TITA 2 - Thuhun Thah (BSI)

Khristian gamtat leh dinmun thu a hilhna

¹ Hizongleh nang chu thugin dih toh kilawm thute soi in;

² Puteehte chu lungsim dihtah, zahum, kisuumthei, huleh ginna leh, lungsiatna leh, kuhkalna a dihtah hi diingin hilh in.

³ Piteehte zong huchibangmah in siangthouna toh kilawma gamta diing leh, dihloutaha miheeh haat leh uain haite hilou a, sil hoih hilhtute hi diingin hilh in.

⁴ Huchia amahun numei khanglaite chu lungsim dihtah nei a, a pasalte uh lungsiat a, a tate uh lungsiat a,

⁵ Pathian thu chu soisiata a um louhna diing a kiveeng a, siangthou a um a, innsung nna tong a, hoihtah a um a, a pasalte uh thu mang a um diinga a hilh theihna diingun.

⁶ Huchimahbangin tangvalte chu lungsim dihtah nei diingin hasot in.

⁷ Sil zousiah ah sil hoih bawlna lam a etton diingin kimusah inla; thugin ah siatna um louhdan, a kipdan, a tahdan bang ensah in.

⁸ Thusoi dihtah, soisel guallouh bang a kilat a, lehlam a pangte na tunga sil gilou soi diing nei lou a, a zahtaat theihna diingin.

⁹ Suaahte chu a pute uh thu mang diing leh, sil zousiaha a kipaahna zawng va um diingin hasot in; mi dawn haat lou diingin.

¹⁰ Pathian i Hundampa uh thuhilhna thu chu sil zousiaha a zephoih theihna diing va khutthem nei loua, ginumna hoih zousiah musah zaw diingin.

¹¹ Ajiahchu hutdamna hung tut Pathian hehpihna chu mi zousiah kawmah ahung kilangta hi,

¹² Hu inchu Pathian ngaihsah louhna leh khovel utnate tawpsan a, hi tulai khovel a lungsim siang leh, dihtattah leh, Pathian ngaihsaha um in;

¹³ Hu kinepna kilawphuaitah, Pathian loupi leh i Hundampa uh Jesu Khrist hung kilatna diing loupitah chu ngaah in i um diing uh ahi chih ahung hilh hi;

¹⁴ Ama’n chu giitlouhna zousiah apat ahung tat theihna diingin leh, amah diing a sil hoih bawl a phatuamngai leh teeltuam hi diing a ahung suhsiangthou theihna diingin i luang in a kipeta hi.

¹⁵ Hi thute soi inla, huleh thuneitahin vau in. Koima’n nang hung musit sih heh.