THUPHUANDOH 14 - Thuhun Thah (BSI)

¹ Huleh ka en a, ngai in, Belaamnou, Zion taanga diing leh, a tal va a Pa uh min kigial chiat nuai khat leh siing li leh saang lite chu ka mu a.

² Huleh vaan apanin aw khat, tui tampi luang ging leh vaanging nasatah bang ka ja a; huleh tengtang tumte tengtang tumging bang ka ja hi.

³ Huleh amahun laltouphah ma leh, silhing lite leh upate ma ah la thah hileh kilawm a sa va; leitung apat a tatdoh hu nuai khat le siing li leh saang lite chih louh koima’n hu la chu a he thei sih hi.

⁴ Hite chu numei a kisubolhhoh loute ahi uh; nungaah siangthou bang ahihjiahun. Hite chu a chiahna phot a Belaamnou juitute ahi uh. Hite chu Pathian leh Belaamnou diing a gah masapen hi diing a mite laha kipana tatdoh ahi uhi.

⁵ Huleh a kam vah zuau thu a um sih a; Pathian laltouphah ma ah soisel bei in a um uhi.

Angel thum muhna

⁶ Huleh angel dang khat, leitung a teeng nam chin, phung chin, haam chin leh michin kawma taangkoupih diing kumtuang tanchinpha neia vaanlaizawl a leeng ka mu a.

⁷ Aw ngaihtaha kikou in, Pathian lau unla, a kawmah loupina pia un; ajiahchu a vaihawmna hun ahung tungta hi; huleh amah vaan leh, lei leh, tui khang lian leh, tuinaahte bawltu chu bia un, a chi a.

⁸ Huleh angel dangkhat in a jui a, Hu khopi loupi, Babylon chu a chimta hi, a chimta hi, a mingaihhaatna lungthahna uain nam zousiah a dawnsah jiahin, chi'n.

⁹ Huin angel dang a thumna in amahuh a jui a, Mi koipouh in gamsa leh a lim a biah a, a tal aha, a khut aha a chiamchihna a neihleh,

¹⁰ Pathian lungthahna uain, a hehna noua bangmah toh hal louh kisung chu a dawn diing a; huleh angel siangthoute mitmuh leh Belaamnou mitmuh ah mei leh kaata suhnat in a um diing hi, chi'n aw ngaihtahin a kikou hi.

¹¹ Huleh a suhnatna meikhu uh chu kumtuang kumtuang in a jamtou a; gamsa leh a lim bete leh, a mina chiamchihna nei photmahte’n chu suun leh janin khawldamna a mu sih uhi.

¹² Hi ah Pathian thupiah juite leh, Jesu gingta misiangthoute kuhkalna a kilang hi.

¹³ Huleh vaan a kipan aw khat in ka kawmah, Gial in, Tu apat misi Lalpa a site chu a hampha uhi; Hagau in, Ahi, a tohgimnate uh khawlsana, a silbawlte un hung jui diing ahihjiahin, a chih hi, a chih ka ja hi.

Buhlaah leh khovel grepgah loh hun

¹⁴ Huleh ka en a, ngai in meilum vaamtah leh, hu meilum tunga mihing Tapa hileh kilawm, a lutunga sana lallukhuh khuh a, a khuta kawite hiam tawi chu ka mu a.

¹⁵ Huleh angel dangkhat Pathian biahinn apatin ahung pawt a, aw ngaihtaha kikou in meilum tunga toupa kawmah, Na kawite pan inla, aat in: nang diingin a aat hun a tungta hi; ajiahchu lei buhte a kuaita hi, a chi a.

¹⁶ Huchi'n hu meilum tunga toupa’n lei tungah a kawite a paaikheta a, lei buh chu aat in a umta hi.

¹⁷ Huleh angel dangkhat vaan a Pathian biahinn apatin ahung pawt a, ama’n zong kawite hiam a tawi a.

¹⁸ Huleh mei tunga thunei, angel dangkhat, maitaam apatin ahung pawt a, aw ngaihtaha kikou in kawite hiam tawipa kawmah, Na kawite pan inla, Lei grep gahbomte khawm in, ajiahchu grepte a min vehta hi, a chih a.

¹⁹ Huin angel in leitung ah a kawite a paahkheta a, lei grepte chu a khawm a, huleh buchu Pathian lungthahna uain suuhna ah a paahluutta hi,

²⁰ Huleh uain suuhna chu khogei lamah keeng a chilin a um a, uain suuhna a kipan sisan chu sakol kamkhau tanpha in, farlong saang khat leh za guup sung ahung luang kheta hi.