THUPHUANDOH 10 - Thuhun Thah (BSI)

Angel haat leh lehkhabu neu

¹ Huleh angel haat dang khat meilum a kithuam a vaan a kipana hung kumsuh ka mu a; a lutungah sakhituihuup a um a, a maai chu ni bang ahi a, a keengte chu mei khuam bang mei ahi.

² Huleh a khut ah lehkhabu neutakhat pheetsa a tawi a: a keeng jiatlam chu tui khang lian tungah a nga a, a keeng veilam chu leitung ah.

³ Huleh amah chu humpibahnei huum haam bangin aw ngaihtahin a kikou a; a kikou zohin vaanging sagihte’n a aw a suahta uhi.

⁴ Huleh vaanging sagihte’n a aw uh a suah tahun gial diingin ka kisata a, huleh vaan akipan aw khat in ka kawmah, Vaanging sagihte silsoi chu iim bihbeh inla, gial sin, chi'n ka ja a.

⁵ Huin angel, tui khang lian leh leitung a ding ka muh in a khut vaan lamah a tungtou a.

⁶ Kumtuang kumtuang a hing zingpa, vaan leh a sunga sil umte, lei leh a sunga sil umte, tui khang lian leh a sunga sil umte bawltu minin a kihaahsial a, hun a um nawn louhna diingin:

⁷ Hizongleh angel sagihna aw gin lai nite a, a muut di’kuan chiangin Pathian thuguuh kiphual chu a suaah zawlneite kawma ana soisa bangin suhkim ahita diing hi, chi'n.

⁸ Huleh vaan akipan aw ka jah in, Chiah inla, tui khang lian leh a tunga ding angel khuta lehkhabu neutakhat pheetsa um chu va la in, a chi a.

⁹ Huin angel kawmah ka va chiah a, a kawmah, Lehkhabu neutakhat chu hung pia’n, ka va chi a. Huin ama’n ka kawmah, La inla ne zou veh in; hi in na gil a khasah diing a, hizongleh na kam ah chu khuaizu bangin a hum diing hi, a chi a.

¹⁰ Huchi'n angel khut apatin lehkhabu neutakhat chu ka ladoh a, ka ne zou veh a; huleh hichu ka kamah khuaizu bangin a hum a; huleh ka neeh zohin ka gil chu a khata hi.

¹¹ Huin ama’n ka kawmah, Mi tampite leh, namte leh, haamte leh, kumpipate ma ah Pathian thu na soisawn ngei diing ahi, ahung chi hi.