THESSALONIKATE II 3 - Thuhun Thah (BSI)

¹ A tawpnapen in unaute, Lalpa thu chu nanguh a, a um bang a khang a, suhloupia a um theihna diing leh,

² Misuahsualte leh migiloute laha ka bit theihna diingun hung haamteisah un; ajiahchu mi zousiah in ginna a nei veh sih hi.

³ Hizongleh Lalpa chu a ginum a, ama’n nanguh ahung sukip diing a, migilou lahah ahung veeng diing hi.

⁴ Huleh ka hung thupiahte uh na bawl va, na bawl jel diing uh chih Lalpa ah ka hung muang uhi.

⁵ Huleh Lalpa’n na lungtangte uh Pathian lungsiatna ah leh, Khrist diinga ngaah kuhkalna ah hung pui heh.

⁶ Huchi'n unaute, Kei u’a kipan a na muh uh thugousiah banga um lou a, daan banglou a gamta unaute zousiah laha kihemkhe diingin i Lalpa uh Jesu Khrist minin thu ka hung pia uhi.

⁷ Bang jiahin ahiai i chih leh nanguh ngei in na hung juihdan diing uh na he uhi; ajiahchu na lahvah daan banglou in ka gamta ngei sih uh;

⁸ Koima tanghou zong a thawnin ka ne ngei sih va; na lahva koimah ka hung suhbuai louhna diingin suun leh janin tawltahin ka tonggim zaw uhi.

⁹ Thuneihna ka neih louh jiah uh ahi sih a, na hung juih diing va etton diingin ka kibawl uh ahi zaw hi.

¹⁰ Na kawmva ka um laiun zong hi thu ka hung pia uhi; koipouh in na a toh nuam louhleh ne zong ne sih heh, chih.

¹¹ Ajiahchu na lahvah daan banglou a gamta, nna mawngmawng tong lou a, mi natoh soisel mi khenkhat a um uh chih ka ja uhi.

¹² Hutobang mite chu nna tong kinke'n diing leh, amahuh tanghou kineeh diingin Lalpa Jesu Khrist minin thu pia in ka hasot uhi.

¹³ Hizongleh unaute, nangun zaw sil hoih bawl chimtaah sih un.

¹⁴ Huleh koipouh in hi lehkhathot a ka thu uh a zop louhleh hu mi chu chiamchih unla, kithuahpih sih un, a zum theihna diingin.

¹⁵ Ahihvangin chu meelma bangin bawl sih unla, unau bangin hilh zaw un.

¹⁶ Tuin hamuanna Lalpa ngei in bang lam pouh ah, bangchih laipouhin nanguh hamuanna hung pe zingta hen. Lalpa’n na bawnun hung umpihta hen.

¹⁷ Hi ka chibaibuuhna lehkha hi kei Paul in ka khut ngei a ka gelh ahi, ka lehkhathot chinah chiamchihna ahi, hichibang a ka gelh veu ahi.

¹⁸ I Lalpa uh Jesu Khrist hehpihna na bawnva kawmah um hen. Amen.