THUPHUANDOH 18 - Thuhun Thah (BSI)

Babylon khopi loupi puuhna

¹ Huleh hi silte nungin angel dangkhat silbawltheihna loupitah neia vaan apat hungsuh ka mu a; a loupina in lei a taan vaahta hi.

² Huleh amah chu aw ngaihtahin, naahpitahin a kikou a, Babylon khopi loupi chu a chimta hi, a chimta hi, dawite umna leh, hagau bolhhoh chinteng kulh leh, va sianglou leh kihdahum chinteng bawm ahung hita hi.

³ Ajiahchu nam zousiah in a kingaihhaatna lungthahna uain chu a dawnta va, huleh leitung a kumpipate’n amah a kingaihpih va, amah noptatluatna jalin leia sumkawlveite a hausa gawpta uhi, a chi a.

⁴ Huleh vaan apat aw dangkhat ka ja a, Ka mite haw, a sualnate a na tel louh na diingun leh, amahnu toh na thuaahkhawm louhna diingun amah apat hung pawt un.

⁵ Ajiahchu a sualnate’n vaan a suta a, huleh a giitlouhnate Pathian in a he zing ahi.

⁶ Ama’n ahung piah bang ngei in amah pia unla, a silbawl bangjelin a kawmah a lehnih in thuh un; a nou sundimah amah diingin a lehnih in sundimsah un,

⁷ A kiloupisahdan leh, a noptatdan bangjel in bawlgim unla, sulungkham un; ajiahchu ama’n a lungtang in, Kumpinu in ka tou a, meithai ka hi sih, ka lungkham ngei sih diing, a chi hi.

⁸ Hujiahin ni khat thuin amah gawtna, sihna leh, lungngaihna leh kialna ahung tung diing a; amahnu chu mei in a kaangtum diing hi; ajiahchu a tunga vaihawmtu Lalpa Pathian chu a haat ahi, a chi a.

⁹ Huleh leitung a kumpipate, amah na kingaihpiha, amah toh nuamtaha na umte’n, amahnu kaatna meikhu a muh chiangun a kah diing va,

¹⁰ Amahnu kibawlgimna lau jiaha gamlapi a ding in, Tamaide, tamaide, Babylon khopi loupi, khopi kip, pungkal khat sunga na tungvaihawmna ahung tun taah mei! a chi diing uhi.

¹¹ Huleh leia sumkawlveite’n amahnu kahin a suun diing uh; mi koima’n a thuampua uh a lei nawn louh diing jiahin.

¹² Hu thuampote chu sanate, dangkate, suang mantamte, tuikep suang te, puanmalngaatte, puan sandupte, puannemte, puan sandaangte, sing gimtui chintengte, saiha a kibawl beel chituam zousiahte, sing mantampente, sumengte, siihte, suang kaang beel chi tuamtuam zousiahte;

¹³ Huleh singthaalte, sil gimtuite, sathaumante, begawte, uainte, taangbuangte, gehute, gante, belaamte, sakolte, kaangtalaite, suaahte, huleh mite hinnate bang ahi.

¹⁴ Huleh silgah na lunggulhte’n nang ahung nuseta va, sil tuituaah leh hoih zousiah in nang ahung paimangsanta hi; hitehaw chu na mu kiit nawn hial sih diing hi.

¹⁵ Hi siltea sumkawlveite, amahnu jiaha hung hausate chu, amahnu kibawlgimna lau jiahin gamlapi a diingin, kap in a suun diing va.

¹⁶ Huleh, Tamaide, tamaide, hu khopi loupi, puanmalngaat leh, puan sandup leh, puan sandaang silh a, huleh sana leh suang mantam leh tuikep suang a kijem chu!

¹⁷ Ajiahchu pungkal khat sung chauh in hibanga hauhsatna loupi bangmahlou ahung suaahta, chi'n. Huleh kuang pu photmah leh, kuang a tuanghaw zousiah leh, kuang mite leh, tui khang liana sumkawlvei photmah chu gamlapi ah a ding va.

¹⁸ A kaatna meikhu a muh un a kikoukhia va, hi khopi loupi tobang khopi khoiah a um ei? a chi uhi.

¹⁹ Huleh amahun a lutung va leivui kitheh in a kikou va, kap leh maupum in, Tamaide, tamaide, amah manphatna jiaha tui khang liana kuang neite zousiah suhhauhsat a umna khopi chu! pungkal khat sungin suhsiat ahung hita hi.

²⁰ Nang vaan leh, nanguh sawlleh siangthoute leh, zawlneite, amahnu tungah nuam un; ajiahchu Pathian in na phuba uh a tungah ahung laahsahta hi, chi'n.

²¹ Huleh angel haattah khat in buhgawina suang liantah tobang suang khat a la a, tui khang lian ah a paailuut a, Hichibanga naahpitahin Babylon khopi loupi chu paihkhiah ahi diing a, muh kiit in a um nawn het sih diing hi.

²² Huleh tengtang tumte tumging bang, la siamte la sah ging bang, gosem muutte muut ging leh pengkuul muutte ging bang na sungah a kija nawn het sih diing hi. Khutsiammi, banglam pouha khutsiam mawngmawng na sungah a kimu nawn sih diing a; huleh buhheehna gin mawngmawng zong a kija nawn sih diing hi.

²³ Huleh thaumei vaah zong na sungah a taang nawn het sih diing a; mou leh mouneitu aw zong a kija nawn het sih diing hi; ajiahchu na sumkawlveitute hi leitung a miliante ahi va; na bumsiamna a nam zousiah heem a a umtaah jiahun;

²⁴ Huleh a sung a’chu zawlneite leh misiangthoute leh, leitung a thah a um zousiahte sisan muh in a umta hi, a chi hi.