THUPHUANDOH 19 - Thuhun Thah (BSI)

Vaana gualzohna leh Belaamnou ji neihna

¹ Hi silte nungin vaan ah mipi tampi aw ngaihtah ka ja a, Hallelujah; hutdamna leh, loupina zahumna leh silbawltheihna chu Lalpa i Pathian u’a ahi;

² Bang jiahin ahiai i chih leh a vaihawmnate chu a thutah in a dihtat ahi; ajiahchu ama’n nohchizuahnu loupitah, a mingaihhaatna jiaha leitung suthanghuainu chu vai a hawmkhumta a, huleh a suaahte sisan phuba chu a tungah a laahsahta hi, chi'n.

³ Huleh amahun, Hallelujah, a chi kiit va. Huleh amahnu haalna meikhu chu kumtuang kumtuang in a jamtouta hi.

⁴ Huin upa sawmnih leh lite leh, silhing lite chu a khupboh in a puuh va, Amen; Hallelujah, chi'n laltouphah tunga toupa Pathian chu a beta uhi.

⁵ Huin laltouphah a kuanin aw khat ahung gingdoh a, Nanguh a suaahte zousiah leh, nanguh amah lau, a neu a lianin i Pathian u’chu paahtawi un, chi'n.

⁶ Huin mipi tamtah awging bang, tui tamtah luang ging bang leh, vaanpi ging nasatah tobang ka jata a, Hallelujah; ajiahchu Lalpa Pathian Bangkimbawlthei lal in a tou hi.

⁷ Kipaahin i nuam diing uh, huleh a kawmah paahtawina i pe diing uh; ajiahchu Belaamnou ji neih hun ahung tungta a, a ji zong a kisa zoudiamta hi.

⁸ Huleh amahnu chu puan malngaat siangthou leh vaama a kijep diing phal ahi a; hu puan malngaat chu misiangthoute dihtatna ahi, chi'n.

⁹ Huleh ama’n ka kawmah, Gial in, Belaamnou ji neihna ankuang uum diing a kouhte chu a hampha uhi, a chi a. Huleh ama’n ka kawmah, Hite chu Pathian thu dihtahte ahi, a chi a.

¹⁰ Huleh amah be diingin a keengbulah ka puuh a. Huin ama’n ka kawmah, Hung be hial sin; kei chu na suaah tanpih leh Jesu heetpihna thu nei, na unaute laha ka hi; Pathian bia in; ajiahchu Jesu heetpihna chu thusoitheihna hagau ahi, a chi hi.

Gualzou Khrist chu

¹¹ Huin vaan kihong ka mu a, huleh ngai in, sakol kaang khat leh a tunga tuangpa, a min Ginum leh, Thutah kichi ka mu a; huleh ama’n dihtatna in vai a hawm a, huleh gaal a bawl hi.

¹² A mitte chu mei kuang tobang ahi a, a lutungah lallukhuh tampi a um hi; huleh amah loungal koimah heettheih louh min kigial a nei hi.

¹³ Huleh amah chu sisan a kidiah puan in a kithuam a, huleh a min chu Pathian Thu a kichi hi.

¹⁴ Huleh vaan a um sepaih honin puan malngaat vaam leh siangthou a kithuamin sakol kaang tunga touin amah a jui va.

¹⁵ Huleh namte a thah na diingin a kam apatin namsaau hiamtah a pawtdoh hi; huleh ama’n amahuh chu siih chiangin vai a hawmkhum diing a; Bangkimbawlthei Pathian lauhuaina leh lungthahna uain suuhna chu a tuanchilta hi.

¹⁶ Huleh ama’n a puan tung leh a malpi tungah KUMPIPATE KUMPIPA, LALPATE LALPA chia kigial min a nei hi.

¹⁷ Huleh angel khat ni a ding ka mu a; huleh amah chu aw ngaihtaha kikou in, vaan laizawla leeng vate kawmah, Hung unla, Pathian ankuang luina loupitah ah hung kikhawm un;

¹⁸ Kumpipate sa, sepaih houtute sa, mihaatte sa, sakolte sa leh a tungva tuangte sa, huleh mi zousiah, zalen leh saltaang, a neu leh a lian sa na neeh theihna diingun, a chi a.

¹⁹ Huin hu gamsa leh, leitung kumpipate leh, a sepaihhon u’chu hu sakol tunga tuangpa leh a sepaihte toh kidou diinga a kipunkhawm uh ka mu a.

²⁰ Huleh gamsa chu matin a umta a, huleh zawlnei tahlou, gamsa chiamchihna neite leh, a lim bete a heemna a, a ma a silmah bawltu zong amah toh matkhawm in a umta a; hite geel chu a nihun kaat a kaang mei diilaha hinga paihluut in a umta uhi.

²¹ Huleh a mawh teng chu sakol tunga tuangpa namsaau, a kama hung pawtdoh khu in thah in a umta va; huleh amahuh sa in tungleeng va zousiah a gilvahta uhi.