas mer t'mentsa khetne an o čačepen. Oun čačepah, mer ham khetne o Debleha, kay hi maro dad an o bolepen, oun leskro čaveha, o Yezous Kristeha.

⁴ Kova lauter činah t'menge, te venn mare djia oun t'mare djia pherdo barht.

O lab, hoy mer shounam o Yezous Kristestar

⁵ Kova, hoy t'menge penah, shounam o Yezous Kristestar. Lestar shounam, kay hi lauter lačepen an o Debleste. Oun kek čilačepen hi an leste. O Devel hi har o dives oun kek tamlepen hi an leste.

⁶ Mer te penah, te ham khetne o Debleha, oun djivah an o čilačepen, palle ham rhorhene, oun djivah gar pal o čačepen.

⁷ Mer te djivah khetne o Debleha an o čačepen, yaake har o Devel an o čačepen tardo hi, palle nay ham mer ninna lauter khetne an o čačepen. Oun o rat leskro čavestar thovell mari tseli doosh mendar tele.

⁸ Mer te penah: “Men hi kek doosh an maro djipen”, yaake rhorhah men kokres, oun mer ham gar an o čačepen tardo.

⁹ Mer te mangah men tele glan o Debleste, oun penah leske, havi doosh mer ap mende lam, palle krell lo, hoy yob penas oun lell i doosh mendar krik. Yob hi lačo oun čačo oun thovell o tselo čilačepen mendar tele.

¹⁰ Mer te penah, kay lam kek doosh ap mende, palle krah, har te vals o Devel i rhorheno. Oun mer djivah gar pal leskro lab.