THUPHUANDOH 13 - Thuhun Thah (BSI)

Gamsahangte muhna

¹ Huleh tui khang lian piauneel tungah ka ding a, tui khang lian a kipanin gamsa khat, lutang sagih leh ki sawm nei, a kite tunga lallukhuh sawm nei, huleh a lutangte tunga Pathian soisiatna min nei, hung pawtdoh chu ka muta a.

² Huleh hu ka gamsa muh chu kaamkei tobang ahi a, a keeng chu vompi keeng a banga, a kam chu humpibahnei kam a bang hi; huleh amah chu dragon in a silbawltheihna leh, a touphah leh, thuneihna nasatah a pia hi.

³ Huleh a lutangte laha khat chu sihpih diing khophial a liam hileh kilawmin ka mu a; huleh sihna khopa a liamna chu ahung damta a; khovel pumpi in hu gamsa chu limdang sa in a jui uhi.

⁴ Huleh amahun gamsa kawma thuneihna petu dragon chu a bia va; huleh amahun Gamsa toh kibang koi a um ei? Amah toh kidou ngaap koi ahiai um? chi'n gamsa chu a bia uhi.

⁵ Huleh sil loupitahte soina diing leh, Pathian soisiatna diing kam a kawmah piah ahi a; ha sawm li leh ha nih sung thuneihna piah in a umta hi.

⁶ Huleh ama’n Pathian soisiatna leh, a min leh, a biahbuuh leh, vaan a umte soisiatna in a kam a kaahta a.

⁷ Huleh a kawm a’chu misiangthoute toh kidou diing leh, amahuh zoh diing thu piah ahita a; huleh phung chin leh, haam chin leh, nam chin tunga thuneihna piah ahita hi.

⁸ Huleh leitung a teeng zousiah, khovel siam chiil akipana thahsa Belaamnou hinna lehkhabua a min uh kigialloute’n amah a be diing uhi.

⁹ Mi koipouh in bil a neihleh ja heh.

¹⁰ Koipouh sala puiluuttu chu sal in a taang diing a; koipouh namsaau a that chu namsaau a thah in a um diing. Hi ah misiangthoute kuhkalna leh ginna a kilang hi.

¹¹ Huin gamsa dang leitung a kipana hung pawtdoh khat ka mu a; ama’n chu belaam bangin ki nih a nei a; huleh dragon bangin thu a soi hi.

¹² Ama’n gamsa masapen thuneihna zousiah a ma ah a zang a; leitung leh a sunga teenghaw chu gamsa masapen, sihna khop hiala liam hung dam kiitta chu, a besahta hi.

¹³ Huleh ama’n mihingte mitmuh in vaan apat mei bang koukhe hialin silmah nasatahte a bawl a.

¹⁴ Hu gamsa mitmuha silmah bawltheihna a kawma piah a umte zangin leitung a umte kawmah, namsaau a saatna maliam nei a hing nalai hu gamsa lim na siam diing uh ahi, chi'n leitung a teengte chu a heemta hi.

¹⁵ Huleh gamsa lim chu a haam theihna diing leh, gamsa lim be lou photmahte a thah theihna diing a gamsa lim kawma hinna piah theihna silbawltheihna ama’n a nei hi.

¹⁶ Huleh ama’n mi zousiah, a neu, a lian, hausa leh tagah, saltaang leh taanglou hitaleh, a khut jiatlam vah, ahihlouhleh a tal vah chiamchihna a neisah chiat hi;

¹⁷ Hu chiamchihna aha, gamsa min aha, ahihlouhleh a min nambar neite chih louh, mi koimah in a leitheih louh va, zuah zong a zuah theih louhna diingun.

¹⁸ Hi-ah pilna a kilang hi. Koipouh heetsiamna nei in gamsa nambar chu sim heh: ajiahchu hichu mihing nambar ahi; huleh a nambar chu za guup leh sawmguup leh guup ahi.