TIMOTHI I 6 - Thuhun Thah (BSI)

¹ Pathian min leh a thuhilhna soisiat a, a umlouhna diingin suaah ngawngkol baat photmahte’n amahuh pute chu bangkimah zahbawltaah in sim u’heh.

² Huleh gingtu mi pu a neite’n unau ahihjiahun musit sih u’heh; ahihvangin ginum leh deihtahte leh, phattuamna mute ahihjiahun a nna uh tohsah u’heh. Hi thute hilh inla, hasot in.

³ Mi koipouh in thuhilhna dang a hilh a, thutah, i Lalpa Jesu Khrist thu leh, Pathian ngaihsahna lam thuhilhna hoih a sah louhleh;

⁴ Amah chu a kisathei ahi a, bangmah he lou ahi; heet malah in kinial leh thukalh lamah a ngol zota hi; huchibanga kipanin thangsiatna, kinialna, daalna, kiginmohna hoihloute,

⁵ Lungsim gilou nei a, thutah nei lou minialhaatna bang ahung suaah veu hi; huchibang mite chu Pathian ngaihsah punna a ngai mi ahi uh; huchibang mi apat kihemkhia in.

⁶ Hizongleh lungkimna toh Pathian ngaihsah chu punna nasatah ahi.

⁷ Ajiahchu khovel ah bangmah i poluut sih a, bangmah i podoh het sih diing uhi.

⁸ Huchi'n neeh diing leh silh diing nei in hute ah i lungawi diing uh.

⁹ Hizongleh hauhsat tumte chu heemna leh, thaang ah, utna ngolhuai leh, susethei tampi bangah a puuhluut veu va, hute’n chu siatna leh manthaina ah mite a sutum veu uhi.

¹⁰ Ajiahchu sum ngaihnat hi gilou zousiah bulpi ahi; huchu khenkhat in a deihgoh va, ginna a paimangsan uh, huleh amahuh leh amahuh lungkhamna tampi in a kisunlet uhi.

¹¹ Hizongleh, Aw nang Pathian mipa, hi silte taisan inla, dihtatna bang, Pathian ngaihsahna bang, ginna bang, lungsiatna bang, dohtheihna bang, thunuaigolhna bang delh zaw in.

¹² Ginna kidouna hoih dou inla, kumtuang hinna chu tu in; hu tang diing a kouh zong na hi a, huleh heetpihtu tamtah mitmuh in gupna hoih chu na gumta hi.

¹³ Sil bangkim suhingtu Pathian leh, Pontia Pilat ma a gupna hoih gumpa Khrist Jesu mitmuh in thu ka hung pia hi.

¹⁴ I Lalpa Jesu Khrist hung kilat masiah hi thupiah chu siangthou leh soiselbei a kol diingin;

¹⁵ Hu kilatna chu, amah huntah ah, phattuaah Thuneipa chauh, kumpipate Kumpipa, lalpate Lalpa’n ahung lah diing hi;

¹⁶ Amah chauh in sihtheih louhna a nei a, koimah naih theih louh vaah ah a um a, amah chu koima’n a mu ngei sih a, mu zong a muthei sih hi; amah kawmah kumtuang loupina leh silbawltheihna um hen. Amen.

¹⁷ Hi khovel a mihausate chu kisathei lou diing leh, hauhsatna kiplou a muanna nga loua, sil zousiah i kipaahna diing a kichingtah mei a hung petu Pathian tunga nga zaw diingin;

¹⁸ Sil hoih bawl diingin, silhoih bawl hau diingin, silphal diingin, kihop ut diingin;

¹⁹ Kumtuang hinna a tuuhdet theihna diing va hun hung tung diing a diing innbulkip hoihtah amahuh diing a kholkhawm diingin hilh in.

²⁰ Aw Timothi, na kawma kolsah a um chu kol hoih in, Pathian zahlouhna thusoi meimei leh, dihloutaha pilna kichi kikalhna chu pumpelh in.

²¹ Huchu khenkhat in nei a kisa va, ginna lamah a sukhialta uhi. Hehpihna na kawmah um hen. Amen.