THUPHUANDOH 6 - Thuhun Thah (BSI)

Belaamnou in chiamchihnate a phelna

¹ Huleh Belaamnou in chiamchihnate laha khat a phel ka mu a, huleh aw vaan ging bangmai in silhing lite laha khat in, Hung en in, a chih ka ja a.

² Huin ka et leh, sakol kaang khat ka mu a; a tunga tuangpa’n thalmung a tawi a; huleh a kawmah lallukhuh khat a kipia a; amah chu gualzou leh, gualzou jel diingin a kuankheta hi.

³ Huleh chiamchihna nihna a phel zohin silhing nihna in, Hung en in, a chih ka ja a;

⁴ Huleh sakol dang, a san khat ahung pawtdoh a; a tunga tuangpa kawma chu, leitung apat hamuanna laahsah theihna leh, mite khat leh khat a kithahtuahna diing uh thuneihna a kipia a; huleh a kawmah namsaau liantah piah ahi.

⁵ Huleh chiamchihna thumna a phel zohin silhing thumna in, Hung en in, a chih ka ja a. Huleh ka et leh ngai in, sakol vom khat ka mu a; a tunga tuangpa in a khut in buuhna a tawi a.

⁶ Huleh silhing lite lai apatin aw khat in, Makhai khat in gehu dan khat, makhai khat in taang dan thum; huleh sathau leh uain chu suse sin, a chih ka ja hi.

⁷ Huleh chiamchihna lina a phel zohin silhing lina in, Hung en in, a chih ka ja a.

⁸ Huleh ka et leh ngai in, sakol dang khat ka mu a; a tunga tuangpa min chu Sihna ahi a, huleh misikhua in amah a jui a. Huleh amahuh kawma chu namsaau toh, kial toh, sihna toh, huleh leitung a gamsate a thah diingin leitung seh li suah seh khat piah ahi.

⁹ Huleh chiamchihna ngaana phel zohin, maitaam nuaiah Pathian thu jiah leh, a heetpihna pom jiaha thahte hagau ka mu a;

¹⁰ Amah u’chu aw ngaihtaha kikou in, Aw Lalpa, siangthou leh dih, bangtan ahiai leitung a teengte tunga vaihawm lou leh, ka sisan uh phuba la lou a na um diing? a chi uh.

¹¹ Huleh amahuh chu puan vaam a kipe chiat a; a suaah hihpihte uleh a unaute uh, amahuh bangmaha thaha um diingte ahung kim masiah uh tomkhat na khawl tadih diing a, a kawmvah hilh ahi uhi.

¹² Huleh chiamchihna guupna a phel zohin, ka en a, jil nasatahin a kiliing a; huleh ni chu samul saiippuan bangin ahung vomta a, ha chu sisan bangin ahung umta hi.

¹³ Huleh vaan aahsite chu theipi kung huihpi haat tahin a muut a, a gah puamte a pulh bangin leiah a kia hi.

¹⁴ Huleh vaan chu lehkhabujial a kijialbei bangin a mangta a; huleh taang leh tuikulh gam chinteng a umna va kipan suanmang in a umta uhi.

¹⁵ Huleh leitung a lalte, mi liante, mi hausate, sepaih houtu lianpente, mi haatte, huleh saltaang leh taanglou mi zousiah chu kohawm leh taanga suangpite ah a kibuta va.

¹⁶ Taangte leh suangpite kawmah, Hung netkhum unla, amah laltouphah tunga toupa ma apat leh, Belaamnou lungthahna apat hung phual un.

¹⁷ Ajiahchu a lungthahna ni loupi hung tung ahita; koi ahiai diing zou diing? a chi uhi.