TIMOTHI I 1 - Thuhun Thah (BSI)Chibaibuuhna leh thuhilhna dihlou thu a hilhlawhna 1 Paul, i Hundampa uh Pathian leh, i kinepna uh Lalpa Jesu Khrist thupiah banga Jesu Khrist sawlleh in; 2 Ginna a ka tapa tahzet Timothi kawmah; Pathian i Pa uleh i Lalpa uh Jesu Khrist kawma kipan, hehpihna leh, khotuahna leh, hamuanna umta hen. 3 Makedonia gam a ka chiah diing kuan a, Ephesa khua a um zing diing a, mi khenkhat in kihilhna dihlou a hilh louhna diing uleh, 4 Ginna a Pathian ngaihsah khosahdan um suhkhang sang a kinialna siam zoveu, taangthu pouh leh khang thu suiseenglouh meimei a ngaihsahlouhna diing va kawh diing a ka hung nget bangin, huchi'n bawl in. 5 Huleh thupiah kipiahnasan chu, lungtang siangthou leh, sialepha heetna hoih leh, ginna dihtah akipan lungsiatna neih ahi. 6 Mi khenkhatte a chiah kawi jiahun huchu a peetsan va, thulimlou soina lamah a chiahta uhi. 7 A thusoi uh umdan leh a chihtahna uh he lou in daan hilhtute hih a ut uhi. 8 Hizongleh daan chu a hoih chih i he ngal a, mi’n daan bangtah a, a jat inchu. 9 Hichu he in, daan chu midihtatte diinga bawl ahi sih a, daan poisalou leh, daan bohsete a diing, Pathian ngaihsahlou leh misualte a diing, misianglou leh Pathian zahloute a diing, pate thatte leh nute thatte a diing, mihing thatte a diing, 10 Kingaih haatte a diing, pasal kisubuahtuahte a diing, mihing gute a diing, zuau haatte a, diing, zuau a kihaahsialte a diing, huleh thugin dih toh kikalh sildang a um leh, hute a diingin ahi; 11 Ka kawma kolsah a um, paahtawitaah Pathian loupitah tanchinpha dungjuiin. 12 Huleh thunatongtu a hung koih a ginum a ahung sim jiahin, ahung suhaattu, Jesu Khrist, i Lalpa u’chu ka phat ahi. 13 Tumalaiin Pathian soisetu leh suduhdahtu leh sunatu ka na hi a; hizongleh khotuahna ka muta hi, ginlouhna a he lou a na bawl ka hih jiahin. 14 Huleh i Lalpa uh hehpihna chu Khrist Jesu a um ginna leh lungsiatna in a dimlet ahi. 15 Khrist Jesu chu misualte hundam diingin khovel ah ahung hi chih hi thu gintaat umleh, pomtaah mahmah ahi; hu misualte laha lianpen ka hi. 16 Hijiangzongleh, tunungsiah a kumtuang hinna diinga amah hung gingta diingte etsahna diingin Jesu Khrist in a thuaahzohdan keimah a, a suhlat masat theihna diingin hikhu jiahin khotuahna ka mu hi. 17 Tuin kumtuang kumpipa si thei lou, muhtheihlouh, Pathian pil chauh kawmah zahna leh loupina um zingta hen. Amen. 18 Ka tapa Timothi, tuma a na kawma tanchin kisoilawh thute dungjuiin hi thupiah chu ka hung pia ahi, hute a kidouna hoih na dou theihna diingin. 19 Ginna leh sialepha heetna hoih chu tukip in; huchu mi khenkhatte’n a paaikhia va, ginna lamah kuang sia bangin a keehgawpta uhi; 20 Amahuh lahah Himena leh Alexander ahi uh; Pathian soisiat louh a zil theihna diingun amahuh chu Setan kawmah ka peta hi. |
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
Bible Society of India