THESSALONIKATE II 2 - Thuhun Thah (BSI)

Lalpa hung kiitna diing thu a ngaihdan dihloute

¹ Hizongleh unaute, i Lalpa uh Jesu Khrist hungna diing leh, a kawma i va kikhopna diing thu ah, ka hung ngen uhi,

² Lalpa ni chu ahung tung zouta chihna hagau in aha, thu in aha, huleh kei u’a kipana lehkhathot in aha a na lungtang uh suhliing a umpah a, ahihlouhleh buai lou diingin.

³ Koima’n bangmahin hung heem sih heh; ajiahchu puuhsaanna tah ahung tun masat a, sualna mipa, mangthai tapa ngei ahung kilat phot louhleh hu ni chu hung tung lou diing ahi;

⁴ Ama’n chu Pathian chih a um zousiah leh, a kibia zousiah dou a, a tungva um tum in a kisuloupi diing a; Pathian biahinn a tou in, Pathian in a kibawl diing hi.

⁵ Na kawmva ka um laiin hi thute ka hung hilhta chih he nawn lou na hi viai mah?

⁶ Huleh tuin amah chu amah huntah a ahung kilat diing, bangin ahiai daal chih na he uhi.

⁷ Ajiahchu bohsiatna thuguuh in a tong panta hi; a daaltu lampi apat laahmang ahih masiah in a daal zing diing hi.

⁸ Laahmang ahih chiangin migiloupa chu ahung kilang diing a, Lalpa Jesu’n amah chu a kam huin a kaangtum diing a, ahung kilaahna vaah in a sumang diing hi.

⁹ Hu amahpa hungna chu Setan natoh dungjui a silbawltheihnate, chiamchihnate, silmah zuautheite,

¹⁰ Huleh mangthaite diingin dihtatlouhna heemna zousiah toh ahi diing hi; hutdama a um theihna diing va thutah ngaihnatna a pom louh jiahun.

¹¹ Huleh hikhu jiahin zuauthu a gintaatna diingun Pathian in dihlouhna natoh haattah a kawmvah a sawl diing hi;

¹² Thutah gingta lou a, dihtatlouhna kipaahpih zawte a bawnva siamlouh tansaha a um theihna diingun.

Hasotna leh thuhilhna

¹³ Hizongleh unau, Lalpa deihtahte, Hagau suhsiangthouna leh thutah gintaatna jala hutdama um diing a, a tuung a kipat Pathian in nanguh ahung teel jiahin keiuh chu na tung thu vah Pathian kawmah kipaahthu soi zing diing mawng ka hi uhi.

¹⁴ Huchibang diingin ama’n i Lalpa uh Jesu Khrist loupina tang diingin ka tanchinpha un nanguh ahung kou hi.

¹⁵ Hujiahin unaute, ding kip unla, thusoi in hiin, ka lehkhathotun hileh, thugousiah nanguh hung kihilhte chu tukip un.

¹⁶ Tuin i Lalpa uh Jesu Khrist ngei leh, Pathian, i Pa uh ngei, eite hung lungsiat a, hehpihna jala kumtuang hamuanna leh kinepna hoih hung pepa’n,

¹⁷ Na lungtang uh suhamuang in, thusoi leh natoh hoih chintengah hung sukipta hen.