THUPHUANDOH 20 - Thuhun Thah (BSI)

Kum saang khat sung Setan kaan a hihna

¹ Huleh angel khat vaan a kipana hung kumsuh, a khuta kokhuuh tobei chabi leh khainiang golpi tawi ka mu a.

² Huleh ama’n hu guulpi teeh dragon, Diabol leh Setan chu a man a, kum saang khat sung diingin a kaanta a.

³ Huleh kum saang khat a chin masiah a namte a heem kiit louhna diingin kokhuuh tobeiah a paailuut a, a khaahkhum a, a siindetta hi; huzoh chiangin amah chu tomkhat sung hahkhiah ahi diing hi.

⁴ Huleh laltouphahte leh a tunga pute ka mu a, a kawmvah vaihawmna piah ahi a; huleh Jesu thu heetpihna jiah leh, Pathian thu jiaha a lu uh tana um, gamsa leh a lim be ngeilou a, a tal uh aha, a khut uh aha a zong meelchihna nei ngeiloute hagau haw ka mu a; amahuh chu ahung hing va, Khrist toh kum saang khat vai a hawmta uhi.

⁵ Hizongleh misi dangte chu kum saang khat a bei masiah a hing kiit sih uhi. Hichu thohkiitna masapen ahi.

⁶ Thohkiitna masapena telte chu a hampha uhi; hute tungah sih nihna in thu a nei sih a, hizongleh amahuh chu Pathian leh Khrist siampute ahi diing va, amah toh kum saang khat vai a hawm diing uhi.

Setan hahdohna leh kidouna tawpnapen

⁷ Huleh hu kum saang khat a bei chiangin Setan chu a taanna apat hahkhiah in a um diing a.

⁸ Huleh leitung ning li a um namte, Gog leh Magog chu heema kidouna a puikhawm diingin a chiahdoh diing hi; a tamlam u’chu tui khang lian piauneel bang ahi uh.

⁹ Huleh amahuh chu lei vailam daap in a chiahtou va, misiangthoute giahbuuh leh, khopi deih um chu a hualkhumta uhi; huin Pathian a kuanin vaan apat mei ahung kesuh a, amahuh a kaangtumta hi.

¹⁰ Huleh amahuh heemtu diabol chu, gamsa leh zawlnei tahlou umna, mei leh kaat diila paihluut in a umta a, kumtuang kumtuang in suun leh janin suhnat in a um diing hi.

Gingloute thohkiitna leh vaihawmna nunungpen

¹¹ Huleh laltouphah ngou loupitah leh a tunga toupa, a ma apata lei leh vaan a taimangnapa chu ka mu a; amahuh diingin mun mawngmawng muh in a umta sih hi.

¹² Huleh misite, a lian, a neu, Pathian ma a diing ka mu a; huleh lehkhabute a kihong a; huleh lehkhabu dang, hinna lehkhabu zong a kihong a; huleh misite chu hu lehkhabute a kigial bangin a natoh dungjuiun vaihawmsah in a umta uhi.

¹³ Tui khang lian in a sunga misi umte ahung pawtsahta a; huleh sihna leh misikhua in a sunga misi umte ahung pedohta uh; huleh amahuh chu michin a silbawlte uh dungjuia vaihawmsah in a umta uhi.

¹⁴ Huleh sihna leh misikhua chu mei diil a paihluut in a umta uh. Hichu sih nihna ahi.

¹⁵ Huleh koipouh hinna lehkhabua kigial kimu lou photmah chu mei diil ah paihluut in a umta uhi.