TIMOTHI II 1 - Thuhun Thah (BSI)

Chibaibuuhna leh kipaahthu soina

¹ Paul, Khrist Jesu a um hinna thuchiam dungjuia Pathian deihzawng a Jesu Khrist sawlleh in;

² Ka ta deihtah Timothi kawmah; Pa Pathian leh Khrist Jesu i Lalpa uh kawma kipan hehpihna leh, khotuahna leh, huleh hamuanna um hen.

³ Suun leh jana tawplou a ka haamteinate a ka hung heet zing jiahin, ka pilepute a kipana sialepha heetna siangtah neia a nna ka toh zingpa ka Pathian kawmah kipaahthu ka soi hi.

⁴ Kipaahna a ka dim theihna diingin, na mittuite he zingin, nangmah hung muh ka ut mahmah hi;

⁵ Ginna tuailou nangmah a um chu ka ngaihtuah tahchiangin, hu ginna chu a masapenin na pi Lois ah a um a, na nu Eunisi ah zong a um a, huleh nangmah ah zong a um chih dihtahin ka he hi.

Phatuamngai diing leh haangsan diing a hilhna

⁶ Hujiahin ka khutngah jiaha Pathian silpiah nangmah a um chu muut kuang diingin ka hung henonsah hi;

⁷ Ajiahchu Pathian in launa hagau ahung pe sih a; hizongleh silbawltheihna leh, lungsiatna leh, lungsim sianthouna hagau ahung pe zaw hi.

⁸ Hujiahin i Lalpa thuheetpihna chu zumpih sinla, amah mitaang kei zong hung zumpih sin; ahihvangin Pathian silbawltheihna bang jel a tanchinpha jiaha gimthuaahna thuaahpihtu hizaw in.

⁹ Ama’n chu i silbawlte dungjui hilou in, amah guat leh a hehpihna dungjuiin ahung hundam a, kouhna siangthou in ahung kouta hi, huchu leilung pianma a Khrist Jesu a ahung piah ahita hi.

¹⁰ Hizongleh ahung hundampa Jesu Khrist kilaahna jiahin tuin suhlat in a umta hi, ama’n chu sihna sumang in, tanchinpha jalin hinna leh sihtheihlouhna chu vaah ah ahung tunta hi.

¹¹ Hu tanchinpha thu chu Jentelte hesah diingin thusoitu diing leh, sawlleh diing leh, hilhtu diing a guat ka hi hi.

¹² Hujiahin ahi hi silte zong ka thuaah; hizongleh ka zum sih hi; ajiahchu ka gintaatpa ka he hi, huleh a kawm a ka kolsah chu hu nia diingin a kolbit thei chih chiantahin ka he hi.

¹³ Khrist Jesu a um ginna leh lungsiatna nei in, thu dihdan ka kawma na jahte chu tukip in.

¹⁴ Sil hoih na kawm a kolsaha um chu i sunga Hagau Siangthou um in kol hoih in.

¹⁵ Asia gam a um zousiahte’n ahung nungheisan uh chih na he hi; a lahvah Phigela leh Hermojini a tel uhi.

¹⁶ Lalpa’n Onesiphora innkuanpihte kawmah khotuahna pia heh; ajiahchu ama’n ahung suhalh jeljel a, ka khainiang buh zong a zumpih sih hi;

¹⁷ Rome khua a a um laiin houh nguntahin ahung hawl a, ahung mudoh hi.

¹⁸ Hu ni chianga Lalpa kawma khotuahna a muh diing Lalpa’n phalsah hen; huleh Ephesa khua a sil tampi a ka na a tohzia hoihtahin na he hi.