THUPHUANDOH 9 - Thuhun Thah (BSI)

¹ Huin angel ngaana in a muut a, aahsi khat vaan apat a leia kesuh ka mu a; huleh a kawmah kokhuuh tobei chabi piah in a um hi.

² Huleh ama’n kokhu a tobei chu a hong a; huin hu kokhuuh apatin haaltuina mei nasatah khuu bangin meikhu ahung pawtdoh a; huleh hu kokhuuh a meikhu jiahin ni leh vaan ahung mialta hi.

³ Huleh hu meikhu lah apatin khauphe leitung ah ahung pawtdoh a; leia momaaite silbawltheihna neih bang silbawltheihna a kawmvah piah ahi uh.

⁴ Amah u’chu, a tal va Pathian chiamchihna neiloute chauh chih louh, leia hampa aha, sil hing aha, ahihlouhleh sing mawngmawng suse lou diing a thupiah ahi uhi.

⁵ Huleh amahuh chu hute that lou a, hizongleh ha ngaa sung sugenthei diing a hilh ahi va; huleh a suhgentheihna u’chu momaai in mi a peh chianga natdan bang ahi.

⁶ Huleh hu ni chiangin mite’n sihna a hawl diing va, hizongleh a mu sih diing uh; sih a ut diing va, hizongleh sihna in amahuh a taimangsan diing hi.

⁷ Huleh hu khauphete meel chu gaal kuan diing a guatsa sakolte bangmai ahi va; a lutung vah sana tobang lallukhuh hileh kilawm a khuh uh, huleh a maai u’chu mihingte maai bang ahi.

⁸ Amahun numei sam tobang sam a nei va, a haa u’chu huumpibahnei haa bang ahi.

⁹ Huleh amahun siih awmphaw hileh kilawm a nei va; huleh a ha zaapging u’chu gaal a kuan sakol tampi kaangtalai ging bang ahi.

¹⁰ Amahun momaai bangin mei a nei va, a mei vah gu a um hi; huleh a silbawltheihna u’chu mihingte ha ngaa sung suhnat ahi.

¹¹ Huleh amahun kokhuuh tobei angel chu a tungvah kumpipa in a nei va; a min chu Hebrai haam in Abbadon ahi a, hizongleh Grik haam in chu a min Appolion ahi.

¹² Tunggihna khat a beita a, tunggihna nih ahung tung nalai diing hi.

¹³ Huin angel guupna in a muut a, Pathian ma a um sana maitaam ki lite akipan aw ka ja a,

¹⁴ Pengkuul nei angel guupna kawm a, Euphrates luipi lian a angel li kaana umte khu suut in, chi'n.

¹⁵ Huchi'n a pung leh, a ni leh, a ha leh, a kum huntaha mihingte mun thum a khen mun khat that diing a kikoih angel lite chu phelin a umta a.

¹⁶ Huleh hu sakol tungtuang gaalmite tamdan chu saang mun saang ja nih ahi uh; a phaahzah uh kisoi ka ja hi.

¹⁷ Huleh hichibangin kilaahna in sakolte leh a tunga tuang, mei leh ngen leh kaat awmphaw neite chu ka mu a; hu sakolte lutang chu humpibahnei lutang tobang ahi a; huleh a kam sung vapatin mei leh, meikhu leh, kaat a suaahdoh hi.

¹⁸ Hi sil thum, a kam vapat hung suaahdoh, mei leh, meikhu leh, kaat in mihingte mun thum a khen mun khat thah in a umta uhi.

¹⁹ Ajiahchu hu sakolte silbawltheihna chu a kam uleh a mei va um ahi a; a mei u’chu guul tobang ahi; huleh lutang a nei va, hute a mi a suhnat uh ahi.

²⁰ Huleh hi gawtnate a si lou midang siah chu dawite leh, mu lah mu thei lou, jalah ja thei lou, pai lah pai thei lou, sana milemte leh sing milemte a biah louhna diing va a khut va a silbawlte uh tawpsan diingin a kisiih tuan sih uhi.

²¹ Huleh a tualthahna uleh, a mibumna uleh, a aangkawmna uleh a guuhtaatna vapatin zong a kisiih tuan sih uhi.