THUPHUANDOH 16 - Thuhun Thah (BSI)

¹ Huleh Pathian biahinn sung apatin aw ngaihtah khat in angel sagihte kawmah, Chiah unla, Pathian lungthahna belhbu sagihte chu leitung ah sungkhia un, a chih ka ja a.

² Huchi'n angel khatna chu a chiah a, a belhbu leitung ah a sungkhia a; huleh gamsa chiamchihna neite leh, a lim betute tungah meima sia natah mei ahung suaahta hi.

³ Huleh angel nihna in a belhbu tui khang lian tungah a sungkhia a; huleh hichu misi sisan bangin ahung umta a; huleh tui khang lian a um hinna nei zousiah chu a sita uhi.

⁴ Huleh angel thumna in a belhbu luidungte leh tuikhuuhte ah a sungkhia a; hute chu sisan ahung suaahta hi.

⁵ Huleh tuite angel in, Aw, Lalpa, hichibanga vai na hawm jiahin, Nang um zing leh, umta leh, hung um diing chu na dihtat hi.

⁶ Ajiahchu amahun misiangthoute leh zawlneite sisan a na suah va, huleh nang in a dawn diingun sisan amahuh na peta hi; dawn taah mawng ahihjiahun, a chih ka ja a.

⁷ Huleh maitaam a kipan a dang khat in, Ahi, Lalpa Pathian Bangkimbawlthei, na vaihawmte chu a dih in a dihtat hi, a chih ka ja hi.

⁸ Huleh angel lina in a belhbu chu ni tungah a sungkhia a; amah kawma chu mite meia haaigawp theihna piah ahi.

⁹ Huleh mite chu mei sataha haaigawp in a um va, huleh hi bawlgimna tunga thuneitu Pathian min a soisia va; huleh amah kawma loupina pe diingin a kisiih sih uhi.

¹⁰ Huleh angel ngaana in a belhbu chu gamsa touphah tungah a sungkhia a; huleh a lalgam chu ahung mial vehta a; huleh amahun na a sah jiahun a lei uh a petta uhi.

¹¹ Huleh a natna uleh a meimate uh jiahin vaan Pathian chu a soisia va, a silbawlte uh a kisiih tuan sih uhi.

¹² Huleh angel guupna in a belhbu chu Euphrates luipi ah a sungkhia a; huleh nisuaahna lama kumpipate diing a lampi bawl ahihtheihna diingin a tui chu a kang vehta hi.

¹³ Huleh ukeeng toh bang hagau bolhhoh thum, dragon kama kipan leh, gamsa kama kipan leh, zawlnei tahlou kama kipana hung pawt ka mu a.

¹⁴ Amahuh chu Bangkimbawlthei hu Pathian ni loupia kidouna a puikhawm diing a leitung pumpi kumpipate kawma chiahdoh, silmah bawl dawite hagau ahi uhi,

¹⁵ Ngai in, guta bangin ka hung hi. Kiging zing leh puan teengsa a um chu a hampha hi, huchilou inchu saguah in a vaah diing a, a zumhuaina a mukha diing uh.

¹⁶ Huleh amahuh chu mun khat, Hebrai haama Armageddon kichi ah a puikhawmta hi.

¹⁷ Huleh angel sagihna in a belhbu chu huihkhua ah a sungkhia a; huleh vaan a Pathian biahinn a kuanin, laltouphah akipanin aw ngaihtah ahung suaah a, Bawlzoh ahita, a chi a.

¹⁸ Huleh awte leh, vaangingte leh, kawlphete ahung um a; huleh zil nasatah a liing a, huchibang zilliing nasa leh loupi chu leitung a mihing um a kipat a umkha nai sih hi.

¹⁹ Huleh khopi loupi chu mun thum in a kikhen a, huleh namte khopihaw chu a chimta a; huleh a lungthahna uain nou chu a kawma piah diingin Babylon khopi loupi chu Pathian ma ah heetdoh in ahung umta hi.

²⁰ Huleh tuikulh gam zousiah chu a taimangta a, taangte zong muh in a um nawnta sih hi.

²¹ Huleh gial nasatah mai, a tang khat talent khat tuha gih vaan apatin mite tungah a kia a; huleh mite’n hu giala suhgimna jiahin Pathian a soisia uh; ajiahchu hu suhgimna chu a huaise mahmah hi.