TIMOTHI II 4 - Thuhun Thah (BSI)

¹ Hujiahin Pathian ma leh, amah leh a lalgam hung kilat chianga mihing leh misite vaihawmsah diingpa, Lalpa Jesu Khrist ma-ah thu ka hung pia hi;

² Thu chu soi in; a hun ah bang, a hun lou ah bang pang jel in; thuaahtheitaha thuhilh pum in a siam louhdan uh hesah inla, taihilh inla, hasot in.

³ Ajiahchu thuhilhna dih a ngaihkhiah peih louh hun uh hung tung diing ahi a; a bilte uh a lawp jiahin amahuh deihzawng bangin a kawmvah houtu a khawm diing uh,

⁴ Huleh a bilte uh thutah lam apat a heimang diing va, taangthu lam nga in a dohta diing uhi.

⁵ Hizongleh nang chu sil zousiah ah pilvaang inla, gimthuaah inla, tanchinpha soitu nna tong in, na natohna chu sutaangtung in.

⁶ Ajiahchu tuin kei chu lat diing jiang a um ka hita a, ka paikhiah hun a tungta hi.

⁷ Kidouna hoih chu ka douta a, kitaidemna chu ka zouta hi, ginna chu ka kemta hi.

⁸ Tuin chu dihtatna lallukhuh kei diingin koih in a umta, huchu Lalpa vaihawmtu dihtahin hu ni chiangin ahung pe diing hi; huleh kei kawmah chauh hilouin, amah kilaahna ngaina photmahte kawma zong a pe diing hi.

⁹ Kintahin ka kawmah hung teitei in;

¹⁰ Ajiahchu Dema in tulai khovel a ngaihnat jiahin ahung paisanta a, Thessalonika khua ah a chiahta hi; Kresen chu Galatia gam ah a chiahta hi; Tita chu Dalmatia gam ah a chiahta hi.

¹¹ Luke chauh ka kawmah a um hi; Mark zawn inla, hung tonpih in; ajiahchu thunatohna lamah amah kei diingin a phatuam mahmah hi.

¹² Tikika chu Ephesa khua ah ka sawlta hi.

¹³ Na hung chiangin Troas khua a Karpa kawma puannaahtual ka nuutsiat khu lehkhabute toh hung pua in, a diahkholin savun lehkhabute khu.

¹⁴ Alexander, sumsungpa ka tungah a gilou mahmah hi; Lalpa’n a natoh bangjelin a thuh diing hi.

¹⁵ Amah apat nang zong pilvaang in; ajiahchu ama’n i thute a dou naah mahmah hi.

¹⁶ Ka siamna thu ka soi masatpen laiin koima’n ahung panpih sih a, mi zousiah in ahung taisan veh zota uhi; a moh u’chu puaah tuan dah u’heh chi'n Pathian kawmah ka ngen hi.

¹⁷ Hizongleh Lalpa’n ahung dinpih a, ahung suhaatta hi, tanchinpha kisoi chu kei jiaha kintaha heet a, a um a, Jentelte zousiah in a jah theihna diingun; huleh humpibahnei kam apatin suahtaatsah in ka umta hi.

¹⁸ Huleh Lalpa’n migilou chinteng laha kipanin ahung suahtasah diing a, a vaangam ah bittahin ahung tut diing hi; a kawmah kumtuang kumtuang in loupina umta hen. Amen.

¹⁹ Priska leh Akuila, huleh Onesiphora innkuanpihte chibai hung buuhsah in.

²⁰ Erasta chu Korinth khua ah a um zingta hi; Trophima ahihleh Miletam khua ah damlou in ka nuseta hi.

²¹ Phalbi ma in hung tum teitei in. Eubula te, Puden te, Lina te, Klaudia te leh unau zousiah in chibai ahung buuh uhi.

²² Lalpa Jesu Khrist chu na hagau kawma um hen. Hehpihna na kawmah um hen. Amen.